Monday, July 16, 2007

我的生活只有銅鑼灣

上星期五下班後一心要到銅鑼灣時代廣場看黃永玉藝術展,因為我想周末這裏一定萬人空巷,你推我時我阻你,令人大發脾氣,於是這天吃過晚飯後才施施然步往時代廣場。



能夠免費看到這位大師的作品,實在不應再有什麼投訴,只是現場燈光太強,令加裝了膠片╱玻璃的作品異常反光,很多時看到的並不是被人投訴露出的性器官,而是我自己的倒影。

昨天星期日到了銅鑼灣午飯,地點是除了我們再沒有其他客人的備長



午市定食由 $78 起,算是十分便宜。由於沒有其他客人,我們可以很自由地吃過痛快談過痛快。這裏的食物不錯之餘店員也十分親切,絕對可以再來。只是一個下午才做了七百多元生意,這店可以撐下去嗎?

每次到銅鑼灣,我總會順道到鵝頸橋街市買些水果回家。別要以為這裏的東西很貴,這裏的櫻桃大大粒才是 $40 兩磅,旺角街市沒有這麼大粒的也要 $55 兩磅。店主很好,每次都很樂意取些新開箱的給我。



雖然便宜,但我相信店主沒有呃秤,因為抽着五、六磅櫻桃穿梭於擠迫的銅鑼灣街頭,手臂真的會麻痺起來。

今天晚上又再次走到銅鑼灣,在眾多選擇下最後揀了幾個星期前阿蘇曾介紹過的南亞餐廳晚飯。



這店不是第一次來,從前只懂叫是日晚餐或海南雞飯,阿蘇推介聲稱全港最好吃的炒貴刁和很巨型的 hot cake 還是第一次吃。在阿蘇效應下,幾乎每一張枱都有一碟炒貴刁。

銅鑼灣呀銅鑼灣,究竟是我生活苦悶,還是我需要搬到這裏長住呢?

20 comments:

Ellen said...

當你住在銅鑼灣,就天天去油尖旺啦~~

largeheadboy said...

ellen︰咁又係咁又係,人就係咁犯殘架喇!不過銅鑼灣啲樓好貴……

小妹 said...

一連三日之ma, 我day day都去CWB都閒事來啦. ^^ 以前我約人唔過海o架, 因為我覺CWB乜都有晒囉.

supageti said...

食完備長,黃永玉展覽度都唔係好多人喎,不過,夏日炎炎,都係算罷喇。

五六磅車厘子,點食得晒呀?

依輪我都去 CWB 去到怕 ~

大頭仔 said...

小妹︰對於我呢種住九龍放工又唔駛經銅鑼灣的人來說,我出現在銅鑼灣的次數真係非常頻密。
係喇,銅鑼灣加埋灣仔真係乜都有,你都唔駛點過海。

意粉︰我諗星期日點都多人過星期五晚,況且有些展品放在戶外,我都咪搞囉!
車厘子一晚就食咗兩磅喇,試過最變態是有一次買了八磅!抽到吖!
話時話,去銅鑼灣真係有好多理由。

貝拉 said...

我都好怕周六及日去銅鑼灣, 人迫人好鬼煩. lunch真係唔錯喎.

Roy said...

銅鑼灣我都算常去,去親都會行"梳哥" :p

"南亞"都想試下,另又想試白沙道間"阿蘇炒飯"~

小妹 said...

大頭, 唔記得問, 咁炒貴刁同hot cake即係得唔得呢?

萊少, "阿蘇炒飯"係邊間來o架?

maymay said...

日日玩唔停、食唔停,咁都叫生活苦悶?!
知足常樂呀,兄弟!

某某 said...

咁幾時一齊去鵝頸橋姐?

大頭仔 said...

貝拉︰假期銅鑼灣人多得嚟仲可以接受到,旺角就留番平日晚上算了!
呢餐 lunch 真係唔錯架!

萊少︰那天你地去唱 k ,我就去了“梳哥”買麵包。
南亞幾抵玩架,每人都係幾十蚊。阿蘇炒飯是否就是天樂(http://www.openrice.com/big5/sr2.htm?shopid=9752),好似話下午茶好抵喎!經過門口都有好多人聚集喎!

小妹︰炒貴刁都幾好呀,好有鑊氣,個 cake 就好好玩,仲好有蛋味。阿蘇仲教用支叉桔啲窿,等啲牛油和糖漿滲入去!不過好飽。
阿蘇炒飯就由你匯報喇!

maymay︰係,我知喇!罪過罪過!

某某︰上去吃小菜飲啤酒都得喎!

galaxy said...

車厘子屬燥熱, 我每次食多過一磅, 第二朝就舌頭「鞋」及口乾

lau2tang said...

就是嘛!咁燥熱的水果,一次食咁多,因住出暗瘡!

大頭仔 said...

乜車厘子係燥熱架?咁又係,補血的東西多數是燥熱的。好彩我暫時冇乜事啫,最多食多幾片西瓜補數!^t^

supageti said...

大頭都超晒齡啦,無有怕!哈哈!

大頭仔 said...

你都咪話,得閒我仲會標幾粒青春豆出黎!^o^

Roy said...

就係"峰"附近既"天樂",最近阿蘇有介紹過,而開飯dotcom食評好參差下喎......

車厘子我食唔到多,覺得好"漏"

supageti said...

天樂我食過,都係聽阿蘇o係收音機介紹,唔覺得有咩特別,都係太平館好食 d。

supageti said...

車厘子我地兩個人每次只可吃半磅。

大頭仔 said...

如果都係食類似的東西,我想我也會選太平館吧,有感情啲嘛!

呢個夏天食得最多的水果唔係西瓜便是車厘子了,雖然冇乜汁,但我很喜歡那種又爽又甜的味道。