Monday, January 17, 2011

庶民生活

踏進新一年,越來越感到通脹的壓力,什麼都在不知不覺中加了價。個多星期前,自以為很豪氣地把今年要繳納的稅款一次過付清,紅簿仔內的結餘即時創下近月新低,心靈感覺異常空虛。沒有開源的方法,唯有從節流方面着手吧!幸好這個時候給我發現了土瓜灣。


上星期偶然經過土瓜灣一個水果攤檔,看見新奇士橙十蚊六個,正想慢慢挑選之際,阿姐說廿蚊十六個,不過就不可以自己挑。我沒有所謂,就由得呀姐任執吧。回到家裏一試,覺得這些 4013 甜橙味道不錯,性價比蠻高。這天下班後又跑到土瓜灣,雖然這次廿蚊只有十五個,但我還是覺得很超值。


土瓜灣可說是繼深水埗之後另一個我愛上的庶民美食天堂,除了德昌魚旦粉和早兩個星期開始什麼都加了一蚊的香港腸粉皇之外,近來光顧得最多的要算是新富盈四川麻辣米線


北帝街上有多家吃米線的小店,但這家沒有怎樣裝修的永遠都高朋滿座,生意好得還要在附近開了分店。之前吃過有很多蔬菜感覺很健康的湯飯,這晚就點了他們的老本行雲南米線。雞肉魚腩鮮腐竹三種自選材料的米線才賣 $29,在這個氣溫只有十二三度的晚上,叫人感到份外溫暖。


現在全港十八區都必定有的貢茶當然也有在土瓜灣插旗,不過這裏的生意似乎比不上其他地方的分店,這個第二杯半價的優惠就一而再再而三地延期,之前已經從原來到一月七日為止改到一月十四日,現在還索性改到直至另行通知,這可教我繼續省下十元八塊了。


經過有珈琲王子陳豪推介的歌劇院餅店,忍不住買了日式芝士蛋糕和買五送一的迷你芝士蛋糕,合計比前一晚買的兩小件 Paul Lafayet 還要便宜。他們的日式芝士蛋糕輕盈鬆軟,雖然不可與大阪的 Rikuro's 同日而語,但一次過把它幹掉也毫無難度啊!


坐車回家前買了平一蚊的周刊,精神食糧也給照顧到了。

26 comments:

灣仔之友 said...

灣仔春園街頭檔報紙檔, 雜誌都係平一蚊, 紙巾照有架!

紅磡街坊 said...

搬去土爪灣啦, 遲d仲有鐵路, 仲唔快d入番三五七個單位啦!

L L said...

咦,點解你哩篇冇同步浮上 blog list 頂嘅?

我也曾經喺土瓜灣工作咗六年,但廿幾年前 lu,嗰時冇咁多好嘢食!

largeheadboy said...

灣仔之友︰唔,星期四出嗰本,我會去銅鑼灣教協買,平三蚊,仲可以順便睇吓啲電器行程。星期五出嗰本,最新發現有一度平兩蚊,都係喺土瓜灣~

紅磡之友︰啲錢交晒稅,仲邊有咁多錢買三五七個單位喎,就買一個何文田半山一號複式算喇,哈哈!

laulong︰噢,呢篇我禮拜五開始寫,之後太凍停咗工冬眠,今日寫埋佢先 post,然後唔記得改返個日子。我好唔鐘意依家呢篇嗰條 link 寫咗 14 號呀!
雖然廿幾年嚟嘅土瓜灣一定變咗好多,不過我相信佢比好多區仲 keep 到幾多野,遲下起咗地鐵就唔係咁講。土瓜灣我覺得仲好過深水埗,至少喺食嘅方面,人唔係咁多又無咁雜。

l.minor said...

米線我最鐘意去譚仔吃,唔知你講果個有冇佢咁好味呢?

ayclui said...

土瓜灣聽落都OK 喎...無地鐵到嘅地方好似物價會平D, 我喺屋企隔離遠D嘅藥房(行20分鐘啦)買0野每件平5-6蚊o架...一次過買慳到2個下午茶餐呀~

歐巴桑 said...

想起交稅就覺得頹啦~
屋企附近的幾間便利店迫死一眾報紙檔後便立刻收回正價兼沒紙巾送咯...

supageti said...

唔係啩?一個星期食 16 個橙?@@

largeheadboy said...

l.minor︰譚仔我反而只係食過一次,無乜印象。深水埗另一間叫雲南風味就耐唔耐有去,我覺得呢間好好味啊,個湯底又清感覺無味精。

ayclui︰真呀,地鐵周邊依家好似變晒豪宅區咁,乜都貴咗好多,小店又買少見少,都係呢啲舊區有味道啲。
行廿分鐘就當行下街,有時排超市畀錢都要十分鐘啊~

歐巴桑︰仲未交稅呀?我每年都例遲,今年仲早咗一日交添。好空虛呵?
唉,咁霸道都有嘅,都係要幫襯多啲報攤先。不過話時話,有時啲報攤又幾阻街~

意粉︰之後仲有 15 個哩!咁啲橙好細個之嘛,一次食兩個架有時~ ^t^

lau2tang said...

老爺以前開的車房,就在土瓜灣。一個我時常在閒話家常時聽到的地方,但又從未去過,想起都有趣!

supageti said...

嘩 ~~ 竟然從來未去過土瓜灣?

除左特別路途崎嶇既離島,香港我都好似無乜邊區未去過。

卡臣 said...

我間唔中都去土瓜灣,去牛棚吖嘛。

小頭 said...

遲交稅...唔係會罰款咩?

我都係一次過交哂,橫豎放在銀行都無利息,陣間唔說得交損失仲大!

largeheadboy said...

劉鄧︰竟然從來未去過土瓜灣?x 2
去吓喇,等過幾年地鐵通咗車之後~

意粉︰十八區都應該實去晒喇我諗大多數人,尤其係香港咁細。去過長洲大嶼山就叫做去埋離島區架喇。

卡臣︰我未入過牛棚。其實係咪人人都可以就咁行入去?同埋入面真係有人搞藝術架?

小頭︰我年年都遲交一兩個禮拜,有時仲會就番啲信用卡截數日,無事架,唔會罰架,當然無人叫你遲幾個禮拜喇!不過小朋友唔好隨便學呀~
係喇,費事到時唔記得喇,又唔係交得多啊呵~ :p

maymay said...

我都响好艱難蒲左十一年架以前~~

largeheadboy said...

maymay︰又多個地膽喎!咁當年嘅日子係咪好艱難呀?

TY said...

土瓜灣對我黎講只係有工聯會.. 次次放工由灣仔搭巴士去都要成粒鐘! 乜原來有咁多平野食.. 下次有機會行下先...

卡臣 said...

人人可以入牛棚參觀,入面真有藝術家。

largeheadboy said...

TY︰土瓜灣仲有牛棚煤氣鼓宋皇台公園,反而我就仲未入過工聯會。
喺灣仔搭車落嚟真係幾沮喪,我尋日就搭船轉巴士,避咗紅隧,有當區居民就話地鐵轉小巴~

卡臣︰不過我唔熟地步,都係唔好隨便入去探險。

lau2tang said...

一直無去過土瓜灣,係因為無需要去的動機。

maymay said...

當年係我最唔艱難嘅日子,人工又高,好懷念啊~~

largeheadboy said...

劉鄧︰咁又係,無端端去嚟做乜,我都係因為要去買橙先至去土瓜灣~

maymay︰咁得閒要去土瓜灣兜返轉旺一旺都好啊!:p

maymay said...

版面張相好靚啊~^^

largeheadboy said...

maymay︰版頭張相係喺奈良法隆寺影,我都好鐘意。背景嗰張就係舊年去草津玩雪兜。唉,又好想去日本啊!

lau2tang said...

國泰又畀機會你飛喇~
$2550凌晨機添呀~

largeheadboy said...

劉鄧︰唉,弊在嗰段時間係工作高峰期,應該唔會放假囉。希望暑假前仲有優惠喇~