Thursday, March 13, 2008

自炊生活

中鐵十分之一機會我當然抽不到,今晚累積獎金達四千五百萬的六合彩我也忘記了買,距離發達之路還有很遠很遠。這天唯有節約些,在家裏弄些簡簡單單的東西吃吧!

看到意粉近來弄過多次雞翼,很是吸引,這晚也就有樣學樣。煎香了雞翼,然後再加上洋蔥和雜菌再煮一會,就完成了這道既香口又有營養的洋蔥雞翼了。



一直以來對菜心都沒有好感,最主要原因是每次回娘家吃飯,飯桌上總會有一碟枯枯黃黃的菜心,味道當然也不會好到那裏去了。今天在超級市場看到這北京菜心樣子不錯,蠻新鮮的,就決定給它一次改過自新的機會吧!把菜心放進雞湯裏煮數分鐘,一碟嫩綠的菜心就弄好了,不明白為什麼媽媽每次都是失手呢?



我家很少吃米飯,因為家裏的紅米糙米要預早浸泡,不太方便,同時清理飯煲也是件很惱人的事,所以通常我只會吃麵條,省些功夫和時間。這晚就煮了鮑魚麵和瑤柱麵,味道也很不錯啊!



這頓晚飯本應可以吃得很稱心,可是電視上的財經新聞卻令我什麼胃口都沒有了。歐美股市繼續下跌、金價油價齊創新高都算了吧。對我打擊最大的,還是歐元兌美元再創新高,美元兌日圓就一度跌穿 100 日圓十二年低位。對,是十二年低位!天啊!天啊!怎麼會這樣子呢?



看來我的自炊生活要繼續好一段日子了!

36 comments:

外匯專家小娜 said...

唔需要太緊張吖,外幣嘅嘢,一係就升,一係就跌,你等佢跌嘅時候就入,升嘅時候就沽,咁咪唔使怕蝕囉.

rempei said...

我今晚做完野返黎見到美元兌日圓個價,我直頭面青、口唇白再加心跳加速!!!!都唔知點算????

largeheadboy said...

外匯專家︰我呢啲師奶,通常升嘅時候買,跌嘅時候就放。>_<
照你咁講,你應該一早發咗達囉喎!唱啲 yen 過我好喎!^o^

rempei︰係家真係好危急啊!早幾日 7.5 仲諗住咁高,遲下實跌返啲,到時至入,點估到佢一路有得升!我都見暈呀!

小彭 said...

大頭, 咁啱嘅, 我係高入低沽嘅人喎! 中鐵抽唔到不特止仲蝕左$50. 其實D YEN兌幾多, 都係會照去架啦, 最多節衣縮食, 呢幾日放工都係搭巴士.

maymay said...

大頭師奶:咩野叫做"桔桔黃黃"呀?
碟雜菌雞翼好似好得喎,個汁係咪用"史人昆"清龜湯煮嫁?

supageti said...

自食其力好吖,菜心其實滾一滾就可以上碟。老人家無牙又怕唔熟,通常煮野都會過左火,不過意粉爹灼既菜「淋」得黎又唔黃嫁。

今次去唔駛買 yen,求其o係柜桶底摷 d 出黎都夠洗,呵呵 ~~

歐巴桑 said...

哈!加分加分!
會煮飯的男生最抵惜XD
我外婆一樣愛把菜灼到又黃又霉
可能上一代都覺得這樣好吃啦^^

lau2tang said...

乜洗飯煲好難o架?
難到寧願唔食飯都有嘅?
yen咁貴就cut我份手信黎補貼吓囉。

Ellen said...

D yen 真係好貴呀~~

雞翼好似緊緊熟,唔夠煎香喎~~

largeheadboy said...

小彭︰好彩我仲係用白表抽,如果唔係又蝕多兩錢啊!
低就唔好沽嘛,留喺身邊遲早實用到啊!

maymay︰呢排睇得花師奶睇得太多,成日諗住佢對仔女呀柑同呀桔,一時錯手添,即改!^t^
碟雞翼冇加乜嘢呀,淨係用咗鹽、豉油同埋胡椒咋,碟菜就用咗龜湯煮。^o^

意粉︰係呀,正因為你講的原因,娘家的菜永遠都好淋好熟,我理解的,最多咪食其他餸囉。不過話時話,我媽的煮藝真係有待改進啊!^e^
其實我手頭上仲有足夠 yen 架,只不過依家真係太高喇,影響心情啊!

歐巴桑︰依家啲男仔唔識煮嘢食好蝕底架!哈,大叔又如何呢?
老人家無牙,又真係難怪佢地一般煮嘢都會太熟太淋啊!

劉鄧︰屋企仲係用緊舊式飯煲,會黏底啊!尋日痴線到諗過在樓下茶餐廳買兩個白飯添呀!:p
100 yen 店貨仔都係畀多一蚊啫,手信冇問題吖!^r^

ellen︰咁你仲有冇現貨呀?
嘩,好眼力喎,啲雞翼的確可以再煎耐啲,不過就好夠熟呀,啲肉仲幾滑添!

roy said...

係"中鐵建"呀,抽唔到都無大緊啦,升得咁少~

d yen去到7.7X,哈哈,有d心涼添......

小娜 said...

我都係白表,抽唔到,張cheque要星期一先入到戶口 ... 蝕息 ...... x_x

largeheadboy said...

roy︰係呀,係叫中鐵建呀原來?我都冇留意添!:P
哈哈,咁黑心,因住兩年之後可以再出動時升到上十蚊呀!^w^

小娜︰算喇,依家啲息咁低,都冇所謂喇!
係喎,唔記得你係大戶嚟個喎!^t^

歐巴桑 said...

呵呵!大叔佢......都係算吧啦....
人係無十全十美o架啦
其實佢已經叻咗好多lor
初初同佢一齊果陣
佢連燈泡有釘頭同鏍絲頭都唔知XDD

lau2tang said...

上到十蚊?!
大頭仔,希望你個唔喺烏鴉口啦!^m^
唔通你兩年後唔再去咩?

largeheadboy said...

歐巴桑︰哈哈!不如你又問下佢知唔知燈膽又有粗頭同幼頭之分。係喇,你都講咯,冇十全十美吖嘛,可能大叔有其他方面優勝哩!^O^

劉鄧︰唉,我見啲 yen 升到咁誇張,都豁出去喇!升到十算就十算喇!
呀,依家入,仲有兩蚊升幅賺喎!^R^

Ellen said...

隻股放左,賺得500,都唔夠彌補D yen呀!大家D手信,唔好有期望啦!hehe~~

largeheadboy said...

有 $500 賺仲想點呀!
你大阪返啊呵?芝士蛋糕、莓一衣同埋 tiramisu 朱古力吖唔該!

lau2tang said...

咁喺咪我依家入定啲yen,到時升唔夠十算,賺唔到嗰兩蚊,就問你收番差額咁呢?

largeheadboy said...

你依家入,到時暑假升到上九蚊你多謝我都多謝唔切呀!仲想問我攞返差額?^t^
不過,當然我都想佢見返 6 ,但係好似唔係咁易啊!>_<

Ellen said...

我名古屋返呀!

小彭 said...

去到8喇... 唉... 豁出去...

光.軍 said...

晚餐食麵總覺得唔係好(襟)飽..你係北方人嚟o架?

largeheadboy said...

ellen︰咁你又話想去路一路過大阪 shopping 嘅?咁唔該都照幫我執吖!^_^

小彭︰睇怕我就快要上街要求港元同美金脫勾喇!我咁大個仔都未見過 8 架!唉!

光.軍︰我唔係北方人呀!食麵都可以食好多食到飽架嘛!不過話時話,食完麵嗰晚好多時我都會摷零食!:p

貝拉 said...

下次用飯煲煮完飯用水浸完先,之後再洗容易好多. 我好多時都會第二日至洗架...

largeheadboy said...

貝拉︰我都有即刻用水浸架喇,不過始終都要好用力去洗。留返第二日,我又怕會引來小強啊!

Ellen said...

路過大阪之時,重有好多日先返香港喎!過期你要唔要呀? ^^

largeheadboy said...

ellen︰咁呀,淨係要 tiramisu 朱古力喇!幫我食多啲伊万里屋嘅腸仔呀!

lau2tang said...

我都好掛住伊万里屋嘅腸仔呀!

largeheadboy said...

我呢次真係有諗過專登搭程新幹線落大阪架!之前仲上網 check 過名古屋有冇伊万里屋添!:p

小彭 said...

大頭, 我鼓勵你晌名古屋搵D新野, 返咩去大阪呀, 要同番你D夢幻團友一齊再去先有意思架嘛! ^^

lau2tang said...

小彭講得好!
無夢幻團友同行,伊万里屋嘅腸仔一定無咁好食~

Ellen said...

所以聽晚老師應該唔去伊万里屋食腸仔~~~ ^^

largeheadboy said...

小彭︰咁名古屋除咗鰻魚飯仲有乜好介紹呀?(你應該知道我食量架喇!)^_^
大阪,就下次喇!

劉鄧︰年尾喇年尾喇,希望成團喇!不過依家至係三月……

ellen︰對,嗰次去伊万里屋真係好正,再加埋第二次再去碰上沒有開門,令我地對佢印象特別深。聽晚在大阪要食好啲呀!

小彭 said...

同一個道理, 雖然我好鐘意福岡, 都唔會飛撲去個度!

如果大頭一個人食晒個hitsumabushi, 我就讚你叻仔!

食過親子丼未呀, 再去名古屋的話, 我會再食多一次. 同埋以你實力, 可以分散投資, 對自己好d, 食多幾餐啦!

largeheadboy said...

小彭︰係喇,你應該知道我嘅實力去到邊,所以鰻魚飯對我應該係零難度,擔心嘅可能就係太多人等位。
親子丼又係名古屋名物呀?又係飽肚嘢喎!
我呢期都好鐘意福岡……嘅草莓!