Friday, July 02, 2010

紅磡地圖

轉眼就是兩個月,今天是我充當紅磡街坊的最後一天,明天開始我就會回復我的原來身分。這兩個月,沒有好好探索這裏,每天總是早出晚歸、風塵僕僕。不過,總有些地方留下了不少我的腳毛。

紅都軒


之前坐車已經發現這家服務式住宅,沒想過有朝一日竟然會在這裏暫住起來。沒有電梯、電視只有四個選台、兩個星期才打掃一次我都沒有什麼投訴,只是這裏位處大馬路旁,噪音之大實在叫人很難適應,逼不得已唯有經常開着冷氣,但可惡的是電費是額外支付的。早前咳了個多月久久沒有痊癒,我也會歸咎這裏的空氣質素有點問題。不過話說回頭,這裏交通實在方便,門口就是巴士站,上班花半個小時就可以了。

皇后洗衣店
沒有洗衣機,過去兩個月辛勤替我洗衣服的就是這家洗衣店。負責看舖的大嬸外表冷淡,但其實內裏是個大好人。謝謝大嬸你把我污糟的衣服清洗乾淨然後摺得貼貼服服,只是下次有機會再找你洗衣服的話,請不要下那麼多衣物柔順劑,另外也要替我找回那一只東横イン的絕版黑色襪子啊!

泰亞萊

初來報到我是飯堂是這家泰國小館,除了價錢合理之外食物也算不錯。我最愛的就是香茅雞翼,一碟八隻才賣廿八大洋。只是後來發現雞翼並非即叫即製而是微波爐番叮貨色,再加上店子的衞生環境不甚理想,沒多久就給我遺棄了。

漁樂軒

作為紅磡街坊這兩個月的我光顧得最多次數的應該就是這家吃粉麵的店子。我很記得每天下班後就要立即跑回舊居趁師傅還沒有離去好讓我能夠了解裝修進度的那段黑暗日子,當我拖着疲倦身軀返回中轉屋之前,我就會走進這家店子簡簡單單吃一碗水餃魚片頭米粉。

雖然回憶不盡是美好的,但我想離開之後我間中還是會想起這兩個月的紅磡生活。

14 comments:

Rempei said...

恭喜你終於從新做人喇!

歐巴桑 said...

好咯...終於捱過啦
話咁快就過咗兩個月呢

小彭 said...

無緣啦~
多謝舊街坊教曉我過馬路囉!~

naruto said...

你D相乜事呀?

lau2tang said...

link咗google map,hang哂機!
惟有貼貼服服地慢慢等再load 過啦~
p.s. 你寫呢篇文章時,一定係好攰喇!

maymay said...

中轉屋對我黎講:
不想回憶,好想忘記!

小頭 said...

恭喜新(裝修)屋入伙,有無請多一日假四連休執屋洗滌呢?

搬番去就身體健康諸事順利架啦。

咁你臨走仲有無去食多次椒鹽鮮魷?

紅米奇 said...

臨時屋確實住得唔爽, 唔睇晒成篇的話, 單睇尾果張影左"護老中心"......哈哈

supageti said...

可喜可賀啊!:)

largeheadboy said...

薯嘜︰今日開始人生又充滿返希望喇~

歐巴桑︰呢兩個月話難過又唔係,不過就絕對唔可以話易過,依家終於返番自己屋企,感覺好溫暖啊!

小彭︰我耐不耐都會去吓紅磡架之後都~
唔,打斜線我都係喺渋谷度學返嚟架咋!

naruto︰我都發覺 google map 啲圖 load 得有啲問題,試下右 click 佢就會出到嚟架喇,或者我直頭 cap 張圖落嚟算喇~

劉鄧︰真係 load 得好慢啊呵~
寫錯字呀我又,係“貼服”呀?等我改返先!
話時話,呢篇尋晚都寫咗我個幾鐘。

maymay︰咁都係叫做一種體驗,沒有這個我地又點會咁珍惜我地嘅安樂窩呢?

小頭︰細細聲講你知,我呢個禮拜返咗半日工咋,之外日日都陪住師傅食飯同埋開工。
椒鹽鮮魷要預埋街坊至可以食架咁高膽固醇~

紅米奇︰中轉屋始終唔係自己地方,乜都冇地方又細,依家返番屋企就算仲未執好野亂七八糟都覺得舒服得多。
護老中心樓下就係間麵店,我依家睇返至知原來樓上係護老中心~

意粉︰今晚仲有六呎三新床瞓添呀,可能會爽到瞓唔着!

supageti said...

今天開始做宅男啦咁!:p

largeheadboy said...

意粉︰宅男過多幾個禮拜先做喇,屋企仲有好多野要添置,今日就不停的買買買~

Ahming said...

大頭哥,幾時擺入伙酒?
我雖然窮,都會做人情......

largeheadboy said...

ah ming︰我都唔知幾時擺得入伙酒,仲有野未執好,我自己都未煮過野食呀,嗚~~~