Tuesday, April 19, 2011

飲食回憶

有些人說經常把飲飲食食放在口邊,會令人覺得你很膚淺、沒有深度。我不會掩飾,因為我實在是個很膚淺的人。


那天在家裏做飯,順道清理囤積家中的食材。看,我隨手就弄來很美味的牛舌沙律和青口牡蠣意大利麵。我遺傳了家人知慳識儉的優良傳統,知道一蚊雞重出江湖,就即時跟家人組團叫雞。七個人為了一隻雞,最後埋單八百多塊。下班後跟友人 happy hour,為了多吃幾串串燒,兩個小時下來灌了兩大瓶啤酒,最後在回家的巴士上昏睡到不省人事。在公司附近的超市買了蛋餅做午飯,然後看到餅店的栗子甜餅樣子很吸引,就不理路人目光抽着放有甜餅的透明膠袋走回公司。


在糖水店點了特價的腰果露,落了單後服務生再提醒我們腰果露特價。這個不用多說我們也很清楚啊,否則我們就不會點腰果露了。家裏的飯桌長期被雜物攻佔,幾乎看不到桌面。這天終於把雜物清理乾淨,然後放上幾個香甜的芒果,感覺很好。近來多去一家由社企經營的素食店午飯,除了因為想少吃點肉和望着軒尼道吃飯,還因為這裏白飯任裝。星期日早上在家裏吃麵包,伴着吃的還有牛油、杏仁醬和柚子果醬。三種味道截然不同的東西,但都是來自同一處我很惦記的地方。


每樣東西都有自己的味道,同時也會喚起你很多不同的記憶。

24 comments:

supageti said...

夠有人話我晌 facebook 寫食經啦 ~~~

歐巴桑 said...

膚淺和沒有深度最襯我啦:D

Anonymous said...

寫呢D先好睇
唔扮野!

卡臣 said...

實施最低工資後
老闆成本上升
唯有割價吸客

小彭 said...

你寫得一d都唔膚淺喎! 等我出手寫d膚淺野比你睇下!

我西遊成日都諗住東遊, 不過都係鼓唔起勇氣去食三文魚壽司(十幾蚊8件)... 弊, 屋企仲有仙台牛舌未食呀, 要快d攪掂佢先!

maymay said...

飯團响邊樹買架?好唔好吃?

naruto said...

膚淺但面皮厚

largeheadboy said...

意粉︰點解唔一稿兩投放埋喺你個扑呀?等我呢啲無 facebook 嘅人無得食都有睇吖嘛~

歐巴桑︰係喇,諗得太多會頭痛又會標白頭髮,況且諗完一大輪都唔會明~

無名氏︰我想扮野都扮唔起啊!

卡臣︰你講啲咁高層次嘅野嘅,好難明喎~ :p

小彭︰好呀好呀!我最鐘意睇膚淺嘅野,等你呀!
我上次西遊都係無時無刻諗住東遊,一碟最普通嘅蛋壽司都要三四鎊,當其時係兌 15 架痴線!不過點都係一個好好嘅體驗。
仙台牛舌唔好食呀,留返佢做記念喇~

maymay︰飯團喺九龍灣嘅 piago 買,我覺得好好味啊,仲有明太子呀三文魚呀好多口味,一律均一價八蚊。

naruto︰哈哈!其實我面皮好薄架,好容易面紅~

l.minor said...

正呀!飲飲食食~啱我呀!

TY said...

個飯團個樣真係幾得喎!!!
做人都係飲飲食食架啦~~ 太深既你講左我又唔會明,呢D岩架啦~ 至緊要有邊度平靚正野食講出黎同大家分享就至好啦!

瘋膏 said...

Hi, 最喜歡文章的第一句, 笑咗, 因我都係。

你在巴士上昏睡, 誰提你落車?

腰果露好唔好食? 我like腰果。

galaxy said...

食得是褔嘛, 膚唔膚淺唔使理啊。

naruto said...

好容易面紅。。。咁堅係膚淺喎

supageti said...

即時用手機 upload 啲相上 facebook 方便快捷嘛。無 facebook 咪開番個囉,大哥。

Rempei said...

你膚淺同食野無關個喎~~呵呵~~

ayclui said...

正呀!飲飲食食~啱我呀!x 2
鍾意食o野有咩問題呢? 大頭我撐你~

桌面......然後放上幾個香甜的芒果,感覺很好...呢個我最有feel, 直情好似聞到D 芒果味添呀~ 我又整幾個聞下先~

largeheadboy said...

l.minor︰咁就啱晒“荷車”喇!

TY︰啲飯團仲有啲東橫 inn feel 添,感覺份外親切~
要我寫我都寫唔出好深嘅野喇,放心 :p

瘋go︰酒醉三分醒嘛,全程巴士其實都瞓下醒下,迷迷糊糊咁,諗返其實都幾好 feel~
腰果露據講普普通通,唔及得前面嗰碗合桃露喎。

galaxy︰對啊!有得食就要開懷大嚼,我地早出晚歸,都係為咗三餐啫~

naruto︰係喎,膚淺原來仲有多一重意思,你話我真係幾膚淺哩~

意粉︰早排有衝動開返個 account,諗住可以方便睇朋友啲相,不過拖下拖下又無咗件事,或者等多一年半載喇又。

rempei︰係喇,你呢句話應該同話我嗰啲人講就啱喇!就算唔講食野,我係唔係都咁膚淺架嘛~

ayclui︰乜你咁膚淺架!^t^
尋晚食咗個芒果,之後隻手仲好芒果味,好香!

ayclui said...

開個facebook account 駛唔駛等一年半載呀? 大頭你真係誇張~ -.-"
開啦, 幾好玩o架~

largeheadboy said...

ayclui︰過咗氣又懶懶閒吖嘛,又好似話啲保安定私隱 setting 好複雜,拖下先喇~

supageti said...

有幾複雜呀?果啲師奶數你又咁精明?

largeheadboy said...

意粉︰到時我開咗 account 你接唔接受我做 friend 架?

supageti said...

要等多一年半載既野我唔識答喎 ~~~

largeheadboy said...

意粉︰三兩個月應該無問題~ :p

supageti said...

睇下點 ~~~~~~~