Sunday, January 24, 2010

時計

我覺得我有個地方很像日本人,就是對時計的重視。

床頭的電子跳字鐘陪伴了我很多年,我一直都很喜歡它,因為它很合我的心意,除了有溫度計功能和不會發出“滴滴搭搭”的聲音騷擾我睡眠之外,它還有夜光功能,每當我在夜裏迷迷糊糊醒過來的時候,只要輕按它一下,就可以讓我很安心知道我還可以睡多久才離開暖暖的被窩。


不過美好的東西總是會過去的,早前它終於壞了,逼於無奈下我唯有四出尋找它的替代品。可是走遍很多店子,都找不到適合放在床頭的小時計,不是選擇太少或者款式不合意,就是價錢不合情理地高。結果,我的床頭原本放時計的地方一直空置着。

早前在京都逛 loft,看見一個角落專門擺放各式各樣的時計。那一刻,我突然覺得自己是個日本人,因為只有在日本,商人才會知道客人很需要一個適合自己的時計,於是在店鋪裏放滿大大小小的時計,然後讓我這類也很重視時計的客人慢慢去挑選。


這個會顯示日曜日和月曜日,那個除了溫度之外還有濕度顯示功能,果然花多眼亂,令人目不暇給。不過到了最後,我還是空手而回一個都沒有買,因為一個最簡單在中國內地製造的時計也要千多日圓,在日圓高企的環境下花錢還是要花得謹慎點。

昨天晚上回娘家吃飯,跟姊夫說起時計這個問題,他說深水埗鴨寮街應該會有很多選擇,着我去看一看。這天,我就真的走到鴨寮街,果然整條街有不少攤檔擺放着很多設計新穎的時計,這個的外殼是木造的,那個有太陽能功能,款式之多功能之獨特絕非京都的 loft 可以媲美。最後在千挑萬選之下,我終於高高興興買了我的心頭好,代價只要二十港元。


其實我根本不像個日本人,我只是個徹頭徹尾的鴨寮街大叔。

17 comments:

紅米奇 said...

大頭叔: $20真係好平,唔好睇少鴨寮街呀, 隨時執到寶架, 早排都買左個LED旅行電筒仔都係拾幾蚊咋, 唔錯播 ^^

Ellen老師 said...

我信相你会很快又要買另1個了!

歐巴桑 said...

買過好幾個"鴨記限定"的都紅顏薄命,英年早逝......

naruto said...

鴨寮街好多野睇架,試過日本買完個鐘,番嚟鴨記見到仲平D㖭呀!

我都係鴨寮街大叔

lala said...

新年快樂!我有個小朋友等緊你領養.

largeheadboy said...

紅米奇︰我都好鐘意行鴨寮街架,不過呢排就少行咗,怕畀人淋水吖嘛~ :p
我都見好多人買細細支嘅電筒仔,不過對我就唔多大用處。

老師︰真係呀,我諗住遲下再去買多個架!我想買埋用木造嘅跳字鐘,都好型仔架,不過就要百零蚊囉~

歐巴桑︰咁黑仔!有時都有好貨色架!不過之前買過膠造“痴”起牆身嘅皂液機,就成日跌落嚟囉!^t^

naruto︰其實日本依家好多野都係大陸造架喇,過到去就賣到貴一貴,鴨寮街真係我地庶民嘅天堂呀!鴨寮街萬歲啊!

lala︰乜我仲未同你講新年快樂嘅咩原來?:p
領養?我要供書教學責任好大個喎!

supageti said...

鴨寮街大叔:對時計重視,對時間又重唔重視呢可?:P

maymay said...

香港地,20蚊會有幾好嘅野吖!

光.軍 said...

鬧鐘真係每日不可缺少的東西, 但自從手機有了"鬧鐘"功能, 鬧鐘已成為我的史前文物了.. 鬧鐘的"bit bit"聲在早上真係會鬧死人, 用手機mp3鈴聲就好好多, 至少可以揀自己鍾意的聲音來"鬧"醒自己呀!

naruto said...

你係“庶民”?我超

Ellen老師 said...

鳴門~~~~講得好正呀!

largeheadboy said...

意粉︰問得好問得好!我一向都好有時間觀念架,多數都有早無遲,嗰日約你地喺小飛俠下面我未到十二點就到喇~ :p

maymay︰嘩,大拿拿廿蚊喺茶餐廳食到個好正嘅下午茶餐架喇,不過就唔可以轉凍飲囉!

光.軍︰其實我都係用手機做鬧鐘,好似對佢有信心啲。至於床頭,我就始終要有個鐘至覺得聚財咁。^t^

naruto︰唔好超我呀,我真係庶民嚟架,尋日仲一路飲住杯十蚊嘅珍珠奶茶一面行鴨寮街呀~

老師︰我搭巴士搭地鐵同埋行路唔搭的士架......喺京都,仲唔係庶民 ^g^

小彭 said...

鴨寮街好呀... 附近d野食! mm先食完一轉!

Rempei said...

款式老土左D喎~~

largeheadboy said...

小彭︰咁食完啲乜呀?
嗰頭真係有好多好野食,之前會去食豬腸粉,但係依家就越嚟越多人。好耐未食過松記隔離間豬膶米線喇~

薯嘜︰我個人潮唔起,都係啲老土野啱我多啲~ :p

小彭 said...

係唔覺意去左個頭, 食左泰國野, 睇番原來網上有一半劣評, 不過我又覺得ok喎! 之後, 食左碗有拉花嘅紅豆綠豆沙湯圓. 一邊行, 發現樣樣都好想食! 連湯水舖都有好多選擇, 同埋我唔去松記架喇!

largeheadboy said...

小彭︰深水埗泰國野?我又淨係諗到松記隔離嗰間。松記幾好吖,就算幾凍都可以有 summer 嘅感覺,最多唔好要哈囉定幻彩明珠囉~