Friday, June 11, 2010

世界盃與我

我不踢波,對電視轉播的足球賽事也不算十分熱衷,但四年一度的世界盃原來在某程度上跟我的生活息息相關。

二十年前的世界盃在哪裏舉行我已經沒有印象,但我倒清楚記得賽事進行得如火如荼之際,我跟同學們走到中山考察。某個晚上,同學們一窩蜂走到我的賓館房間觀戰,直到夜深都不肯離開。從來都是睡覺大過天的我,最後還是敵不過睡魔,狠心把同學們一一趕出去。那一屆世界盃,還有一個令我留下很深印象的畫面,就是加斯居尼被趕出場的那一幕。


八年前的世界盃是我比較有印象的一屆,因為那年很多同事都嚷着要放假回家觀戰,而我的家也曾多次變身成為有球賽直播兼且提供各式小吃和啤酒的酒吧,招呼各方友好。賽事去到中段,我到了台北幾天。在炎熱的下午,鑽進當時開幕不久人氣非常旺盛的京華城,碰巧電視正在轉播西班牙跟另一個國家對賽,於是我跟台北人一起對着電視熒幕數十分鐘。


四年前的世界盃決賽舉行那天,我正身處北海道的釧路濕原當“行家”,身心俱疲,當然沒有看直播。第二天,我坐觀光巴士從釧路到知床,中途在女滿別機場停留個多小時。吃過飯,還沒有到上車的時間,就在候機大堂重溫昨天決賽的精華。好像是到了那一刻,我才知道那場決賽誰勝誰負。往後的幾天,日本的電視還繼續討論法國足球先生施丹的頭突き問題。


今年的世界盃是我前所未有最期待的一屆,因為當我能夠舒舒服服躺在沙發看到電視直播,就代表我終於可以回到我很想念的家。

16 comments:

Rempei said...

哦~~垃圾電郵終於入侵到blogger喇~~

maymay said...

忍耐一下,好快就可以返屋企攤响沙發睇電視架喇~^_^

supageti said...

垃圾電郵不嬲都有啦 ~~~

尋晚果場揭幕戰睇到我洽晒眼瞓 ~~~ :(

naruto said...

今季嘅世界盃最唔擾民:)

歐巴桑 said...

每到這類"大時大節"的時候總會勾起不少回憶呢

小彭 said...

只記起當年日韓期間, 我參加左第一次日本旅行團: $2999坐cx東京4天團.

紅米奇 said...

只是知隨住施丹退休,我也開始對睇球的興趣大減, 不過免費有得睇都會睇下GE, 要我比錢睇i-cable, no la~

largeheadboy said...

朋友︰唔好留垃圾喇唔該,唔知點解又 delete 唔到你喎~

薯嘜︰朋友嚟架佢係~

maymay︰唉,我依家好擔心個進度呀,呢兩三個禮拜冇郁過咁濟,而另外又有好多野未做。我開始驚七月都冇得返屋企呀!

意粉︰啲垃圾呢排越嚟越多呀!
有得睇回都好過冇得睇呀,我想洽晒眼瞓都冇呀~

naruto︰此話何解呢?

歐巴桑︰四年之後嘅世界盃我就會諗返起今時今日我喺中轉屋嘅悲慘日子啊!

小彭︰$2999 仲有得坐 cx,依家冇呢首歌唱喇!我八年前呢段日子去完台北,年尾就去咗一次日本,之後就開始瘋狂去日本,原來你都係~

紅米奇︰施丹應該係呢個丹喎,等我改返先!
頭先去咗間茶餐廳畀咗最低消費 $38 睇咗 15 分鐘波,覺得好可憐呀~

小妹 said...

新裝潢是不是都如這兒般青青綠綠呢?好fresh呀~

ROY said...

今屆開波前無乜氣氛, 我早兩日前仲唔知揭幕戰係南非對邊隊...

到而家睇左幾場波, 都係悶既居多...

naruto said...

無記無得播,咁電視劇照睇,卡通照播;

上幾屆無電視睇,悶到發毛,output都受影響呀

largeheadboy said...

小妹︰我地 blogger 呢幾日多咗好多 templates 揀,連背景都有,之前冇架嘛。綠色好舒服呀~

roy︰嘿,我今日都唔記得咗揭幕戰南非係對邊一隊喇~
悶都會繼續睇落去架喇。

naruto︰唔係呀,禮拜六晚好似冇得睇鋼之鍊金術師喇,無線成棚人無波播都喺度講波。

maymay said...

個個都換晒新衫,我換唔換好呢~~

裝修兩、三星期都唔郁,即係佢地有第二個地盤做囉,要追多d架,如果唔係佢唔會幫你趕架~

lau2tang said...

我學校班同事係波迷,唔做功課就搭唔到咀架嘞,所以,悶我都會一路上網、一路睇落去!
我另外幾位同事,仲追埋NBA添,真係唔得佢死!

萊少,
南韓同埋德國嗰場都幾好睇吖,一啲都唔悶。

galaxy said...

嘻~~~, 唔使等世界盃, 人大左, 自自然隨時都想返屋企躺在沙發看電視。

largeheadboy said...

maymay︰換喇換喇,你開卜以嚟都轉過形象,搞啲新意思好玩啲架~
我一路都有催架,不過啲櫃未嚟未有得搞,今日就終於嚟咗,仲開始上緊櫃添,不過至少一個度錯位。有排跟呀~

劉鄧︰不過都要有啲興趣自己先至會睇嘅,你平時都有捧開波架喇。我就有得睇就睇無得睇就算數。日本領先緊一比零啊呵~

galaxy︰有乜好過放咗工返到屋企即刻瞓落張梳化吖!呢一刻我好期待緊張新梳化,以後我會攤更多時間睇電視架喇~