Monday, October 20, 2008

是日休息

撇開周末周日的例假,今年雖然放了不少假,但真真正正給自己休息的就寥寥可數。經過個多月“禁放假”期後,這天終於可以休業一天了。

平日未到七點就要起床匆忙趕上班,這天終於可以盡情睡個夠,日上三杆才施施然起床。



差不多有一年沒有在放假時跑來跟友人午飯,這天又到了大家慣常去的蛇竇。百物騰貴下,從前才 $29 的午餐已經漲價到 $33,幸好這裏仍舊不用加一服務費,冷飲也無需加兩蚊。



席間提到昨天晚上我回娘家吃飯時遺下了電話,要到媽媽打電話告訴我才發覺自己這麼大意,之後還要立即乘的士回娘家一趟。友人說既然我今天放假,何不留待早上才取回電話,還可順道跟爸爸媽媽上茶樓?對啊,為什麼我在那一刻完全想不到呢?就是這樣,之後我一直為這件事耿耿於懷,覺得錯過了一個大好機會跟他們聚聚天倫。好,要找天再放假跟他們飲早茶去。

每次經過這店就會知道什麼節日即將來到。相信個多月後聖誕老人就會在這裏出場。



吉之島這幾天舉行感謝日,我趁這天不是周末人不算太多的時候可以在毫無壓力下買過痛快。



我的戰利品包括產自島根県的新米以及北海道知床薯片。



晚飯前跟早下班的友人茶聚,輕輕鬆鬆過了一個小時。



我通常不會安排在放假的日子跟朋友晚飯,但上星期向上司申請假期時完全忘記了這天的飯局。不過沒相干吧,跟大伙兒談天說地大吃大喝一頓也是這個假期的好節目。



這天回到家裏已經十一點,明天又要一早上班去。或者,我真的應該多放一天假。

41 comments:

意粉 said...

吉吉島依排係唔知幾多週年大減價。

我覺得真正放假係咩野都唔做,咩人都唔約。

roy said...

"蛇竇"係咪鏞記對面果間?

我都想去吉吉島睇下執平野~

maymay said...

包米隔籬果樽係咪菜油黎架?
上左咁多糧,我地咪可以上黎開餐囉~~

roy said...

個支係味琳~

意粉 said...

味醂至啱呀,萊少 ~ ^^

歐巴桑 said...

歐巴桑也喜歡久不久瞞著大叔放一兩天這種悠閒假期
感覺真係超好呀^^

largeheadboy said...

意粉︰係 21 周年!我呢啲師奶最熟街市行程~~
點可以唔做嘢呢放假?點都要舒舒服服食餐晏,又或者煲返一兩隻碟架嘛 ^t^

roy︰中環蛇竇係就係喺鏞記對面,不過我地呢間蛇竇係陪伴大家成長嘅花園餐廳 ^t^
吉吉島啲嘢真係實惠好多,今晚食咗根室產的秋刀魚,都係廿零蚊三條,超好吃。

maymay︰樽嘢的確係味醂,貪得意買嚟扮日本菜囉~~不過今晚落咗唔覺有咩分別囉~ :p
上嚟我度?歡迎啊,不過裝咗修先喇~

歐巴桑︰哈哈,咁鬼馬嘅你!咁你會唔會專登搵大叔食飯又或者煮定飯等佢返嚟 surprise 吓佢呢?
久不久平日放一天半天假簡直係妙不可言呀!

Ellen老師 said...

老師今日又郊遊

歐巴桑 said...

呵呵!煮定飯就一定會
可惜咁耐以來大叔都未試過感動到要歐巴桑辭工回家專職做他的煮飯婆呢:-p

意粉 said...

我覺得游手好閒就最舒服,哈哈 ~~

老師上左天若有情癮,嘻嘻 ~~~~

Ellen老師 said...

老師都想天若有情!
係公事郊遊呀!

largeheadboy said...

ellen︰可以因公事去郊遊我都仆到去啊!不過今日太陽超猛喎,天若有情嘅話好辛苦架!

歐巴桑︰依家咁嘅環境,但求有工開安安定定放咗工跟手去買餸煮飯就已經好好架喇~~因住大叔話你大想頭呀!^o^

意粉︰其實游手好閒不事生產做埋社會嘅寄生蟲都係我嘅願望啊~^c^

意粉 said...

顧住想大你個頭呀,哈哈 ~

Ellen老師 said...

政府咁高人工請你返來做寄生蟲,唔係化!

largeheadboy said...

意粉︰我呢個願望好卑微啫~~

ellen︰唔好咁大聲話我人工高呀,我怕畀人標心呀!^t^

maymay said...

邊個得閒標你參呀,你d身家跟隨金融風暴蒸發晒咁滯啦~~

意粉 said...

師妹好毒辣呀,哈哈 ~~

貝拉 said...

呢篇文我覺得最正係可以: 瞓到天光, 同埋有咁多野食的打邊爐....

largeheadboy said...

maymay︰咁又係,我依家乜都冇lu~~
唔講你唔信,我真係有成一個月冇 check 過我個 account 喇~

意粉︰女人真係好厲害啊!小心小心~

貝拉︰呢日過得好充實啊!不過如果朝早有同屋企人飲埋茶就 perfect 喇!

rempei said...

做乜呢排成日學我去吉の島掃貨?仲要買日本米食.....

largeheadboy said...

rempei︰我都係 j card 會員嘛,要買返夠至維到嗰 $50 入會費~
依家買咗日本米,到時就唔駛抬一包返過嚟咁激喇!^t^

lau2tang said...

仲諗住加插個新潟行程等你買包日本米番來添~

largeheadboy said...

劉鄧︰去新潟都冇所謂呀,我都未去過~ ^t^
不過去都未必買米啊,最後幾日都冇車坐!

maymay said...

請問味醂係典用架呢?

largeheadboy said...

maymay︰其實我都唔係好知架,我都係貪得意咋~

維基就咁講囉 -- 味醂(みりん),俗作味淋也稱為米霖,是一種類似米酒的調味料含有30%的酒精,來自日本。由甜糯米加上麴釀成,味醂中富含的甘甜及酒味,能有效去除食物的腥味。味醂的甜味能充分引出食材的原味,是照燒類料理時,味醂便是不可或缺的調味料。味醂具有緊縮蛋白質,使肉質變硬的效果,如果怕菜煮出來太軟糊,要早點加;相反的如果怕菜太硬柴,則要晚點加。烹調時加入味醂還能增添光澤,使食材呈現更可口的色澤。

你又買嚟玩下囉,十蚊枝咋嘛~~ ^t^

小彭 said...

知床著片? 你去過知床架嘛, 唔係出海產嘅咩?!

largeheadboy said...

小彭︰佢話係鹽味喎,再加知床兩個字咁就呃到我呢啲傻仔喇!不過個袋背後有介紹知床嘅名勝架~
知床你今轉冇去呵?

maymay said...

謝謝解釋,不過都係唔知典用!
究竟係用黎醃食物,定係炒餸時當酒咁用,又抑或烚下烚下果時加入湯內呢?

supageti said...

應該係廚野時加入去調味,我整炒牛蒡絲果時用過一次咁多,已經唔記得左係咩味 lu。

supageti said...

大頭叔:唔知係咩都買,真係讚錯左你。

largeheadboy said...

maymay︰應該都可以用來醃食物,不過就會加埋醬油呀之類的醃料。根據師姐送畀我嗰本煮嘢食書,都話可以增加食物的甘甜和鮮味,我仲見好多菜都有加架~~

意粉︰我知知地架,不過我諗我都會好似你咁,煮完一次就放埋佢一邊。:p

小彭 said...

無去知床, 再去都係坐內陸機去個頭好d!

largeheadboy said...

小彭︰唔係應該一路聽住《人車誌》一路開車去咩?^t^

joeyee said...

我這個月也沒有放過假, 每天都要工作, 雖然時間不長, 但都是要做.
下星期日應該可以放一天假了.

largeheadboy said...

joeyee︰咁忙呀你原來~~等我仲大大聲話自己好耐未放過假添,慚愧中~~
下星期日,要好好休息啊!

lau2tang said...

Thank you !
你將我最需要的資料放了在網誌內~

largeheadboy said...

劉鄧︰你係講個外匯價格啊呵~ ^t^
澳元幾時會升返上 0.8 呢?而日圓又幾時至暴跌呢?

lau2tang said...

喂~個表唔識update 嘅~
誤導呀~

largeheadboy said...

係喇,好有誤導成分
如果一日至 update 一次就死得人喇
今晚睇下點
唔掂就剷左佢!

lau2tang said...

居然係一日都唔update~
大頭叔,不如你就用呢個匯率換啲円俾我啦~

largeheadboy said...

咁過分?等我剷走佢先!
我都唔夠貨,邊有得兌畀你呀~~ >_<