Monday, February 28, 2011

一個人的午餐

做了這麼多年人,還是不太習慣一個人外出吃飯。香港始終不是單身食客 friendly 的地方,很多食店似乎都不太照顧單身食客的感受,很多時候都會被安排坐到全店最差的座位,又或者即使四周有大量吉位,仍是要跟另一單身食客搭枱。或者你會說一個人也要吃飯,也是付錢的顧客,跟本不用理會別人的目光,可是我還是覺得一個人吃飯是很渾身不自在的一件事。


來了灣仔上班有一段日子,午飯除了間中有飯友相伴之外,其餘時間就多數買外買回公司。不過多得這裏酒吧和輕食店林立,近來我多了嘗試一個人吃飯。

吧枱是很好的東西,也是單身食客的恩物,因為坐上吧枱,就不用再跟陌生人分享你的食相。這家有肉批意粉沙律珈琲供應的 Zambra 食物不錯,最功得無量的,還是地面那層有一排向着大街的吧枱,最適合單身食客如我者一面吃,一面百無聊賴看街上的風景。


另一家我常去的 Dusk Till Dawn 是家很熱鬧的酒吧,可能是人客比較多,沙律主菜飲品總要等上一會兒才端到你的面前。不過,在等候的時候玩弄着 iphone ,一時查看電郵一時玩玩近來沉迷的 Doodle Truck,一個小時的午飯時間剛好填得滿滿。


固定的飯友快要離開灣仔,看來我更要好好適應一個人的午飯。

19 comments:

galaxy said...

慢慢會慣嫁o勒, 我反而唔慣一大班同事食晏

naruto said...

你請我食,我過嚟,hehe

卡臣 said...

灣仔唔錯吖
食肆算多架啦

maymay said...

唔怪得咁肥啦,原來獨食~^o^
"你請我食,我過嚟,hehe"x2

largeheadboy said...

galaxy︰咁多年唔慣就唔慣架喇,應該都一路唔慣架喇。一大班人食飯,熟嘅就無所謂,唔熟嘅都好難搞~

naruto︰好呀,你肯嚟我請又有乜所謂 :p

卡臣︰灣仔食飯一流呀,一個人食完全無問題呀!以前喺金鐘我都唔係好諗到一個人可以食乜呀。

largeheadboy said...

maymay︰咁早呀今朝!你肯嚟我請又有乜所謂 x 2~

lau2tang said...

我唔覺得一個人食飯有問題喎?
有時,想耳根靜吓,想真正休息一下,我都會撇開的同事,一個人食!

l.minor said...

餐餐都咁豐富?

我淨係食過Zambra,佢d咖啡唔錯

naruto said...

竟然肯請?O嘴中。。。

ayclui said...

一個人食飯幾好丫, 唔駛等位~
去咗觀塘後我 default 係一個人食o架, 都成5年囉, 自由自在都唔知幾得~

小彭 said...

我只係唔慣一個人晌公司附近食, 又唔鐘意成班同事食, 都係一個人晌公司食好... 最好都係舊時咁四圍食, 倶往矣.

supageti said...

唔怪得早餐要食麥皮啦 ~~~

supageti said...

樓上再樓上再樓上:咪傻啦,有人唔知爭落幾多口數 ~~~

L L said...

我都慣咗一個人食,冇問題架,有部手機就可以与世隔絕。

ROY said...

"你請我食,我過嚟,hehe" x 3

"Doodle Truck" 好玩咩? 近排我沉迷"麻將天下"~

largeheadboy said...

劉鄧︰其實我係可以一個人食飯架,只係香港人太多,成日都要同啲陌生人搭枱,搞到我唔係太想一個人食。畀我去東京大阪,無問題架我~

l.minor︰都真係幾豐富啊呵~ :p
zambra 真係唔錯,坐得又舒服,不過我今日都係去咗 dusk till dawn,可能對你嚟講會遠啲啲。

naruto︰嘿,我好豪爽架,有乜咁出奇喎^^

ayclui︰係呀,灣仔元氣 lunch hour 一個人通常好快就有位~
咁又係,有時唔想同人講野,一個人就有呢個好處。

小彭︰你都識講,俱往矣吖嘛,返唔到轉頭架喇~

意粉︰日日一杯奶茶又無運動真係唔係好掂,呢期我成個波咁呀!不過今朝悶悶地都係食返雞尾包奶茶。
有人咁沙膽爭落好多口數?邊個呀?

laulong︰無錯,有咗可以上網嘅手機就萬能架喇,話知佢幾多個人搭枱喇!:p

roy︰你肯嚟我請又有乜所謂 x 3~
Doodle Truck 成日都炒車,不過炒得好 high 架!麻將天下要 0.99 哩!islash 新寵呀我~

紅米奇 said...

一個人食飯最唔好去大哈樂,大塊活果D, 因為無人霸位, 一條友買完野食就要周圍行搵位, 不過我又幾enjoy一個人食lunch, 可以寧靜下, 但唔會揀快餐店law, 唉!同事把口唔停架, 頂唔順

灣仔之友 said...

嘩~ 你lunch都咁大魚大肉, 我點敢call你呀!

largeheadboy said...

紅米奇︰攞住碟粟米斑腩飯仲好,如果係乜野大碗飯但搵唔到位坐仲陰功。一個人食通常好快食完,然後仲可以慢慢行下街,其實好正啊~

灣仔之友︰我好有彈性架,南記 v8 新軒尼詩 angel hair 我都得架~