Thursday, July 15, 2010

第一餐

這晚,是兩個多月來第一次為自己弄晚餐,雖然只是簡簡單單的公仔麵。幾天前送過來的餐枱還沒有裝妥,廚房的枱面就成為我的臨時飯枱。



回到老家生活快兩個禮拜了,一切理應恢復正常,重回正軌。可是,很多濕濕碎碎的東西還沒有弄妥,結果過去一個星期有兩天我被迫呆在家裏,等着最後都沒有到來的裝修師傅。等待從來都是苦事,但白白的等就是苦上加苦。即使師傅最後出現了,老家一下子又會變得塵土飛揚,害我之後一面流着汗一面做善後。


因為裝修的大大小小事情這陣子整個人被搞得非常鬱悶,幸好還有東西讓我苦中作樂,例如是買到很便宜但又不佔地方的抹手紙架,以及利用雪櫃的自動製冰功能,在悶熱的晚上弄一杯冰凍的可樂。

18 comments:

supageti said...

上星期六客廳部冷氣打左柴,等到星期二至裝番部新機,果幾日我地一家百幾口真係苦不堪言 ~~~ :(

supageti said...

仲要加埋星期二朝晌屋企 PK 整傷左膝頭都無時間去睇醫生,到依家都未抑鬱完呀我 ~~~

largeheadboy said...

意粉︰哈,一家百幾口!好彩咁快送到貨咋,唔係仲慘啊!不過尋晚我都可以唔駛開冷氣瞓,今晚呢就~
整親膝頭唔睇醫生吽下吽下咁得唔得呀?

maymay said...

陰公咯,簡直係我從前嘅翻版!

放心,好快就會過去,一切更勝從前~^_^

歐巴桑 said...

隻杯好"姨媽傢俬"喎
天氣咁熱真係叫人悶上加悶呀

Ah ming said...

係個咁靚的廚房煮公仔麵…

naruto said...

害我之後一面流着汗一面做"影“後咋喎

自動製冰功能。。。係咪水喉水嚟架?

largeheadboy said...

maymay︰我覺得我啲問題仲多過你嗰陣時,如果係你一定勁發顛呀!
聽日佢地又會嚟執野,希望唔駛點等之餘仲係最後呢一次喇~

歐巴桑︰好眼利喎,啲杯買咗十年冇乜點用過仲好新淨架~
係喇,熱成咁,所以夜晚沖好涼我就乜都唔再做架喇~

ah ming︰表面睇靚架咋,實質手工麻麻好多瑕疵,用嚟煮麵就啱晒喇~

naruto︰要等佢地走晒我至可以吸塵呀抹地架嘛,好辛苦架~
用煲好啲水架,好好玩,倒啲水入去個容器度過一排就會跌一粒粒冰去個冰格度架。

joeyee said...

裝修真係好煩架!

naruto said...

咁都好D,以前加拿大我用過一架係駁水喉水架,加拿大係直接飲水喉水架嘛

supageti said...

搞到手瘀腳瘀,膝頭哥係跪落地果下撞親,星期二好痛,但約左裝冷氣梗係唔改期啦,公司又多野做都癲,唔想再請假,不過吽左幾日又真係好左好多咁 ~~~

galaxy said...

冰凍的可樂加兩片檸檬會更加爽 !

largeheadboy said...

joeyee︰所以都係嗰句,裝修係要趁自己年紀還可以尚有點精力至可以做,再過多幾年睇怕我冇咁嘅魄力日日蒲旺角同灣仔~

naruto︰可能由細唔飲慣水喉水,出國去到可以飲水喉水嘅地方我都好少飲水喉水。

意粉︰咁依家膝頭好啲又有冷氣嘆就冇咁抑鬱喇~

galaxy︰好提議喎,咁我要常備檸檬喺屋企先~ :p

小彭 said...

有無買隻eason解一解鬱悶? 不過聽完有可能仲鬱呀!

Anonymous said...

Congratulations! Looks very nice. Should visit next time when I'm back. Ricky

largeheadboy said...

小彭︰今日有諗過買架,不過見仲未插好個 dvd 機所以冇買。唉,依家睇返碟當補數喇~

ricky︰都話遠睇 ok 架,千祈唔好近睇呀!好呀,你返嚟就上嚟走轉吖~

Rempei said...

咁我地幾時上嚟走返轉呢?又~~

largeheadboy said...

ken san︰希望過埋星期四就可以招呼各方友好喇,因為師傅星期四又要上嚟執手尾~