Sunday, October 10, 2010

習慣不習慣

裝修過後很快就三個月,也即是說我搬回舊居轉眼又已經三個月了。不竟這是我住了十年的地方,即使有很多東西都改動了,跟之前的面目全非,很快我就適應過來。話雖如此,到了今天有些東西還是沒有完完全全習慣過來。

客廳安裝了光管和射燈兩組燈,控制它們的燈掣一個在上一個在下,可是跟它們每天都相見,我還是搞不好哪個燈掣控制哪一組燈。很多時候,我都要向着燈掣唸出開燈的口訣︰“上開下,下開上”,才不會開錯了燈。不過,即使唸過口訣,開錯燈的情況現在還經常出現。


新造的床架加高了,多造了一層抽屜好擺放衣物。與此同時,新買的床褥也比之前的厚了,結果躺在睡床離地面遠了,離天花板就近了。每次下床都有點不習慣,因為好不容易才可以腳踏實地。每次靠近窗邊,我還會擔心不小心掉到窗外去。要是有天新聞說有一中年男子墮樓,千萬不要誤會我是自尋短見啊!


從前買回來的牛奶乳酪鮮肉,我都要稍微彎腰好放進雪櫃裏。新買的雪櫃採用了新式的設計,最常用的冷藏格放在最高,冰格則放在最下面。不過每次從外面回來,我都會無意識地彎低腰,然後才發覺現在根本不用彎腰就可以打開雪櫃。當然,現在間中我還是會向左走,以為雪櫃仍舊是放在廚房的左手邊。


當初決心進行家居大裝修,其中一個主要原因就是浴室的洗面盆漏水,只要開了水龍頭,沒多久地下就會流出一條水道,很令人不安。後來我索性改到廚房刷牙洗面,洗面盆漸漸就荒廢起來。現在我當然只會在浴室清潔自己,不過大清早朦朦朧朧醒過來的時候,偶爾我還是會走進廚房。


習慣了十年的生活方式沒有可能一下子忘記得一乾二淨,新的東西永遠都要花一段時間才適應過來,所以可以的話我盡量傾向維持現狀,只有在沒有其他選擇之下我才會選擇改變。年紀大了,要習慣新的事物適應新的東西有時真的很吃力。不過,當改變真的來了,沒法子還是要讓自己習慣過來。

24 comments:

naruto said...

三個月都適應唔到,應該唔關年紀事

卡臣 said...

搬入新居,我會貼上post it寫咩掣,熟後才撕走

lau2tang said...

我習慣了同你飲啡係你埋單架!
呢個你千祈唔好改~

largeheadboy said...

naruto︰都關架,不過我諗自己都有問題囉。不過話時話,屋企廁所同埋書房都有同樣問題,搞到頭都大埋~

卡臣︰呢個提議唔錯喎,不過等我再搬新屋先搞喇~

劉鄧︰係咩,有時唔係我埋單個喎!好喇,下次飲啡我嘅,唔好爭呀~ :p

supageti said...

好地地裝乜鬼射燈吖?

話時話我個客廳有 4 個燈掣,10 年後既今天除左成日開果個,其餘 3 個都搞唔清邊個打邊個 ~~~ :p

光.軍 said...

唔通係新不如舊?? 有無"還原"制一按就回到原來啊?

largeheadboy said...

意粉:裝修師傅提議咁整而我又冇乜所謂。不過啲燈泡係慳電膽,唔係一般啲石英燈,慳啲電,本來想用LED燈添呀。
嗰啲唔用嘅燈掣就由得佢地喇,煩少樣嘢~

光•軍:有個 undo 掣的確幾好,唔鍾意嘅就隨時可以返轉頭,不過可惜有啲嘢唔係電腦咁簡單~

Rempei said...

你咁大舊, 邊得咁容易掉到窗外去呢~~放心啊~~:p

紅米奇 said...

會唔會係對前後左右上下亂晒龍 ^^

largeheadboy said...

rempei︰我身材好標準架,邊到大舊呢,唔好誤導我千千萬萬個小讀者呀~ ^t^

紅米奇︰好頹喪架你都唔知,啱啱頭先又開錯燈喇!都唔知係咪師傅咁大整估,書房下面個燈掣就係天花燈,上面個掣就書枱燈,人都顛呀!連洗手盆水龍頭紅色係凍水藍色就係熱水,天呀~

小彭 said...

個廁所幾好喎!

睇咗個遊記, 完全feel到係斷腳囉, 不過真係好有參考價值呀! 唔夠hea嘅, 我覺得你要去多次先得囉!

largeheadboy said...

小彭︰我都覺得個廁所幾得下~
唔行斷腳,點可以喺有限嘅時間去晒想去嘅地方呀,所以唔好失禮同胞呀~
好,留定間 R&B 畀我呀!:p

supageti said...

尋日中午抽起條筋 label 左四個燈掣,點知夜晚開燈時發覺有兩個調轉左,笑死 R ~~~~ @@

l.minor said...

我屋企嘅燈制都係咁,問我邊個打邊個都唔知,自己開又ok

卡臣個方法好似d小朋友學生字咁,中英文貼住果舊野,學生字

l.minor said...

另外個toilet真係唔錯,我好鍾意果隻牆身磚

largeheadboy said...

意粉︰咁都得!下次唔會再錯喇啩~

l.minor︰呢個就好似大門啲密碼咁,對住佢就自自然就開到,但係叫你講個密碼出嚟就講唔出口。
廁所啲磚幾鐘意呀,有啲酒店 feel,欺騙自己以為住得好豪吖嘛~

galaxy said...

因為你去得太多旅行,少留在屋企,所以到而家都未習慣囉。

largeheadboy said...

galaxy︰係,我認我去得旅行多得濟,所以呢一刻完全冇出埠計劃呀!不過燈掣呢家野,似乎多啲留喺屋企都會錯過去啊~

ayclui said...

個廚房幾靚喎~ 窗邊就真係得人驚D, 我屋企D窗全部裝哂窗花o架...唔係我唔敢行埋窗邊...@@

洗手盆水龍頭紅色係凍水藍色就係熱水 --> 係咪師傅搵你笨比次貨你咋, 邊有咁嘅水龍頭o架...

largeheadboy said...

ayclui︰其實我都驚架,所以除非污糟到睇唔到出面,唔係我唔會抹窗架~ :p
藍色出熱水、紅色出凍水,我諗可以駁錯喉卦,不過算喇,我都少用熱水洗手,對我嚟講問題就唔算好大。

ayclui said...

吓,咁都由得佢? 我驚你第二時習慣咗之後,去到人地正常嘅地方開紅色洗手/沖涼...淥熟你啊...@@

largeheadboy said...

ayclui︰都係啊呵,不過要改嘅話我諗工程浩瀚啊~

ayclui said...

簡單D, 搵D 顏色 label 貼住個水龍頭, 貼番啱佢囉...

largeheadboy said...

ayclui︰一於刮甩啲紅色同藍色,然後再油過上去喇!哈!