Friday, May 15, 2009

多一點生活

有選擇的話,我會坐巴士而不坐地鐵。現在除了坐巴士上班外,下班後我大多只會坐一個站地鐵到尖沙咀,然後轉乘巴士回家。雖然時間用多了,但感覺就好得多。


對地鐵越來越沒有好感。地鐵太擠人太多,我總覺得站內的空調很不足夠,在密不透風的月台等車,絕對可以感受到空氣是沒有流動的。幸好近日在豬流感的陰影下,地鐵才肯“改善車站通風”,稍微把月台和車廂的空調加大。

這幾年拉着行李或推着嬰兒車的乘客多了不少,但很多地鐵站仍舊只有一部闊閘機供這些乘客使用。要是我拉着很大件的行李,眼見出口就在前面,我應該要冒着被卡住的風險很狼狽的把行李從閘口運出來,還是拐個大圈去找那部闊閘機呢?

為了“改善站內設施”,地鐵不斷在站內開設商店,又把入閘機和出閘機搬前搬後,好讓每位乘客都可以經過一間又一間餅店和便利店,很多時乘客被逼走了不少冤枉路。當然,通道同時也變得越來越狹窄。或者這就是地鐵一直所宣傳的“多一點時間多一點生活”吧。

今天報紙報道一名女子乘地鐵時感到不適,送院搶救無效死亡,初步懷疑是突發性心臟病。心臟科醫生說,患有隱性心臟病的人可以在毫無徵兆下,在很短時間內病發死亡,所以建議商場和地鐵站這些人多的地方應設置自動體外心臟除顫器 AED,在救命的黃金時間內保住病人的性命。可是我們的地鐵卻說目前沒有計劃在站內增設 AED,只推搪說有需要時職員會提供協助。


地鐵每年賺大錢,又變身地產商搞住宅搞商場,不但沒有做好本份改善乘客的服務,還像個守財奴事事算盡。我寧願多花一點時間,好讓自己多一點生活。

15 comments:

Ellen老師 said...

好耐無搭地鐵~~

lau2tang said...

我同你剛好相反!
自從有了西鐵,我就無乜機會搭巴士,因為西鐵班次密唔塞車,等車時,又唔使係路面食塵~

supageti said...

雖然揸住股票,但如非必要我都唔會搭地鐵。

supageti said...

btw, 架巴士既方向唔係去你屋企喎 ~~

largeheadboy said...

老師︰弊在依家火車都變埋地鐵哩~
我今日收工搭咗地鐵去觀塘,市區長程的話仍是要搭佢~

劉鄧︰鐵路始終有佢嘅好處嘅,不過有得揀我都係鐘意搭巴士,有風景睇同埋有位坐,朝早喺車上面可以瞓多幾個字。
聽日都係搭西鐵出嚟啊呵?:p

largeheadboy said...

意粉︰你好心水清喎!
所以我每日都寧願早幾個字出門口搭巴士唔搭地鐵返工。搭地鐵感覺太趕急,搞到個人不自覺地煩燥起來。

光.軍 said...

時間許可的話.情願選擇巴士.沿途一路有景.有位的話又唔駛罰企一程車(地鐵十次有十次都要罰企..)。淨睇巴士的人生百態都值回票價啊 ;P

largeheadboy said...

光.軍︰有時唔趕時間,搭巴士可以係一種樂趣。搭地鐵即使有位坐,總是會遇上需要讓座的人,坐得唔舒服啊~

小彭 said...

尋日差d晌地鐵熱到中暑呀!
地鐵有一樣野好呀, 就係有得"do"兩蚊! 如果我晌tst同tw, 幾唔順路我都"do"左先搭... 你邊有機會晌地鐵手中拎到$2呀!

歐巴桑 said...

從前住港島區的時候比較多乘地鐵
現在就乘巴士為主
一來公司不在港鐵沿線
二來那大半小時的補眠時間真係好重要^o^

largeheadboy said...

小彭︰行上行落又要同人逼唔熱傻就怪啊!
我仲變態呀,明知唔會搭地鐵,但係經過都一定會 do 咗先,一陣如果突然要搭地鐵咪都有得平兩蚊囉!:p

歐巴桑︰巴士有時係好好嘅催眠工具,聽住歌涼住冷氣睇住街景可以好快就瞓得着。我成日都擔心有日唔知醒落唔切車就弊傢伙了~ ^t^

ROY said...

講起地鐵我都曾經係股東之一......
自從有b朗後,體會到地鐵/港鐵既設施某方面係極不足,如你所講既闊閘機,成個長沙灣站得一個咁大把不止,更試過撞正維修要抬部bb車過欄位!
仲有所有出入口都要行樓梯,最近我既出入口要行成幾十級樓梯先到大堂,對於我地要推住bb車或其他行動不便既人黎講係好大考驗!

rempei said...

我注意到日本的新幹線或長途列車上已經安裝了AED,香港又落後了~~

娜娜 said...

坐地鐵永遠係好冇人情味既體驗,唔讓座啦,嗌交啦,騷擾人啦,博懵啦,o的人好冇禮貌,又好冷漠.

呢間公司好似對公民教育冇乜貢獻,呀,佢係私人公司呀可?

我地唔知仲係唔係比緊個一毫子閘門費呢?

嘻嘻,你仲叫佢做地鐵!

largeheadboy said...

roy︰我最同情老人家同埋行動不便的人,要兜一個大圈經過晒啲人企晒喺門口嘅商店至入到閘,好陰功。

薯嘜︰日本有 AED 係基本嘅要求,連每間東橫 inn 都有添喇,香港仲成日話自己係什麼國際都會~

lala︰我唔鍾意港鐵個名,唔鍾意佢吞埋九鐵~
要數地鐵唔好真係有排數,例如票務站永遠得一個人,要同時應付閘內和閘外的乘客,我都“鄧”佢慘。請多一個人唔係要好多錢咋,我地每程嗰一毫子閘門費都有大把錢喇!