Saturday, November 29, 2008

土曜日筆記

睡了沒有六個小時,早上七時多就醒過來。寫過昨晚姊妹飯局的網誌後,就趕忙出門應約今天的羽毛球練習。這天早上雖然有點冷,但陽光充沛,天還藍得很美麗。


跟波友們到中環的勝香園吃早餐,我點了番茄餐蛋通和奶茶。奶茶一如以往的香滑,不過番茄湯就沒有以前那麼濃稠,水汪汪的。不過無論怎樣,這裏永遠都是人頭湧湧。


相比上星期到過的大角咀室內運動場,上環這個室內運動場的設施明顯有點破舊。睡眠嚴重不足,再加上這班波友通常連續打足 120 分鐘,中間只稍作休息,我有擔心過體力不繼猝死在球場上。


打完波,我們到了附近有潮州巷之稱的皇后街熟食中心,一嘗陳春記據聞是頗有名的豬雜湯。我的豬雜湯加上米粉,因為我覺得米粉能夠吸收湯的精華。豬雜湯比我想像中清淡了一點,不過有我喜歡的胡椒味,而且豬雜也非常企理清潔。以 $21 一碗的價錢來說,絕對收貨有餘了。


之後我們點了旁邊曾記粿品的甜品。清心丸白果普普通通、芋泥白果就用料十足,最後我們還是一致認為清心丸綠豆爽味道最好。


曾記粿品最有名的,當然就是那些有甜有鹹的潮式糕粿。一場來到,當然要買些回娘家孝敬一下爹娘,雖然他們的評語只是一般,可是他們的食評絕對不能作準啊!


這晚波波也回娘家揍熱鬧,還穿上很可愛的球衣,帥斃了。

10 comments:

Anonymous said...

我也剛在前兩日吃過陳春記的淨豬雜湯,$20/碗,不過奇在要先俾錢才有得食!

supageti said...

我淨係識「帥呆」唔識「帥斃」呢 ~

潮州甜品我獨愛竽泥,但市面好難遇到好食既。

果啲粿要煎香先至好食。

Anonymous said...

我以為你溫習日文添... 又係食!

supageti said...

帥哥天資聰敏,唔駛溫都過到關 ~~

naruto said...

曾記粿品我由細食到老,我老豆最鍾買嚟"孝敬"我,但有兩款暗藏蝦米,黑名單佢

largeheadboy said...

rempei︰咁啱嘅!你都好識得發掘香港美食喎,我都係尋日至知道呢度咋。
呢類熟食中心,大多數都係一手交錢一手交貨架喇~

意粉︰從語文角度看,帥斃勁秋過帥呆好多架!唔單只呆,直頭死得人呀!哈哈!
係喇,果啲粿我地冇番煎,冇咁香口。呀,你好似係潮州人呵?
我係就係天資聰敏,但係衰懶囉,冇用啊 :p

小彭︰係喇,我好膚淺好低層次,成日都係掛住食,今個禮拜仲未溫書做功課添,睇嚟又要畀先生鬧喇~~

naruto︰你老豆對你好好喎!大早我又整兩舊過你喇~~
係喎,你好似話唔食得蝦米個喎,要陷害你好容易~

supageti said...

我係架己冷,不過係半鹹半淡果隻。

Anonymous said...

今晚一定要溫書,不要偷懶哦!
皇后街熟食中心我想去好耐啦.

Anonymous said...

哈哈!咁"辛苦"都係唔好"勉強"啦^o^
昨日諗住遲些上課逃避默書同問書
怎知せんせい話一個都不能少Orz

largeheadboy said...

意粉︰咦,莫非你係混血兒,潮州 + XX?^O^

小妹︰今晚又冇溫書呀,聽晚先喇(不過聽晚我又會推後晚~~)
皇后街熟食中心地方幾企理,人又不算多(我地兩點幾三點到),幾好架。不過記住陳春記禮拜日唔開,其他店子唔知都會唔會係一樣呢?

歐巴桑︰我聽日會“勉強”下架喇~ ^_^
嘻,上次測驗我都有諗過走堂架。
畀心機呀你地都,唔返學せんせい好失望架。