Sunday, February 03, 2008

我為橙狂

對於蒲慣街市、熟悉市場情報的一眾師奶來說,新奇士 4012 甜橙是橙中極品。它不單體積較大,橙味濃郁之餘也清甜多汁,更不會像十元八個的橙吃得滿咀都是渣。所以即使 4012 較一般橙昂貴,一直以來它都深受廣大師奶歡迎。



不過可惜的是,4012 似乎是季節限定的品種,每年只有在農曆新年前後才推出應市。每年這個時候,一眾識貨的師奶就會自動自覺長駐各大大小小超級市場,挑選一個又一個圓潤的 4012 。

這天晚上吃過飯後,跟花師奶走過超級市場,正好遇上百年難得一遇的 4012 新開箱。那一刻,花師奶就像着了魔一樣,一個箭步搶佔了有利位置,然後像其他眼裏只有 4012 的師奶一樣,拚命把剛從紙箱倒出來還很冰凍的 4012 掃到手推車上。轉眼間,手推車上全是大大個的 4012 。



花師奶一向要求奇高,稍有破損的橙都會被她擱在一旁。結果再經過一輪左挑右選,到收銀處付款時手推車上仍然有 48 個 4012 ,差不多是一整箱 4012 的數量。

雖然花師奶是女強人一名,但都不可能一口氣把 48 個 4012 抬回家去(雖然我會得到其中十個),於是這些 4012 現在就暫時寄居我的家裏。



連同之前我從不同渠道購入的 4012 ,現在我家裏的雪櫃就只有堆積如山的 4012 。

32 comments:

Anonymous said...

哦~有人囤積居奇!
咁4012幾時招股上市呀?

largeheadboy said...

小妹︰4012 真係有價有市呀!尋日一開箱,全部人就像蜜蜂“嬲”蜜糖一樣,眨吓眼新開箱的就被掃光了!所以我都入咗幾廿手呀!哈哈!

lau2tang said...

越甜嘅橙就越擺唔得耐,買咁多點食得哂呢!

supageti said...

橙中極品應是「三兄弟」,但似乎已絕跡江湖。新奇士橙己不復當年,有 d 買唔落手。

Ellen老師 said...

打風定「濟提」呀!
買咁多橙做咩呀~~聽日無得賣咩!

lau2tang said...

上我度拜年帶兩梳蕉得啦,唔駛買定咁多橙噃!

largeheadboy said...

劉鄧︰啲橙放在雪櫃可以放好耐架,我反而覺得仲甜啲添!:p
上你屋企拜年,一盒金莎和幾個橙又點少得呀!

意粉︰三兄弟冧吧係幾多呀?對我來說,4012 已經很好吃了!我已經好滿足了!

ellen︰我都唔知呀!搵日仲要將啲橙運返過去畀花師奶添!好重架陰功!

Ellen老師 said...

去劉鄧屋企,佢可能鐘意現金,多過金莎喎!

Anonymous said...

大頭師奶果然識貨, 4012應該食埋個2月啦! 過左農曆年都仲有大把現貨. 我睇住個生果市場架!

Anonymous said...

4012?聽都未聽過 >_<
咁多點食呀......

Anonymous said...

哈哈, 我都係專買4012的 ! 試過其他的真係無品質保証。

supageti said...

三兄弟(3 brothers)係另一品牌,唔係新奇士橙,以前都唔係成日有,近十幾年完全無見過。

Anonymous said...

阿媽仲沉迷緊買糕 ... 大橙仲未有動靜 ...... =_="

largeheadboy said...

ellen︰現金?咁我就要在麻雀枱上過畀佢喇!^t^

小彭︰哈哈,原來你都好了解呢個市場喎!今年 4012 個價好似低咗,經常有十蚊四個的吸引價啊!

roy︰橙你應該食啩?下次去超市/街市買嚟試吓喇!
我都唔知幾時雪櫃至有番空間放年糕呀蘿蔔糕呀!>_<

galaxy︰你地那邊都有 4012 嗎?其實間唔中 3107 都唔差架!^t^ 哈哈,啲人唔知真係以為我地講緊股票呀!

意粉︰三兄弟真係冇乜印象,反而朱古力的三兄弟就好鍾意喇!

lala︰“沉迷”買糕,究竟可以幾“沉迷”呢?
我尋晚都一心走去買糕呀!不過買唔到呀!>_<

Anonymous said...

講開買糕, 八珍的蘿蔔糕唔錯, 蘿蔔夠多又香, 有d自家製風味.

光.軍 said...

真係唔講都唔知橙都有"霖把"分喎 :s

supageti said...

今日係吉X島見到班阿嬋狂搶 4012,即刻 scan 下你響唔響裡面,呵呵 ~

Ellen老師 said...

在麻雀枱上過現金畀劉鄧,有無問過其他隊友呀~~ ^^

largeheadboy said...

小妹︰八珍出品應該都好好個呵?可惜每年都醒唔起呢家老店。睇完今期《飲食男女》話農圃的蘿蔔糕不錯,但原來依家訂最快年初一至有啊!

光.軍︰有架,4012 係大橙,3107 就係中 size ,9 字頭的就話係有機的,不過香港就冇得賣。哈哈,原來食橙都大有學問啊!

意粉︰點解唔即刻通知我呀?不過,我成日都唔夠啲阿嬋迫。^t^

ellen︰咁又係,可能係我收錢哩!^o^

Anonymous said...

大頭, 因為工作關係, 所以略知個市場動向. 不過今年我自己就無玩橙市場, 轉玩其他生果市場喇!

lau2tang said...

今晚去咗吉之島辦年貨,都見到有4012賣,便喺咁易執咗三個返來,又真喺好甜同無渣,肉質鬆化,不錯!明天有時間的話,我會再去入貨來送給奶奶。

Ellen老師 said...

你收錢....有無可能呀~~老友

supageti said...

我就買左幾個澳洲橙「宅」年,好甜,又平 ~ ^_^

largeheadboy said...

小彭︰咦,你知道 4012 去到月尾左右,真係行內人士喎!咁有冇貼士駛唔駛再大舉入貨呀?

劉鄧︰歡迎你加入這個 4012 的世界!再去入多啲貨喇!早幾日我都抽了幾個回娘家,媽媽都不知幾高興!

ellen︰喂,唔可以未開始就挫我銳氣喎!新正頭一定要嬴錢啊!^t^

意粉︰咁我咪有足夠數目“宅”到年尾囉!^t^

Ellen老師 said...

咁~~遊戲第1局比你嬴$先啦!

largeheadboy said...

食頭糊,輸甩 x 架!哈哈!

lau2tang said...

今朝我都花師奶上身,走去惠康同人搶4012,
諗起都好想笑!

Anonymous said...

頭先晌呢間超市見識到開箱嘅盛況, 即刻想起大頭!

劉鄧, 唔使搶, 你去o個間賣到過左年都有大把貨.

largeheadboy said...

劉鄧︰哈哈,你跟本就係花師奶喇!^t^

小彭︰你真係有啲嘢喎!咁點解我樓下間華潤啲 4012 咁唔得嘅?仲賣得貴過人添!

Anonymous said...

因為... 呢兩間會直接入貨, 又有冷凍倉, control得好d... 華潤... 我估, 唔係囉!

largeheadboy said...

華潤真係唔爭氣,想幫小妹儲多啲 momo 印花都唔得!>_<

lau2tang said...

哎呀!今日先見到小彭嘅留言添!
今個新年好充實!無乜點煮過飯,所以無乜點做過花師奶去超市搶4012。睇吓聽日有無時間去先