Monday, November 30, 2009

消失之前

有報道說這幾年 facebook 和 twitter 越來越流行,大家只需要用簡單的三言兩語在這些平台上交流就可以了,結果沒有太多人願意再花時間長篇大論寫網誌,很多網誌的更新速度也慢了下來。

我沒有加入 facebook,也不算太熱衷 twitter,可是近來我的網誌的更新頻率還是減慢了。以往一個月起碼有七八篇新文,現在一星期才勉強更新一次,沒變的可能是網誌的內容仍舊是那麼枯燥乏味。以這個速度遞減,相信不用多久我就會在這個網絡世界中消失。



經過一天工作,雖然不致於筋疲力竭那麼誇張,但不知何解就是沒有太多精神花點心思再寫東西。整個晚上,很多時候我就只會對着電腦屏幕發呆,沒有意識地不停到訪一個又一個網站,然後到十一二點倦了就爬上床睡覺。即使現在我有兩三篇接近寫好的文章儲存起來,只要略加潤飾並加上相片就可以發布,可是我還是由得它們待在那裏。當然,刻板的生活沒有什麼好寫也是令這個網誌減產的另外一個原因。近幾個月,我甚至沒有帶相機外出,連電池耗盡了也沒有為它充電。

這一兩個星期,我連花在上網的時間也少了,我寧願攤在沙發上看電視,看看信天翁如何繁殖下一代、北極的冰塊融化得怎樣厲害,又或者三好和金鈴之間的恩恩怨怨。這個網址,或許會繼續荒廢一段時間。

話雖如此,臨近年尾,相信我的貼文高峯期應該就會回來!

37 comments:

歐巴桑 said...

一啲都唔覺得你的網誌枯燥乏味喎
日常生活都係咁上下
天天都驚天動地咪重恐怖:-p
Facebook自己都係人有我有
update的動力比網誌還要低得多呢

lala said...

咦你做乜寫哂我o的心底話出黎?

我好想睇番金枝慾孽,原來好睇得多.

naruto said...

長有長寫,短有短寫啫,咪當寫日記囉

小彭 said...

你d電要晌日本差架嘛!
我好想有d發呆時間... 我好想將d野寫好, 未必要post出黎, 因為我發現我d記憶越來越差... 我好耐無睇畢打自己人, 星期日睇三好同金鈴睇到我一頭霧水.

Ellen老師 said...

相信不用多久你就會在這個世界中消失。

largeheadboy said...

歐巴桑︰hehe,其實我得閒睇返自己啲舊作都覺得好好睇架~ :p
人懶呀,好多時都無乜動力寫野,我都好想記下生活的點點滴滴,睇下呢個階段幾時過去喇

lala︰你一年都有七八篇文吖 :p
《金枝慾孽》係上一套我真正有追過嘅電視劇,我成日都想買番套 dvd 再睇多一次。三好佢地爭幾皮啊!

naruto︰都係,等我睇下轉唔轉下型先~ ^t^

小彭︰係呀係呀!當你知道部相機啲電係日本發出嚟嘅,真係會好感動架!
寫網誌就有呢樣好,可以幫你記低啲野,唔 post 出嚟嘅咪由得佢留喺個 draft 度囉。如果唔寫低,乜都好快就會唔記得。有時唔想咁囉~

老師︰真架,我諗我都等唔到幾耐~

supageti said...

Facebook 以前唔玩,而家因為成為老朋友老同學既聯絡站都 update 密左,twitter 因為練習日文日日都會寫,buboo 用黎發下 up 風成日都會寫,但通通同寫 blog 好唔同。

無論係 FB, twitter, buboo 或者 blog,想寫就寫,唔想寫咪唔寫囉,無人會話你,唔駛搞到要『勉強』啩?

又係時間講下做人既道德:其實你可以按自己意願生活已經好幸福啦,仲成日晌樹無病呻吟 ~~~

光.軍 said...

唔好用"消失"依兩個字啦, 用"暫別"有D詩意同有回來o既時候嘛。

小休片刻再回來記錄大頭的二三事啦 :)

CHEERS

maymay said...

平常心啦,大頭帥哥~~^^

maymay said...

你唔約我吃飯,談下心,梗係冇野寫啦~~~

largeheadboy said...

意粉︰我都覺得 twitter 同 blog 好大分別,寫 blog 嘅樂趣遠比 twitter 大,所以我好想繼續用 blog 呢個平台記錄我嘅生活,雖則我比較懶,其實應該係非常懶。:p
我寫呢篇野,純粹係借題發揮,我覺得呢排好懶無乜心機少咗貼文,所以就寫咗呢一篇出嚟,講下我呢一刻的感受。你識咗我咁耐,都應該知道我唔會介意人地點睇我,亦都唔會為咗人地寫野。我寫嘅野,只係為咗記錄我那一刻所思所想,呢一刻我就係咁樣諗。我根本係個好渺小的人,我知道沒有人會在乎我寫抑或唔寫。
有時寫野我會誇張啲又或者係挖苦一下自己,我覺得呢啲係我嘅風格(好似好有野咁 ^_^),所以我話“勉強”,又未必係咁樣。唔駛咁認真喇,大家輕輕鬆鬆明白咪算囉~
我當然知道自己好幸福,不過無病呻吟個個都係咁架喇,唔係無人有題材寫 blog 添架喇~ ^t^

光.軍︰依家我就係小休當中喇,不過休息當中都會繼續工作架~ :p

Maymay︰唔知架,可能心血來潮又或者有野想寫,我今晚會連寫十篇野架。
唔,你買咗咁多鑊,驚阻住你煮飯吖嘛!^o^

supageti said...

係咪你個卜歷史上最長既留言呢?

我都好好記住依一刻 (好似好有野咁 ^_^) ~~ 哈哈 ~~~

Ellen老師 said...

(好似好有野咁 ^_^) ~~ 哈
帥哥係時候約我去打邊爐啦!

largeheadboy said...

意粉︰呢個可能真係我最長嘅留言呀,仲長過個正文咁濟呀,或者又可以借題發揮寫多篇 blog 同十二月開齋呀~ :p

老師︰唉,打邊爐都要過埋呢個禮拜日先喇!我呢幾日得閒會諗下有乜野出算方法~ ^t^

rempei said...

如果將來網誌真係在網絡世界淘汰消失左,咁我地之前寫下的旅行遊記咪同時消失!!!

她帶給我不少歡樂及回億,亦令我認識一些志同道合的朋友,想到呢處,我想起travaleyes.......

rempei said...

sorry! 串錯左,係travelleyes至真!(費事俾你話~~)

lau2tang said...

twitter 有字數限制,又唔可以貼圖;facebook要係會員,同埋要版主接受你,你先可以走去人家的網頁,兩者都各有弊端,所以,我覺得暫時都唔可以取代網誌。
好似我咁,成日都係yahoo個搜索bar內,打上「清里」,又或者「秋田」,就有各式各樣的旅遊網誌俾我參考,幾方便。

帥哥,
你要消失,事前記得通知聲我地,等我地同你say goodbye,借的意食餐勁! ^o^

supageti said...

想起 travellereyes, 總覺得有啲遺憾 ~~

largeheadboy said...

薯嘜︰我有諗過,過多唔知幾多年我地瓜咗,啲人 search 到我地啲網誌出嚟,睇返我地呢啲前人寫嘅野,唔知會係點樣嘅一回事~
喂,你都仲係串錯字喎老友!^t^

劉鄧︰係喇,我都覺得大家唔同性質,不過啲人玩多咗 facebook 同埋 twitter 少了寫 blog 我諗就真有其事。
消失都有諗過架之前,不過我依家仲係 alive and kicking。食餐勁?我地成日都有喇~ ^_^

意粉︰travellereyes 對我嚟講非常感慨添,尤其係諗返起沒有 save 番 cache 嗰啲野~

lala said...

其實呢兩日都有睇番我個”沒有記憶”系列,慶幸當年有寫底,好多細節已經唔記得囉 ......

largeheadboy said...

lala︰重睇番自己之前寫嘅野,好多時至記番起原來某年某月某日做過呢啲果啲,沒有寫低的話就可能連一點記憶都沒有了。所以我依家喺個 blog 側邊整咗個隨機文章,得閒睇下重溫下啲大作(乘機賣下廣告先 :p)~

rempei said...

唉~~都係串錯左,難怪佢要消失~~~
後人見到您D臭鞋,咪會話我地呢輩原來係咁污糟囉~~~

意粉,travellereyes其實為喜歡旅遊人仕帶來莫大益處,但後期卻有點點變質

supageti said...

薯嘜:我估 TE 網主都可能因為咁,加埋成日畀黑客入侵,咪意興闌珊囉,其實幾乎所有 forum 整整下都變晒質,跟住沒落甚至消失,都係由於人既問題 ~~

largeheadboy said...

薯嘜︰喂,多鞋唔一定代表污糟個喎!(雖然真係幾污糟~ :P)
travellereyes 之後有變質咩?我唔係好留意,其實當時我都唔算好活躍~

意粉︰但係網主唔聲唔聲咁執咗佢又有點不近人情了。
我仲記得你話當時畀九分我,我就話你點解唔畀夠十分,等我早啲上四星吖嘛~ ^_^

supageti said...

當然啦,我都有啲嬲嬲地嫁,拍一聲就無晒啲心血好心痛呢,不過人地係免費提供,而且一向神神秘秘咁,想搵佢算帳都唔得啦。

我出盡力先上到四星,去到前幾十名(唔記得幾多十 lu),但眼白白睇住有啲人啜一聲飛到上四五星我都覺得好唔公平,亦開始懷疑係咪有人出老千。

帥哥,畀九分已經好鬆手,十分唔係咁易個喎 ~~

largeheadboy said...

意粉︰不經不覺,原來 travellereyes 又是幾年前的事。我仲記得我最高去到百一二,好辛苦至上到去架。諗返起,成日要上相邀請人覆留言又去人地度留言再畀下分,真係好忙架~ :p

紅米奇 said...

某程度上我都有D遠離寫blog, 你見我咁耐無新blog就知啦, facebook確實花上好多時間, 所以我都開始減減減, 唔玩咁多, 要搵翻D時間出來, 大頭要keep住寫寫寫呀 ^^

largeheadboy said...

紅米奇︰你個 blog 唔算開咗好耐咗喎,咁快就放慢手腳,你仲要同大家分享好多野架!今年年頭我就跟你去咗新宿食燒肉放題,仲食得好開心添,所以原來有時寫嘅野可以令好多人受惠架。你都要密啲 update 唔好咁沉迷 facebook 呀~ :p

maymay said...

難以想像,自己唔寫卜,又唔上人家嘅卜,日子點過呢!
有d野唔容易走番轉頭~~

supageti said...

應該係:時間がありませんから、すぐ必死に勉強をします。

roy said...

依個禮拜好慘,出job果度無得上網,搞到自己好似同世界脫左節咁......

largeheadboy said...

maymay︰真係返唔到轉頭呀!所以大家要繼續寫 blog 繼續留言繼續吹水呀!^t^

意粉︰必死呀!
今日終於忍唔住入咗啲 yen,點知夜晚美元全線急升呀~

roy︰出 job 就專心做野喇,仲上乜鬼網哩~ :p
不過呢幾日個世界都無乜點變~

Kuri Lung said...

我間唔中都有 check 你個網誌架,一個月一兩次啦,都想知道老友近況,但又懶打電話。重點出擊啦~~又唔駛迫自己更新得咁密嘅。

lau2tang said...

哈~
我都係今日換晒要用ge円!又會咁繞有人陪我蝕底?

rempei said...

自從你登錄travellereyes 之後就開始變質了:P

今晚想update個blog,誰不知成個yahoo blog瓜左,唔通咁快就關門大吉?喂~~唔好住喎,俾我搬相過檔先啦,唔該!

supageti said...

Yahoo Blog 成日都有問題,麻鬼煩!

largeheadboy said...

theresa︰我都有間唔中上你嗰度,期望會唔會仲有 update。
無架,都係想寫而且又有野寫咪寫囉~ :p

劉鄧︰唉,升得好勁呀美金,大早尋日唔入咁多喇。不過我仲會繼續入架~

薯嘜︰咁睇得起我?:p
yahoo blog 好唔得呀,又多限制,搬屋喇~

意粉︰尋晚我見空白一片,唔知依家搞好未呢?