有時有些事情沒有親眼目睹、親耳聽到，你可以欺騙自己什麼也沒有發生，一切如舊，日子可以繼續好好的過。家，仍是得到慰藉和支持的最後地方。
早上洗澡時，聽到門外有些怪聲，於是便探頭出去看過究竟。把視線放到廚房 —— 天，終於給我看到了！一隻巨型蟑螂正在洗手盤上走動，我看著牠牠看著我，彷彿告訴我牠勝利了。我慌張得什麼也不懂得做，看著牠沿洗衣機走，漸漸消失於我眼前。
在這裡住了六年多，除了起初兩年發現過牠們的蹤影外，這幾年我過得很好，同時也以為自己可以快快樂樂的活下去，但原來我是一直在欺騙自己。現在，一切都不一樣了。
我是個超級杯弓蛇影的人，看到什麼風吹草動什麼黑影，我都會給嚇到半死。廚房，甚至這個家，我以後要怎樣面對？
the boring, routine but sometimes funny bits and pieces from the world of largeheadboy
29 comments:
坦白說，我也勁怕，但為免夜長夢多，會深吸呼，脫鞋飛身就打，把牠沖走後才慢慢喘氣。
我家以前也是一個曱甴竇，夜晚走到廚房想喝杯水，一開燈，即見數十隻曱甴荒忙逃亡，走得慢的，當然就被我分屍、拍扁，以最殘的方法幹掉牠們。噴過多種殺蟲水都無效，最後用了威滅曱甴屋先至無再見到佢地咁猖狂。
你也試試吧。
我怕到唔敢打佢，由得佢走！我今朝沒有再進廚房！依家直頭唔想返屋企！想裝修！想搬！
小檸七︰你住在垃圾房嗎？怎可能有數十隻曱甴？曱甴屋我接受不了，見到佢地成家叮晒係入面，我會暈的！
吓！乜你怕曱甴㗎！
買些曱甴屋放在水渠口，大門角，曱甴屋要定期更換；垃圾筒內垃圾不要留過夜，不久便會絶跡。
劉鄧︰你不怕曱甴嗎？屋企垃圾筒連蓋都無架，我又不會晚上掉垃圾。很煩惱，可能真的要改改自己的習慣了！
我住18樓，但唔知點解，d 曱甴咁鍾意定居響我屋企。搬離那裏後，住進一間新建成的私人屋苑，理應較以前清潔。點知住個零月，廚房出現怪聲，搜尋不獲。於是關了廚房燈，隔了一陣，從廚房門的小玻璃看去，就見一隻老鼠在水樽旁走動。嚇得我們舉家 call 管理處派人上黎捉鼠。但最後也捉不到，管理處叫我地開左個廚房窗等佢自己走。之後隻野可能真係自己走左掛，無再有怪聲。那時我就真係好有想搬、想賣樓的感覺。但當時負緊資產，唯有住到而家啦。
垃圾不能留過夜，舉手之勞而已。
曱甴屋挺有效的，我舊居也曾有曱甴患，初用那幾天都捉到七八隻，我得四五歲，驚到死。用了一兩個星期，已經差不沒有了。
假設你獨居，也就是避無可避，就面對吧。以前我哪會想到自己曉打曱甴？
何止曱甴，老鼠、青蛙我都唔怕！我最驚喺大狼狗同蛇！
對，用威滅曱甴黑店，好 work 嫁！
曱甴俾我見到一定死梗！
我就 mud 都唔驚，只驚貓 ~~~
細個睇完《大白鯊》，去堂兄家參加生日會時，他拿著膠鯊魚兇我，嚇到我幾乎喊。而家？都唔去沙灘。驚乜？蛇。
狼狗通常都唔惡，甚至有 d 鈍。但有 d 細狗好惡，樓上有隻八哥見人就吠，傻傻地！但如果受襲，我又比佢大，一定放手一搏－－雖然我生性溫馴 :P
用曱甴藥餌(黑色小膠盒, 貼在牆角, 櫃邊之類的地方)... 放心, 牠們一家唔係住晌裡面的.
要杜絕曱甴，就要對症下藥。放藥弭之餘，還要杜絕糧餉，這點你應該明白---不要放太多雜物，丟得就要掉啦﹗
不怕曱甴的各位，小弟家居現已全日廿四小時開放，歡迎過夜，時鐘特平！
我會買些曱甴藥餌或曱甴屋的，我一定唔會輸嘅，不過頭先我都企咗係廚房門口成分鐘，了解清楚形勢先至入去煲水。
仲收租？應該以顧問兼保安身分邀請我們過來嘛 (LOL)
唔好輸呀，大頭
通常 d 細狗先成日裝胸作勢，日又吠夜又吠，係唔係都吠 ~
真係估唔到大頭仔你男子漢大丈夫、高大威猛、年青力壯、英明神武、才高八斗、學貫中西 ....（下刪一千字），竟然會怕o左隻小小o既曱甴 ~~
意粉︰仲有年少有為、英俊瀟灑、風度翩翩、日理萬機、多愁善感、卓爾不凡、卓越理材、藍天海岸、星河名居……（下刪九萬字）。嘻，你夠怕貓咯！
wordy︰我呢度有冷熱水設備、麻雀耍樂、任飲任食、催燦夜景……（下刪六十字），有 so 架！
supageti:
裝胸作勢，我們都是香港人呢 ^_^
任飲任食……沒過期的吧？
貓可比曱甴凶猛十萬八千倍啊！
wordy︰雪櫃有過咗期半年嘅芝士，自便。
意粉︰曱甴比貓核突億萬倍啊！
曱甴好核突咩？我又唔覺喎！
講開怕小動物，我同事和我大姑奶都好怕生嘅雞！
lau2tang:
基於走動形態奇特，生雞確實不易親近，但不至於可怕。我細頭曾經驚魚，可能還是因為大白鯊吧。
大頭：
我拉肚子，你也不好過。那曱甴會恃機飛埋黎……嘿嘿。算了，再說你會發惡夢。
劉鄧︰你的審美眼光很奇特喎！
wordy︰無事喎，正常喎！尋晚仲得很甜。話時話，我個頭大嗎？
準是你的同屋主趁你熟睡，給你送上了深情一吻（詭異地笑）。
看過實物，按比例算，你個頭其實唔算好大，話哂你咁高大。細一點，看來要變「金山橙」了 :) 當然拆開黎睇，就唔係細喇。
大頭仔，
我的審美眼光無問題噃！我話唔核突唧，無話佢靚喎！
另外，你的頭一點也不大呢！否則我在機艙內第一眼便可以將你找出！
lau2tang:
你這樣說，腦裡突然浮起一個怪畫面：如果在機艙的頭海中一眼就認出大頭，那他不是「大頭」，是「栗頭」了。
呵呵 ~ 栗頭老師o既愛心頭鎚 ~~
但劉鄧在機艙內還是找不到大頭仔。 ^^
那時是因為怕醜，將頭縮小吧！
Post a Comment