Wednesday, March 05, 2008

1,225 分鐘

今天下班後到唱片店逛了一會,一口氣買了三套 dvd 回家。

九零年代初紅極一時的組合 Take That 在年多前重組,雖然沒有了 Robbie Williams ,但聲勢依然,單曲 Patience 和 Shine 都上過冠軍。除了唱片大賣之外,巡迴演唱會也叫好叫座。這張剛在二月底推出的演唱會 dvd 更是賣個滿堂紅,一個星期內在英國就賣出超過 64,000 張,成為英國有史以來銷售速度最快的音樂 dvd 。



《老友記》(Friends) 以前在電視上播放時一直都有追看,不過相信沒有多少人每個星期日晚都可以安坐電視機前觀看,所以之後就買 dvd 回來慢慢重溫。最初幾輯買的都是數百塊的正版貨,很肉痛,後來把心一橫,鋌而走險北上買些 A 貨回來。一分錢一分貨, A 貨始終是 A 貨,質素沒有保證,看到第八輯就沒有興趣看下去,最後連大結局也沒有看。這天看到新版以低價促銷,就即時先把最後一季買下來。



這齣卡通身邊每個看過的人都讚不絕口,一面看一面捧着肚子笑,早陣子貪便宜,花了一百塊買了 A 貨回家。不聽老人言,結果再一次吃虧在人前。 A 貨是電視偷錄版,除了經常沒有聲音和影像聲音不同步之外,很多時候播來播去都是同一集。這天終於掏腰包買下正版,以後就可以安安心心攤在沙發上盡情爆笑一餐了!



回到家裏翻看舊照,原來多年前我曾探訪過花師奶一家。



三套 dvd 12 隻碟合共 1,225 分鐘,究竟實際要花上多少時間才能夠全部看完呢?

30 comments:

Ellen said...

花師奶1晚就睇完啦~~

largeheadboy said...

點可能一晚睇得晒呀!況且我每次只可以睇三兩集,因為唔想太快睇完啊。

LaLa said...

Youtube都有得睇啦 ......

largeheadboy said...

lala︰我都知 youtube 有得睇,但係我呢啲上世紀嘅人慣咗乜嘢都要電視睇架嘛!^u^

小彭 said...

連A貨都慳番唔買啦! 我仲係未有耐性睇晒花師奶, 要等下一個長假期.

naruto said...

花師拉。。。真有品味
我鍾意細佬,成家入面較正常嗰個

galaxy said...

以前Take That好似係四個人, 沒有了Robbie Williams, Video內仍然有四個人, 有新組員 ? 嘩.....佢地而家好有佬味, 尤其是肥仔Gary barlow現在無哂Baby fat, 仲型過以前。

光.軍 said...

你買o既係第一輯定第二輯嚟架?

supageti said...

Friends 開頭有睇,睇睇下覺得唔好睇就唔睇。

花師奶 Box 2 仲係原封不動,唔知幾時至會睇,其實一個 weekend 已經可以睇晒。

做咩扮花老爺?多年前唔靚仔牙?

Ellen said...

花師奶 Box 2 仲係原封不動,咁我點算好呀~~

largeheadboy said...

小彭︰復活節眨吓眼就到架喇!
我真係覺得花師奶好掂,好多生活細節同我地好相似,所以睇得份外投入。

naruto︰呀細佬好型仔,早兩晚睇咗一集話佢偷偷地煮宵夜,本來一切都有條有理,點知就畀呀柑搞亂晒,搞到佢好唔開心。嘩,型得佢吖!
依家我都識得畫呀桔,原來佢好易畫。^p^

galaxy︰唔係呀,take that 一開始就有五個,之後 robbie williams 走咗就一直得番四個呀。係喇,我都覺得 gary barlow 越嚟越型,不過佢地真係老咗好多。

光.軍︰我尋日買嘅係第一輯 box 2,因為我估之前買的 A 貨係 box 1。係喎,我記得你都話過好鍾意花師奶個喎!

意粉︰friends 開頭真係好好睇,不過之後都唔差吖,都仲好搞笑呀。今晚又買埋 season 8 同 9,有排煲。
依家仲唔煲花師奶,咪要等到四月?
張相成四年前,嗰陣時 x x 歲卜卜脆,費事畀人地話我依家殘得咁快喇!^t^

ellen︰你又跟我隊囉,不過應承唔到幾時畀到你喎。話時話,你都就飛喇!

小妹 said...

睇完你地寫,我又好想看花師奶.

LaLa said...

有冇好心人可以精選幾集推介比大家開心吓?

largeheadboy said...

小妹︰上 youtube 喇,齊到我都唔信,真係駛乜買 A 貨!

lala︰啱啱睇完呢兩集講阿柑跟同學仔去野外,笑到我吖!http://www.youtube.com/watch?v=_IUHwQzAtcc&feature=related
http://www.youtube.com/watch?v=VkzrLgkaimw

supageti said...

四年前卜卜脆?好笑過花師奶!

maymay said...

卜卜脆?係咪講梗你d骨頭呀~ ^o^

真係鍾意你的風趣,睇你個blog令我開心不少,多謝!

小彭 said...

有日晌人地屋企睇左集花師奶同花老爺去旅行, 又新幹線又自駕遊, 我睇到好投入! 不過, 我唔知得係邊集.

Ellen said...

花師奶【別怪他】先最爆笑啦!TVB駛唔駛咁呀!

Ellen said...

係花師奶唱【別怪他】

supageti said...

我覺得花老爺花師奶揸車想去富士山,搞唔掂啱啱裝既 GPS 果集都好有共鳴,哈哈。

LaLa said...

TVB成日唔係”別怪他”就係”賣飛佛”,吳唱K真係有排玩!

頭先睇完賭聖(冇以前咁好笑o忝,仲訓著左),o聽日北上,星期日先睇花師奶.

largeheadboy said...

意粉︰四年前吖嘛,最衰嗰陣未識你,如果唔係你都驚為天人呀,哈哈!^D^

maymay︰骨頭係“岳岳”脆架,我就係卜卜脆囉,有分別架!
你睇得開心就好喇,其實我地身邊仲有美好嘅人和事(例如我 ^o^),所以唔好成人諗埋一邊呀!

小彭︰嗰集咪係意粉講嗰集囉,好似係好前吓架。佢地最後有冇去到富士山,唔記得咗 lu 。

ellen︰《別怪他》真係紅爆呀,雖然我好似沒有聽過吳唱 K 唱。^p^

lala︰咦,係喎,賣飛佛都係吳唱 K 個喎!
《賭聖》好好笑架?我好似冇睇過,連電視重播都冇翻睇。
你就好喇,北上尋歡,玩得開心啲呀!^d^

supageti said...

(托眼鏡)一定會驚囉,呵呵 ~

貝拉 said...

我姪仔成日都話我們這一家的卡通片好好笑, 最近聽身邊既大人都看這片,看來我都要買來看看.

光.軍 said...

係呀!花師奶做o既嘢你真係"估佢唔到".實在生鬼呀。我們這一家有兩輯o架喎。

largeheadboy said...

意粉︰所以咪係要搵花老爺遮住我副尊容囉,hehe!

貝拉︰強烈推介呀我都!一係上 youtube 試睇一下啱心水先買!^e^

光.軍︰花師奶為咗慳垃圾袋將所有垃圾擠入垃圾袋嗰集都笑到我傻!^t^
依家係咪只出咗第一輯 box 1 同 2 咋?有第二輯嗱?

光.軍 said...

曾經見過"WideX"有第二輯。

largeheadboy said...

WideX 是什麼東東來的?
晚上打開第一輯 box 2 看,原來很多 A 貨已經包括在內。>_<

光.軍 said...

WideSight是也。乜咁慘呀..

largeheadboy said...

噢,係喎!
咦,咁搵日去瞄瞄先!