Monday, January 19, 2009

the longest night

星期日,在感冒、疲倦和藥力影響下,睡了差不多十二個小時,到了中午過後才起床。睡了這麼多,人也自然精神煥發起來。不過,到了現在我才知道,那十二個小時充足的睡眠原來並不是為了補償我之前嚴重的睡眠不足,而是讓我有精力應付隨後的廿多個小時。

昨天晚上看了一場很震撼的演唱會,百多分鐘我的耳朵不停被強勁的節拍轟炸。就站在揚聲器不遠處的我,老實說,到了現在雖然經過了接近二十四個小時,我的左耳還感到一陣陣耳鳴。


演唱會完結後,再吃過一杯雪糕,回到家裏已經接近十一時。然後不知道忙了些什麼,躺在睡床上不知不覺原來已經是凌晨一時。

我想是做了三兩個好夢吧,睡了四個多小時,就被世界上最恐怖的午夜鈴聲吵醒,原來是爸爸來電。於是,我就在天還是漆黑一片的時候趕回娘家去,然後在確定媽媽沒有什麼大礙後又趕回家裏更衣準備上班。忙亂中,我忘記了刮去蓄了幾天的鬍子,回到公司還給同事取笑我滿像生意失敗的樣子。


這一刻,我又回到家裏了,我現在最想要的,就好好的睡一覺,有沒有十二個小時也不緊要。

18 comments:

rempei said...

我發覺你D口味有時都幾鬼佬!!!

BTW,好返未呀?

歐巴桑 said...

伯母沒事吧?
年頭的幾個月都是長者最容易生病的日子
你們都要保重呀

maymay said...

好在你住得咁近娘家咋,伯母依家冇事就好啦~
我都好驚半夜電話响架,通常都冇好野!

Ellen老師 said...

點解病都可以周街去,周圍食野?

大頭媽保重呀!

supageti said...

嚴重睡眠不足?會唔會呀?

父母親年紀越老大,午夜鈴聲就越恐怖 ~~

祝大頭媽早日康復。^^

largeheadboy said...

謝謝大家有心~

薯嘜︰咁其餘時間我啲口味係點嘅呢?^t^
其實個演唱會係陪朋友去架咋,呢啲音樂雖然幾好 feel,不過就嘈咗啲囉~

歐巴桑︰媽媽呢排骨痛,已經睇過醫生,咁尋日朝佢又痛,爸爸就好心急打電話畀我,我去到佢地度見媽媽其實沒有太大問題坐多一陣就走。係呀,呢排真係好多人病啊。大家都要好好照顧自己和身邊的人~

maymay︰我地幾個多年來不停勸她好好照顧自己,但係佢成日都唔聽話~
我住得近都算幾好架,即使唔係呢樣,返屋企食飯都方便啲。
半夜電話,呢個係我其中一樣希望可以永遠消失的東西。

老師︰病都要出街食吓嘢架嘛,出下去晒下陽光病都會快啲好呀~ ^t^

意粉︰我呢啲年紀要瞓十幾個鐘至夠架,但係返工日子通常我十二點至瞓,第二朝六點幾就起身,梗唔夠瞓喇~
午夜鈴聲真係好恐怖,我一直忘記唔到年多前的那一個~

小彭 said...

恐怖電話唔分早午晚, 我到家下仲對一D人的來年有陰影, 未聽都驚定先.

roy said...

雖然我平日都訓到7,8個鐘,但都係覺得唔夠...

supageti said...

平時我只瞓得三四粒鐘,放假先可以瞓多啲吊下命 ~~ :p

largeheadboy said...

小彭︰真係,電話係恐怖嘅話,幾時打嚟都係恐怖嘅~

roy︰我咪又係,瞓極都唔夠,今朝鬧鐘響咗我都仲要瞓多半個鐘。

意粉︰三四個鐘點得架,有咁多嘢搞咩?第二日邊有精神架?我起碼要有六個鐘架~

maymay said...

我通常十點幾瞓,七點幾起身,如果瞓唔夠八、九個鐘就會好辛苦~

試過有個親戚借左大耳窿錢,"供"左我地個電話地址出黎,果時接到呢d電話就真係驚呀!

lau2tang said...

我都係豬托世,瞓唔夠八個鐘會發癲架~

largeheadboy said...

maymay︰有時好衰架,以為瞓得夠,但係依然好攰。我尋晚十一點瞓,今朝七點起身,諗住成八個鐘實夠喇,點知今日成日都好攰咁,都唔知點解。
大耳窿會鎖鐵閘放狗架,你呢個親戚真係唔話得~

劉鄧︰八個鐘睡眠對我嚟講超級奢侈啊!今晚我一定冇七個鐘~

光.軍 said...

黑夜大步走換來『無事』 都算係一件好事啊 :) 祝有"一打"鐘的睡眠 ;P

supageti said...

六個鐘對我黎講係最正路,但係正常情況下係 mission impossible。

細個果陣我都好早瞓,無得睇歡樂今宵嫁,直至讀商科果年因為多功課無得早瞓,又要五點幾就起身過海番學,開始瞓得好少,其實我好瞓得(最高記錄係連續瞓左一日兩夜),只係自己唔願瞓啫,因為我鍾意夜晚既寧靜,又可以專心做野,效率都高好多。

舊年生日果日我叫 husband 由得我瞓,結果瞓到下晝三點幾至起身。

largeheadboy said...

光.軍︰嚟緊新年幾日假,希望日日都有一打喇~ ^t^

意粉︰夜晚的確做嘢可以專心啲,但係一過十二點我啲精力就直線下降,唔可以捱得好耐,況且我係個好鐘意瞓覺嘅人,所以盡量要自己一點前瞓,唔係第二日好辛苦架~
歡樂今宵?我細個都有睇架!^t^

supageti said...

我瞓得多個人會好頹 ....

邊個唔鍾意瞓覺吖,尤其是天寒地凍果陣 ~~~

largeheadboy said...

意粉︰我今朝又瞓到十一點幾呀,好彩唔駛一早攞嘢畀你啫~ ^t^