Monday, May 31, 2010

財散……

沒想過在中轉屋我的睡眠質素可以這樣好,星期天睡到十一點才醒過來。吃過午飯,儲存好體力,就要開始我的散財行動。


崇光百貨最後一天大特賣,處處都是人頭,唯獨九樓售賣床褥的攤位冷冷清清。過分熱情的售貨員叫我不敢放膽每一張床褥慢慢試清楚,加上打算買的吸塵機又沒有額外九折,結果當人人滿載而歸之際我卻空手離開。


在時代廣場的豐澤和鵝頸橋的教協來來回回走了幾圈,終於自以為以最優惠的價錢買下三部冷氣機。額外得到的,就是一張應該快要落畫的電影戲票和一次射龍門大顯身手的機會。


裝修來到這個階段,是時候決定選購哪款水龍頭和洗臉盆了。不過,走遍駱克道每一家潔具店,拿了一份又一份產品小冊子,我還是拿不定主意要買西班牙的 roca、美國的 kohler、德國的 grohe,還是日本的 toto。


快要想到頭爆之際,還是鑽進銅鑼灣的蛇王二來個燒味飯和西洋菜湯鬆一鬆。


試了又試,也經不起售貨員的甜言蜜語,終於在直銷中心買了據稱有強勁承托兼且緊貼脊椎的床褥。新床褥長六呎三吋,以後應該不用再曲着雙腿睡覺了。


最後一站來到宜家傢俬,這次目標很清晰,就是閒時可以充當晾衫竹的窗簾架。


這一刻,尚待添置的東西還有雪櫃、洗衣機、電視機、煮食爐、熱水爐和梳化,所以未來一段很長的日子我將會十分安樂。

22 comments:

Wendy said...

你諗住買邊隻牌子既電器?

你可以去灣仔地鐵出口旁邊嗰間亞細亞睇吓, 佢啲樂聲牌電器既價錢都幾平㗎. 出示某啲會員証, 價錢會再平啲, 你可以問吓售貨員.

小妹 said...

亞細亞...我好似有折喎...你要既話...等我去問問先丫.

lau2tang said...

你啲舊電視、雪櫃同洗衣機呢?
乜全部都唔聽話要換咩?

小彭 said...

我投toto一票!

largeheadboy said...

wendy︰主要係日立同埋 sony ~
亞細亞?有間咁嘅野?雖然我冇諗住買樂聲牌,不過搵日收工去睇下都好,thanks~

小妹︰果然不愧係灣仔之友呀!我有野啱嘅話,直頭買畀我喇!

劉鄧︰之前嗰啲乜都畀晒人咁濟。電視、雪櫃同洗衣機都陪咗我十年有多,雖然仲好好地,不過都想換過晒新~
話時話,雪櫃同洗衣機都陪咗我住過三間屋,我咁就唔要佢地都好無良心~

小彭︰我其實都諗住買 toto,今日放工又行咗轉駱克道,見到一 set 水龍頭都唔錯呀!
望住 toto 嗰幾隻字,覺得自己就身處喺日本嘅公廁~ :p

naruto said...

time square買咁多野至得一張飛?你好屎呀,我上次有三張+city super coupon啦

ps:張褥六呎三吋,張床呢?

largeheadboy said...

naruto︰一張單抽得一次咋!下次叫你幫我抽喇,張戲飛都唔知去唔去睇~
張床裝修師傅做埋呀,叫咗佢預六呎三架喇~

maymay said...

水龍頭最好買德國製或日本製,東南亞製就唔好買,我入伙時買左個東南亞唔知邊度做嘅roca水龍頭,仟幾蚊,幾個月就壞左,後來換左個德國製嘅grohe,用到依家都冇事。
(德國qc是好嚴格的)

supageti said...

難得大裝修梗係換得就換啦,唔駛諗 ~~ 日本 ~~ :)

劉鄧:大頭師奶肯放手既都好極有限啦 ~~~ 哈哈 ~~~

maymay said...

煮食爐同熱水爐用番煤氣公司啦,質素好,維修服務又唔錯。

Rempei said...

幾乎所有東西都要重新購買,感覺好像是重新做人一般。
我係你就買理TOTO既自動廁所板,仲要係牆上加理個不銹鋼panel,咁每次去廁所都好似去咗日本咁開心喇!

紅米奇 said...

嘩! 好多新野呀, 新裝修+新電器傢俬, 係咪都變左新開始呢, 好彩主人都係舊主人, 電視唔肯定邊隻至好, 但LG就咪呀, 個人覺得唔夠靚~

歐巴桑 said...

華員會買電器的價格都不錯
可以試下格格價呢

largeheadboy said...

maymay︰咁黑仔?其實之用開隻西班牙唔知乜野牌子嘅水龍頭一直都相安無事,呢啲野好講手神架有時!等我聽日去問下套 TOTO 喺邊度做先。
煮食爐同熱水爐就一定用煤氣公司,因為我都唔知仲可以去邊度買,雖則我有諗過用電爐~

意粉︰日本最衰唔一定日本造喇!不過我睇中嘅洗面盆真係話日本造架~
之前部厚電視其實 OK 架,不過可惜睇唔到高清,我都好唔捨得佢架~

ken san︰真係有啲浴火重生嘅感覺,所以我無晒錢依家又要等月尾喇~
自動廁所板我唔係好慣,喺日本都好少用,所以都係咪搞喇!

紅米奇︰其實都有啲一不做二不休嘅感覺,橫掂都整咯就不如乜都整晒佢,乜都換過晒佢。電視諗住買 sony,用開覺得都唔錯~

largeheadboy said...

歐巴桑︰格價呢樣係一件超浩大嘅工程,咁啱又有同事裝修,佢又介紹咗一間網上店畀我,資訊實在太多喇!anyway,也要多謝你!或者我會去教協買,不過要現兜兜畀 cash 囉~

naruto said...

我架pansonic電視都唔錯,平過sony架

小頭 said...

想當年裝修時真係在駱克道留下不少足跡,我個陣都有去亞細亞買過抽氣扇..

sony 什麼電器都貴過別的牌子,值唔值就唔知(我捨不得買),不過電器都係買日本牌子好,韓國牌子好似容易壞,philips 的色彩和聲又唔夠靚。

裝修幾時完工呀?祝一切順利

largeheadboy said...

naruto︰其實 sharp 都好似唔錯,不過用慣 sony,覺得佢都 ok,咪繼續用佢囉~

小頭︰亞細亞原來咁出名架~
今晚又落咗去駱克道,買咗鐵閘又決定咗洗面盆,但係仲諗緊要邊款坐廁,真係頭痛呀!係喇,sony 特別貴,不過用慣咗佢嘅電視又唔想轉~
希望呢個月搞好晒喇,唔係我就唔知住邊喇。

maymay said...

我阿哥買左toto坐廁,好ok喎~
roca唔好買,有些型號沖得唔夠乾淨架。

largeheadboy said...

maymay︰roca 會沖得唔乾淨咁恐怖?
禮拜日仲諗住用 roca 坐廁,之後決定水龍頭用 toto,依家坐廁都會用埋 toto,心水嗰隻話有 CeFiONtect 防菌防污塗料,好似唔錯~

ROY said...

灣仔d野硬係覺得會貴果旺角依邊~

largeheadboy said...

roy︰其實啲潔具我冇乜點格價,呀裝修師傅包嘛~~