Monday, March 15, 2010

迎新

二姐給我送上從街市買回來聲稱是有機種植的黑莓,不過我嫌它味道有點苦澀,一次過不能多吃。不過之後想到把它混進乳酪裏,它的苦澀味就完全給乳酪的甜味蓋過,然後再加上一件蛋卷,就是很清新的早餐。


平常在辦公室多數喝蒸餾水,這天轉轉口味,找來買了好一陣子的 drip coffee,捨棄原來不是牛奶的奶精換來鮮奶,弄杯香濃的珈琲。一面喝着珈琲一面想,有機會的話要找來打蛋器,把牛奶打到起泡,然後弄一杯美味的 latte。


家中為我報時的 kitty 時鐘是時候退役了,這天又走到深水埗買跳字鐘。老闆娘向我推薦這個才賣 48 塊的,說它有自動感應功能,在暗黑的環境就會自動發光,很方便很先進什麼什麼。把它帶回家才發覺自動感應功能原來只是一個燈掣,在黑暗的環境就會亮起微光,在光猛的地方當然就看不到那微弱的光線了。花 48 塊就可以擁有自動感應功能,實在沒有這樣過分吧!倒是這個跳字鐘外表簡簡單單,很合我心意。


近幾個星期的濕度很高,抽濕機抽了一桶又一桶水出來,牆壁黑漆漆的霉菌剛抹走了又再次出現,令人很沮喪。這個家越來越殘破了。終於,說了幾年的家居裝修有了點眉目,二姐夫仗義為我統籌裝修事宜,省卻我不少煩惱。或者未來兩三個月,我要暫時搬到大埔或是元朗,又或者乘機找一頭半個月跑到日本大吃大喝去。


想得太多太遠了吧!不過在這個濕氣重得叫人提不起勁的三月,就容許我對未來的新生活來個美好的幻想吧!

29 comments:

joeyee said...

諗下野都好架, 吾係個腦會生草.

lau2tang said...

搬到元朗???

光.軍 said...

暫住元朗咪可以成日食"B仔涼粉"?

歐巴桑 said...

搬去日本住住先啦^o^

largeheadboy said...

joeyee︰我個腦不嬲都生晒草架喇,依家就諗住再種啲花添~

劉鄧︰我諗住搬去你嗰度住架,無話過你知咩?:p

光.軍︰我好鐘意食 B 仔涼粉架,到時就可以日日食喇,然後再買多個老婆餅做宵夜~

歐巴桑︰咁又唔可以咁過分住成兩三個月嘅,得閒都要睇下間屋搞成點架嘛!

Ellen老師 said...

索性趁四月日本開學,讀返過短大課程嘛!得閒用上網睇下間屋搞成點架未得囉!

supageti said...

我都認為你應該乘機去日本小住一下。

maymay said...

我有一日都見到生果檔賣呢隻莓呀,好新鮮,不過我咳,唔敢買來吃~

裝修,巧驚驚!

naruto said...

豪裝呀?

藍莓好食呀,用嚟配藍妹

largeheadboy said...

老師︰短大課程乜野課程啱我呢?日語入門我驚我要留班讀幾年返唔到嚟香港喎!

意粉︰唔駛返工兼且有大把身家就話啫~

maymay︰呢期好多呢隻莓,仲賣得好平添,撈乳酪真係好得架,你都試下喇,好高抗氧化物架~
再唔裝修的話,仲得人驚呀!

naruto︰豪裝唔輪到我,大裝囉應該。
呢隻係黑莓,應該配黑啤喎~

lau2tang said...

你唔使講我知架,你只要畀底兩個月按金,一個月上期,我咪成間屋租畀你囉~

小頭 said...

我屋企道牆也有不少地方長了霉菌,我望見家中又殘又亂,都心思思想大裝,但一想到筆裝修費用就拖得就拖...
不過裝修真係死好多細胞,一定要找一個信得過的師傅,祝事事順利。
大頭哥果然有米,一年走幾轉日本仲有儲備大裝修!

galaxy said...

你份幾好喎,隨時行開一頭半個月都得 !

largeheadboy said...

劉鄧︰咁你都要畀我知幾時吉到間屋畀我架~ ^t^

小頭︰我之前仲交埋稅添呀,幾厲害呀!不過裝埋修就無乜幾多剩喇!
裝修大有大做小有小做,平平地當然都可以喇。或者會上深圳買料囉,話平啲喎。不過就真係會死好多細胞,希望嗰啲都係啲唔好嘅細胞囉!:p
牆身啲霉菌真係超級令人苦惱呀!

galaxy︰行過三兩個月都仲得添,不過就會無咗份工囉~ :p

lau2tang said...

呢個問題仲簡單!聽日好唔好?

Rempei said...

記住裝修返間豪華雀房,招呼下D老友~~~

光.軍 said...

依家去YL無乜去"B仔", 通常去"飯後甜品"多. 如果你真係要去"渡假", 不防去試試.

ROY said...

裝修果段時間,一係整個全日本制霸,又或者去上海睇足咁多日世博囉,再唔係過南非睇世界盃~

largeheadboy said...

劉鄧︰咁聽晚跟你搭 968 返屋企呀吓!

ken san︰點都係去雀會過癮啲喎,又有餐蛋麵食~ :p

光.軍︰除咗志蓮,似乎你都好熟元朗喎!真係入去住就一定要試下呢間至得。

roy︰其實“制霸”點解呢?
你估真係唔駛做咩我?雖然真係好想到時走一轉~

lau2tang said...

咁唔該你帶定十萬八萬做按金先~

largeheadboy said...

劉鄧︰邊駛咁多呀,你嗰度又唔係 yoho midtown!

lau2tang said...

喂!你打親麻雀都贏錢ge地方,唔收番你十萬八萬!

largeheadboy said...

劉鄧︰咁要入嚟再打過至知真定假~

lau2tang said...

好吖~
你就入黎試吓~
今次我實劏到你一頸血~

largeheadboy said...

劉鄧︰似乎你會喺屋企 set 晒陣報晒局喎!:p

lau2tang said...

如果我識做風水師仲使咁辛苦一早返工搵食咩~

largeheadboy said...

咁無 set 陣我就唔怕上你屋企大作戰喇~

紅米奇 said...

濕濕的3月確實悶悶
提起勁不如實踐5日4日之行
諗諗佢

largeheadboy said...

紅米奇︰快啲完喇呢啲潮濕嘅日子,不過之後就係熱辣辣嘅夏天,一樣唔係咁好受。
如果就到,一定要飛番轉呀!^^