Tuesday, May 13, 2014

20140501:香港.台北.東京

這趟旅行早在去年十一月就已經開始醞釀,理應有充裕時間準備什麼都可以早早落實,不過事實上到了出發前一天,行程還不斷修訂,旅館也改了再改。一切一切,全因為出發前的周末,日本的天氣忽然暖和了不少,令計劃前去的地方原本還是含苞待放的櫻花一下子都綻放過來。

對,這次的目的地繼續是日本,四月底五月初櫻花盛開的北東北地區。



每次旅行,總是未抵埗就已經增磅,這次也沒有例外。


機票在去年年底時以飛行里數兌換,不過當時只有停台北的航班可以選擇。雖然後來出現直航的航班,但轉機票的話要再付上額外里數或現金,所以最後還是乖乖在桃園國際機場歇一歇好了。


飛機準時五點降落成田機場,立即前去辦理入境手續,因為慢了一步的話 JR 的售票處就可能大排長龍,隨時耽誤不少寶貴的時間。

花上不到十分鐘,順利地買下五天東日本火車證、換了明天大清早前去角館的新幹線車票,還買下幾分鐘後就發車開往東京現在只要 1,500円一程的 N'EX。 離開售票處時看着長長的人龍,我還沾沾自喜。

在列車上安頓過來後,我仍然為不用一個鐘頭就完成通關和買車票等手續感到異常興奮。

就在這個時候,我突然發覺為什麼自己會這樣輕鬆,什麼牽掛都沒有,就像平時在香港逛街兩手 fing fing 的樣子。咦,我的行李箱呢?我完全沒有印象曾經把它拖到月台和推上火車啊!難道,難道是遺留在售票處?

心裏一沉,彷彿一下子從天堂掉進地獄,我們都慌張得不知道怎樣打算。N'EX 是直通車,離開機場後就沒有中途站,直駛往東京。我知道沒有可能中途下車,列車更沒有可能因為我們折返,我們的目的地就只有東京。

我試圖向車掌求助,但他只叫我們返回成田機場,也沒有確實答覆是否已經找到我們的行李箱。沒有別的選擇,我們到達東京後就立即折返。

才剛抵埗,我們竟然就要坐上回程的 N'EX。不過可以安慰一下自己的,就是這程不用付錢。


八點幾,幾經波折,終於在 JR 的辦事處跟我的行李箱重聚。只怪我當時太過得意忘形,把你完完全全忘記了!


代價是多花了三個鐘頭和 1,500円,還有失去不少心血,十點過後終於來到後樂園的 Tokyo Dome Hotel。





到了現在,我還不肯定是不是有什麼地方出了錯。三月時在訂房網站看到這家很具規模的飯店推出令人非常難以置信的住宿方案,33 平方米的雙人房竟然只要 6,700 円,比我經常投宿級數差了一大截的淺草橋 Hotel Mystays 還要便宜。要知道,這裏的房租多是過萬起跳,不即時訂下來就實在對不住自己。事實上當天晚上再搜尋一下,這個住宿方案已經沒有了。



我們從東北回來後,還會在這裏多住一晚,房租同樣是 6,700円。

奔波了一整天,整個人累得要命,就到飯店附近的餃子の王将補充一下能量。



明天,一切一定會更美好!

26 comments:

the inner space said...

經台北去成田但又不是同個航曲要在貴賓廳等也很划算喲!

曾搭同一個航曲但經台北去成田那次在台北等足七個鐘頭的慘痛經驗記憶猶新。

小彭 said...

好嘢呀, 心想事成啊, 又有(爛尾)遊記睇呀!

我未出發前, 會叫團友唔好比我再改個行程, 不過都係會改到最後一秒鐘架!

小肥 said...

6700yen 一泊,6月,7月都有呀! http://rsv.rurubu.travel/PlanDetail.aspx?st=4019051&sk=C4&pc=B2CEHTL&rc=AL3&rv=40&&aff=star 是這個吧 ^.^

jokelib said...

果然好勤力喎! 讚!

largeheadboy said...

要謝謝大家還來造訪這個很久沒有更新的地方~

Space:經台北飛東京除咗有機會去埋佢地個 lounge 之後,cx 嘅話我覺得架機多數唔滿,坐得舒服啲,當然時間就用多啲。
停兩個零鐘還可以,七個鐘就人都癲呀!

小彭:想第二樣嘢會實際啲喎~
有時確係唔改唔得架,今次我都係過到嗰邊至決定放棄仙台,唔係都唔可以喺宇都宮買到洗頭水呀!

小肥:正正就係呢個 plan 呀!原來無人搞錯,為咗佢專登飛過去住都抵呀!第一晚佢仲畀我住 34 定 36 樓,賺晒。

largeheadboy said...

jackson:等我寫多一日至讚我都未遲呀~

largeheadboy said...

小肥:唔係喎,我睇你條 link 個價錢係一個人嘅價錢,兩個人就係 13,400,而我當時係兩個人都係 6,700。我真係想去訂房架~

小肥 said...

嘻嘻,路邊社消息。小肥系網友間收到6700一房系一閃即逝價,仲要話收到酒店電郵,話個價出錯咗,問佢取消再訂返得唔得。。。詳情因為唔記得系邊一個寫,暫時無法確認 XD

l.minor said...

寫blog的大都停哂手,我估你都唔update,估唔到突然又有呀~

keep住....唔好爛尾~

Niseko2000 said...

嘩, 係東京Yen6,700一晚, 房又大, 好抵呀!
好彩搵番行李....

3J 家庭 said...

哦..原來你係去東北玩

你果然係一個大頭(蝦)...

L L said...

櫻花雪山草坪,美到不得了!

the inner space said...

哈哈哈, 七小時修理飛機 747—400,
CX 没有换機, 坐復修的 747—400 飛成田,
三個多小時心情忐忑,最後執返條命仔,
如今才可以有機會與兄台對話咋。

largeheadboy said...

小肥:我又無收到佢地 email 喎~

minor:我成日都想繼續寫落去架,不過就越來越懶,或者去多啲旅行就有多啲動力。

niseko2000:咁抵住,所以即使要轉車至去到東京站轉新幹線我都無所謂。
真係好彩搵返件行李,唔係之後個 trip 就會有排煩兼無晒心機。

3J 家庭:我好想去東北睇櫻花嘛,之後去咗角館同埋弘前。
大頭絕對無改錯名呀~

laulong:好久不見啊~
呢棵一本櫻好得,好彩嗰日好好天先至可以完全感受到咁美嘅畫面。

space:呢樣又確係幾驚嚇喎,畀着我我都會成程坐得唔安樂重木

l.minor said...

忘記講,第一張相好靚~

去多d旅行,只會有多d動力開頭。。。哈哈哈

lau2tang said...

即使係虎頭蛇尾,都唔該畀多兩篇黎吖!
個個系列都係講搭飛機同去邊就玩完~~ ^__^
嚴正抗議呀!

ROY said...

又開一個新遊記呀?咁之前果d......

樓上個位實客,去我度睇我果個啦,起碼有10篇以上呀~(廣告時間)

韻味熊貓 said...

東京啲酒店房都有咁大?

largeheadboy said...

minor:小岩井農場呢棵一本櫻本來唔係呢次個重點,不過最後成為其中一個亮點,實在多得天公造美。
我會繼續去旅行繼續開多啲遊記頭架喇~

劉鄧:好,就盡力寫多兩篇喇,呢次個 trip 最精彩都係頭幾日~

ROY:之前嗰啲仲努力連載中,未完架!
係呀,你啲遊記好精彩資料又好豐富(幫埋你賣廣告喇)。

佛爺:更大都有呀,不過我就住開 13 平方米,所以有 33 平方米真係好感動。

小小 said...

點解可以連喼都漏低架XD

joeyee said...

繼續吾好比佢停, 寫遊記同去旅行都一樣!

largeheadboy said...

小小:可能時間剛剛可以趕到幾分鐘後就開嘅 N'EX,所以興奮得濟直奔往月台,完全無為意個喼仲喺售票處,以為慳到時間結果蝕得更多。之後我地都互相提醒,一定要 check 清楚帶齊嘢至好離開一個地方。

joeyee:我都好希望 keep 住去旅行呀!遊記會努力架喇!不過你係咪都停晒手呀?

albertlaw said...

看了這段『花上不到十分鐘,順利地買下五天東日本火車證、換了明天大清早前去角館的新幹線車票,還買下幾分鐘後就發車開往東京現在只要 1,500円一程的 N'EX。 離開售票處時看着長長的人龍,我還沾沾自喜。

在列車上安頓過來後,我仍然為不用一個鐘頭就完成通關和買車票等手續感到異常興奮。

實在回心狂笑,因為我也有相同經驗!

largeheadboy said...

Albert:我覺得去旅行時間好寶貴,可以嘅話唔想排喺人地後面,所以落咗機我永遠一支箭咁扒晒啲人頭,同埋我成日都唔明點解啲人落咗機至去廁所同填 landing card,呢啲我一定喺飛機上面做晒。

紅米奇 said...

一開始就有咁激, 真係等你動筆架, 寫寫寫, non-stop

largeheadboy said...

紅米奇:有時真係要一鼓作氣咁寫至得,一停低咗就會攤凍晒,所以希望今次會繼續寫落去喇~