Sunday, June 08, 2008

歐遊三寶

從今年年初決定這個夏天到歐洲走一趟,轉眼間距離出發的日子只剩下個多星期。正所謂“未出發,先破財”,這幾個星期終於買下歐遊三寶,為這次行程作出最基本的準備。

每次出外旅行,看到別人拉着四輪驅動可以 360 度旋轉的旅行箱,我就滿心羨慕。試想想,在人來人往的街頭輕鬆的拉着不會翻倒的旅行箱四處逛,是多麼瀟灑的一件事!我就是這樣的膚淺,所以兩個星期前趁百貨公司大減價,立即搶購了一個四輪驅動旅行箱回家。



右邊的就是這個聲稱意大利牌子的旅行箱,買的時候還覺得 24 吋很小,但回到家裏,才發覺它跟這幾年來一直陪我闖天涯的旅行箱足足大了兩個碼。

兩年前出發到北海道旅行之前就說過要買部手提電腦,但以我這個什麼也要說一年半載才成事的人來說,最後當然不了了之。直到早陣子開始為今次旅程訂房時,知道有幾家將會入住的旅館都有提供無線上網服務,我就決定即使怎樣重也要有一部手提電腦在身邊。當然,行程還沒有編排好,有着它也叫人放心一點。



這部手提電腦重 1.5 公斤,雖然比重量不足一公斤也曾認真考慮購入的 HP 或華碩迷你手提電腦重了足足 50% ,但 12.1 吋的屏幕怎樣也叫人看得舒服得多。

計劃行程初段,除了英國之外就只打算到西班牙和意大利。不過這兩個國家被地中海分隔開,如果只買西班牙和意大利火車證,就要另掏腰包買船票乘坐十九個小時渡輪跨越地中海,相當不划算。既然這樣,不如就取道法國南部前去意大利。



這張二人同行的五天三國火車證在歐元高企的環境下很貴,差不多可以買下兩張日本全國十四天火車證。不過,六月底七月初正值法國普羅旺斯薰衣草盛放的季節,就當是一種補償吧!

雖然已經有歐遊三寶在手,我還是對這次歐遊行程很不放心,因為還有很多資料沒有看很多東西沒有研究,就連英國的八達通 oyster card 的使用方法到現在我還搞不清楚。對,有誰可以詳細解釋給我知道怎樣把 day travelcard 放進 oyster card 嗎?

36 comments:

lau2tang said...

嘩!今次你是豁出去了~

largeheadboy said...

豁出去呀?都可以咁講嘅!呢個係年度旅行,不容有失呀!^_^

Anonymous said...

咦, 個富良野都未砌喎! 有無買埋電話呀?
以前去旅行, 我用28/29吋o急架, 不過要同團友夾一夾怕超重, 迫住改用25吋咋!

Anonymous said...

買多個貼身袋放護照及大鈔呀,去意大利!

maymay said...

好大手筆啊!

Anonymous said...

本來都想買個0急,不過萊嫂話等年尾再減價先買~

Anonymous said...

跟隨我到處怔戰多年的四輪驅動兼可以前後左右 360 度滾動旋轉的鐵甲旅行箱,終於在上次東北途中磨蝕了其中一個轆皮,一路行一路發出哀鳴,可能都係時候光榮退役了。

光.軍 said...

有腦陪遊 ^(*.*)^ 記得要不定時報導呀 nice trip ar

Anonymous said...

唓,最後個問題去到車站問咪得囉,唔駛擔心啦~
不過呢,去歐洲不像去日本,甚麼也可差得一清二楚,又真的好令人苦惱呢.

Anonymous said...

法國的治安不比意大利好, 搭地鐵/火車的時候要小心, 尤其是遇著入閘機前有對門的, 記緊將手袋/相機袋移到身前才好過.

記得當年就是小看了小偷們的敏捷, 以為大堂只有兩三丁人就大意了, 明明準備入閘時是沒有人跟著的, 但就在推開閘門的一刹那, 相機袋已被打開, 幸好當時朋友剛好回頭發現才幸免於難.

Anonymous said...

大頭仔, 可以分類一下你的遊記嗎?

largeheadboy said...

小彭︰我諗住儲埋其他三個先至一齊砌吖嘛!^O^
28 吋喼好巨型喎!其實我都有一個28 吋,不過我真係覺得佢太大個喇!

jason︰我應該都有個貼身袋,不過已經唔知放咗喺邊,要搵搵先。
我好大汗架,到時個袋一定夾到濕晒!>_<

maymay︰去完呢次真係元氣大傷,之後可能要閉關一段長時間(不過長時間嘅意思可能係六個月!^_^)

roy︰我都發覺原來好多人趁大減價買喼,我買嗰日都唔知幾墟陷呀!年尾之前應該仲有一輪大減價啊!^l^

rempei︰哈哈,一路行一路哀鳴又真係幾慘情喎!^p^
呢類喼嘅轆凸晒出嚟,搬搬抬抬其實真係好易撞爛啊!

光.軍︰有時間的話應該會有不定時報道嘅。不過以我一貫早出晚歸的行程安排,返到旅館可能要即刻瞓 lu!

小妹︰衰在我睇完講解都唔係好明嗰度衰囉!
係呀,依家好多嘢仲未知會係點,例如諗過從Nice 搭夜車去 Florence,但係有人話呢程車今個月中起就會取消,但係網上又冇確實資料,搞到我仲未決定呢晚搵唔搵地方住。煩惱 ing。

wendy︰我都好擔心呢個問題,好似好猖獗咁,托賴一直以來都未遇過小偷扒手,不過我地會好小心跟身的物品,始終有乜差錯就有排煩喇!

largeheadboy said...

joeyee︰好,你咁講到,我就着手跟進一下喇!hehe!

Anonymous said...

當年為了慳錢和有點熱東西吃
帶了個迷你旅行小電鍋
晚上常常偷偷在旅館"打邊爐".呵呵!
記得財物真的真的要小心
治安絕沒有日本那麼好
還有在法國記得不要說太流利的英語
通常說差些他們的態度反而會比較友善^^

largeheadboy said...

歐巴桑︰我依家都諗住帶幾個杯麵過去架,日日出街食我怕冇錢返香港呀!
咁你地打邊爐有冇墨魚丸呀?^p^
英文方面,要我講唔太流利嘅英文絕對冇問題吖!^_^

Anonymous said...

我當年既慳錢方法係:
1. 將酒店/民宿吃唔完既早餐打包做午餐;
2. 或者去超市買麵包+香腸/cold cut做午餐;
3. 帶備大不锈鋼杯及發熱線,去到超市就買意粉+菜/香腸/燒雞做晚餐, 久唔久先出外吃一次晚餐

咁樣真係可以慳番好多錢ga.

supageti said...

Fujitsu,算你啦 ~

Anonymous said...

哈!通常都係什菜/什菌腸仔煲+蝦子麵
杯麵比較"呀"地方呢
上海麵其實仲慳位
最衰自己不大喜歡吃
高檔啲那餐就吃罐頭湯+意大利雲吞煲
那邊的意大利雲吞比香港便宜很多^_^

largeheadboy said...

wendy︰我以前都試過自己做午餐,之前一晚買一磅麵包和午餐肉,第二日就搵個公園坐在草地上吃,都幾寫意架。反而就冇試過帶發熱線同埋煲,所以有時晚飯就食冰凍的罐頭茄汁豆茄汁意粉,諗返起都幾淒涼。
真係呀,食兩晚杯麵兩個人真係可以慳成千蚊!:P

意粉︰hehe,呢部仲話係日本製造添!三叔睇落又真係唔係咁順眼。^_^

歐巴桑︰我個喼咁大,應該可以容納三兩個杯麵嘅,況且去程個喼應該唔會太爆啩。
今次我想試下出多幾晚街食,以前只懂食燒雞麵包罐頭,完全記唔返有邊晚出過街食。正如劉鄧話齋,豁出去喇!

Anonymous said...

大頭, 想請教部notebook除左唔可以寄倉之外, 平日轉換地方時, 可唔可以將佢收落喼度呢? 抑或一定要手提呢? 事關我都考慮緊買部notebook去旅行時用, 又驚一定要手提既話負擔太大, 買ASUS Eee PC既話, 又驚screen太細, 睇得好辛苦, 而家好煩惱.

largeheadboy said...

wendy︰我諗住移動途中都可能放落個喼度架,最多用幾層衫包住咁囉,同埋放在四轆 360 度喼應該又會冇咁震。不過當然會睇埋情況,例如如果跟身的袋不太重就跟身囉。
我差唔多就買左 ASUS Eee PC 喇,個屏幕細我都接受到,最唔鐘意個 hard disk 最大只有 20G,裝左啲軟件之後唔係得好多剩,好唔安心咁。不過佢又細又輕,同一本旅遊書差不多重,呢樣就好吸引。
你的煩惱我絕對了解啊!

lau2tang said...

我會帶埋原本裝notebook個手提袋,然後成個放入喼內,咁就包無問題啦!當然,搬運行李期間自己都要小心啲。

naruto said...

呢個係年度旅行,咁立山算咩?
唉!我今年都想去多次旅行呀!

largeheadboy said...

劉鄧︰notebook 個原裝手提袋我嫌佢太大個,我或者會買個貼身啲嘅電腦袋。
今日我抬咗部腦返工試 wifi,都頂得住喎!^_^

naruto︰立山得嗰五日,都好似唔覺去過咁,今次呢鑊甘呀!^t^
想去就去喇,我最支持人去旅行架喇!

naruto said...

想去就去。。。唔駛做呀?發咗達呀?要Plan好耐架!
我呢種放吓假可能無緊D客架!

Anonymous said...

杯麵, 最好買日版啦, 去到食都食得開心d!

maymay said...

{我最支持人去旅行架喇},點支持先?
我下個月都去旅行喎,係咪支持d yen俾我呀? ^_^

largeheadboy said...

naruto︰咁你就呢幾個月努力工作,之後咪可以開開心心去旅行囉!同埋去旅行可以純粹去 hea,唔一定大花心機安排行程啊!

小妹︰食日版杯麵會觸景傷情呀!日本大把好嘢食又平又好味都唔去,要去想搵啲熱嘢食都冇乜嘅地方~~

maymay︰咪話我唔提你呀,啲円依家 7.2x 呀!入咗貨咪呀?

lau2tang said...

大頭仔,
睇你的語氣好似有啲後悔咁喎~
我估啲円仲有得跌。

largeheadboy said...

又唔係後悔嘅,歐洲我都好鐘意,只不過洗費實在太貴了,冇話喺日本買乜食乜都得咁濟。
我都覺得啲円仲有得跌,我諗住見返 6 就大舉入貨架喇!^_^
我依家又同時睇住歐羅,好忙呀!

Anonymous said...

見6?? 我都超級想呀,見到真係要大舉入貨先得喇.

乜而家歐遊咁貴既咩,我仲以為同去日本差唔多添,一定係個印象outdated喇,睇嚟要加緊努力(儲錢),去番轉溫習下先得喇.

largeheadboy said...

我有信心見返 6 架!有信心就成事架喇!
歐羅依家 12.0x 呀,叫做跌咗啲,好冇陰功呀!日本相對嚟講簡直係天堂!

lau2tang said...

我就要睇住的澳元同日元,好彩澳元最近都跌咗啲,無咁傷!

largeheadboy said...

雖然我冇點跟澳元,但係都知道澳元升咗好多呀!呢幾日美元強咗好多,真係要留意住個匯價入番啲貨呀!

lau2tang said...

喺呀!第一水學費個滙價是7.5x架,好貴,真陰公!

largeheadboy said...

7.5x,咪好恐怖?
我早幾年學人玩澳元都係 5.x 咋!
咁樣,真係要叫 winnie 努力讀書啊!