Monday, February 07, 2011

緣分

弟弟和弟婦在農曆新年假期回鄉省親,這幾天我和二姐就輪流走上他們的家照顧巴斯。沒見一排,巴斯還是這樣英俊靚仔。


巴斯曾經在我家寄居了將近一年,我跟牠理應很熟絡,可是現在我連碰一碰牠,掃一掃牠的背也不夠膽,因為這隨時會惹來血光之災。新年流流,我可不想見紅啊!

我始終不太知道為什麼我跟巴斯這樣合不來,或者我和牠之間就是欠缺了一點點緣分吧。當年我照顧牠的起居飲食大小二便,牠悶了走過來我會逗牠玩,但牠可以在毫無徵兆下突然伸出利爪,在我完全沒有防備下在我的手、腳、肚腩上劃過一條又一條血痕。我身體其他部位被噬過的傷痕,更是不勝其數。


最深印象的一次,我坐在梳化上看電視,而牠就睡在我旁邊,大家相安無事。誰知牠忽然發了什麼神經,在我肚皮上抓出一條血痕就施施然溜走,剩下我一個人哭了出來。我問自己,為什麼我對你這樣好你卻如此這般對我,無緣無故咬我一口,是我寵壞了你還是由始至終你都沒有領過我的情?

從此以後,我絕少主動逗牠玩,我會如常照顧牠,但一切都點到即止。我學會保護自己,不再容易讓自己受到傷害。

我不會怪巴斯,因為巴斯始終是一隻貓,沒有我們的智慧,所以我現在仍然很疼愛牠,見到牠我還是會不停喚牠的名字;牠走過來用頭輕輕撞我的腳我會感到很開心,只是我知道牠的脾性,不會隨便主動親近牠。


換了是人,我才不會再浪費我的精神。

33 comments:

supageti said...

貓貓就係養唔熟既 ~~ 有個舊同事成家都係貓痴,屋企養左好多貓貓,但佢雙手係花晒囉 ~~~~

supageti said...

其實可唔可以幫佢修吓甲既呢?

largeheadboy said...

意粉︰我覺得巴斯睇人嚟恰囉,我同二家姐就一定畀佢咬,但係細佬同老婆就治得佢掂。你都唔知呀,我成日驚佢失驚無神撲過嚟偷襲你架~
有同佢修甲架,雖然佢都好唔願意,如果唔係畀佢抓傷就仲大件事。

L L said...

貓同人一樣,都有不同的性格,你摸熟了牠的脾性,小心一點就是了。

Ellen老師 said...

除了吉蒂....我就是不喜歡....ねこ

ayclui said...

好一隻cool巴斯, 有D似加菲貓~ ^^
我以前隻貓都會咬我同蝦子餅, 不過知佢係玩, 因為佢咬係唔大力同唔會fing, 所以淨係有個窿咁, 唔會見紅嘅~

歐巴桑 said...

巴斯一定係唔抵得帥哥靚仔過佢喇^^
娘家從前都有養貓
最得我們歡心的那隻是自來的
牠好像跟我們特別有緣呢

maymay said...

巴斯幾多歲?

galaxy said...

係你寵壞了佢。
我隻波子都係咁樣, 不過佢唔敢爪/牙我, 佢知佢的後果會好嚴重 !
其實巴斯可能只想被摸一兩下, 第三下就唔喜歡。

largeheadboy said...

laulong︰我諗巴斯都摸熟咗我脾性,知道我越怕佢,佢就越係恰我,通常人先至會咁架嘛~

老師︰咁招財貓同埋加菲貓又鍾唔鐘意呢?

ayclui︰係真係好 cool 啊!如果佢同我玩我無任歡迎啊,但係巴斯吓吓噬埋嚟搞到遍體鱗傷真係唔係講笑啊~

歐巴桑︰咦,係喎,呢個原因我完全無諗過添,咁唔怪得知喇,又唔怪得佢嘅~:p
嗰隻自來貓仲喺度嗎?自來狗就成日聽到,自來貓真係少有啲喎。
其實我鍾意貓多過狗架~

maymay︰巴斯今年十歲大壽喇,老貓嚟架喇,不過火氣仲好猛。

galaxy︰我當時有鬧佢架,關佢喺廚房唔畀佢出嚟,但係轉頭又兇返我架喇。
係呀,我都覺得摸佢一兩下佢都 ok,再摸多一兩下佢就會唔高興開始發惡。不過最衰係佢會無情情偷襲你囉。唉,貓仲惡過主人要睇佢面色啊~

naruto said...

我見朋友D貓,越老脾氣越古怪;
比我實唔會比面佢架,養佢仲要比佢烚,佢未死過

supageti said...

我以前好怕貓,可能因為細個寄居姑媽屋企時佢隻貓好得人驚,有童年陰影,但年紀大左,又識到好多可愛既貓貓,覺得佢地都唔係咁可怕,等我退休之後除左魚仔同狗仔,應該都會養埋貓仔。^^

卡臣 said...

貓唔高竇就唔係貓

largeheadboy said...

naruto︰弊在巴斯呢隻貓後生時脾氣仲差哩~
可以點喎畀佢烚,唔通一野車埋去咩。當年關住佢喺廚房已經叫到拆天好可憐咁。

意粉︰貓貓好靚好可愛架如果乖嘅話我覺得,遲下得閒你真係養吖,不過到時會仲困身啊!

卡臣︰又有道理喎,正如狗唔跟尾就唔係狗~

lau2tang said...

我朋友話佢屋企隻貓都好精靈架,有時玩起上黎都係抓到個主人手損腳損,佢試過拎住枝籐條作勢打牠,隻貓居然知道主人發惡,頭耷耷躲係枱底。帥哥,可能係你唔夠惡咋啩。

l.minor said...

第一張相你影佢,佢都好似有d唔like咁,想衝過來咬你咁

我對於小動物,其實又愛又恨,見佢地可愛時就想摸下佢地,有時見佢地玩得太癲,就有d怕佢地失去理智咬我~

supageti said...

所以要等退休囉 ~~~ :P

largeheadboy said...

劉鄧︰係喇,我諗我個人太良善喇,下次再畀巴斯咬一定要剷到佢上天花板~ :p

l.minor︰佢張張相都想衝埋嚟呀,我係冒住生命危險拍架!
係呀,唔單止係貓貓狗狗,對任何野都要適可而止,一 over 咗就唔再好玩。

意粉︰咁希望你中六合彩喇!^t^

歐巴桑 said...

隻自來貓已經是很多年前的事啦
本來外婆覺得自來貓不吉利不想養
豈料牠無論怎趕也不願離開
還像狗狗般懂得討人歡心
所以牠走的時候我們都很捨不得呢

largeheadboy said...

歐巴桑︰雖然係畜牲,但係佢地都好有性啊,所以雖然我喺度猛講巴斯壞話,但實質我都好錫佢架~

supageti said...

咁小事唔駛等中六合彩啩?

largeheadboy said...

意粉︰我要中六合彩仲要係幾期無人中嘅金多寶至有望退休啊~

lau2tang said...

Happy birthday ~

largeheadboy said...

劉鄧:謝謝!

lala said...

生日快樂!

supageti said...

帥哥:你係行家,都唔輸蝕吖,哈哈 ~~~

largeheadboy said...

lala︰謝謝!好耐無見啊!

意粉︰所以呢日係大日子嚟架,日本都係假期添呀!:p

Anonymous said...

靚仔卻總是拒人千里呢!蘭子

largeheadboy said...

蘭子︰你係話我定巴斯靚仔呢?:p
好耐無見喇,一切安好嗎?

瘋膏 said...

唔好意思,我遲咗, 你好慘呀, 巴斯咁對你, 可能佢脾氣臭又遇着你腍善啦, 所以被欺負。

largeheadboy said...

瘋go︰佢真係養唔熟架,曾經住埋一齊咁耐都咁惡對我,不過佢少爺脾氣,唔怪佢喇~

Anonymous said...

抽巴斯喎你!乘機話自己靚仔。
農曆年放個長期,休息休息。你呢?新年有無外遊呀?蘭子

largeheadboy said...

蘭子︰新年我都無外遊呀,返咗新工唔好咁快周圍飛吖嘛,過多幾個先喇~
得閒上我地屋企食飯吖,我地多數禮拜六晚返娘家~