Sunday, September 26, 2010

Day 2︰神戶から鳴門まで

從神戶坐上旅館安排的送迎巴士,一個多小時就來到四國德島県鳴門市的 Renaissance Naruto Resort。


踏進位於六樓面積有 36 平方米的客房,就被面前的露台和廣闊的大海吸引着。把頭探出露台,還可以遠眺之前才經過的大鳴門橋。房間雖然看來有點陳舊,但勝在地方闊落、光線充沛。


我們住在房租便宜一點的南館,往餐廳和浴場都要多走幾步,不過問題不大。令我們樂上半天的,莫過於這裏還提供無料的自助洗衣乾衣服務,於是原定過兩天到了岡山才舉行的衣物洗滌日,就提早在這天進行。


這裏位處海邊,風景怡人,再加上一座小教堂,自然成為不少新人的結婚場地。


旅館送上每人面值 1,000 円的代用券,供住客享用各項設施。趁還未到晚飯時間,我們租來單車到外面走走,順便為兩天後跨越瀨戶內海的しまなみ海道單車之旅做點熱身。


鳴門旋渦離旅館大概十分鐘車程,我們明天早上才坐旅館的接駁巴士前去,所以這個下午沒有必要趕着去看這個自然奇景。不過,我們還是騎着單車朝着鳴門旋渦的方向走。


把單車停放在山腳,一口氣爬了過百級樓梯,走上了お茶園展望台。行程緊迫,明天我們應該沒有時間來這裏從這個角度欣賞大鳴門橋的雄偉了。


在三十多度的高溫下,只要待在室外一會兒就已經大汗淋漓,更何況我們沒有吃過中飯空着肚子既騎過單車又攀上展望台,實在有點虛脫的感覺。回到旅館,我們立即走到面向大堂的餐廳喝杯冰凍的德島柑橘汁,補充身體的血糖,才不致於魂斷鳴門。


是我們年紀大了體力下降,還是旅館的單車有點問題,只是返回旅館一小段有點微斜的路,我們已經要出盡九牛二虎之力還幾乎想到放棄把單車推回旅館算了。這樣下去,過兩天我們是否應該按照原定計劃,花一整天在烈日下騎單車呢?


餓了大半天,終於來到晚飯的時候。訂房時可以在會席料理、意式料理和鄉土料理放題三款夕食挑選其中一款,貪婪的我毫不考慮就選擇了鄉土料理放題,因為可以一次過嘗盡四國和德島的美食。


鳴門鯛、阿波尾雞、鳴門金時、烏龍麵這些當地的名物這晚都有供應,我們當然為香港人爭光,吃過一碟又一碟。


要數這晚吃得最多的,除了是各式刺身和卷物之外,就一定是非常好吃的烏龍麵。四國以烏龍麵聞名全國,出發前曾經苦惱這次行程匆忙未必有緣吃到烏龍麵,所以當這晚看到這一大盤烏龍麵和各種不同的配料,就決定要好好吃個夠。


即使肚皮已經微微隆起,我還是要多添一碗冷烏龍麵才肯罷休。


這天累極了,飽餐一頓之後再沒有精力到旅館的阿波の体験屋台閒逛和欣賞阿波踊り,即使我們還有代用券在手,應該可以換來地酒一杯或燒鯛魚一條。


不過無論有多累,也要去泡一泡湯,鬆弛一下繃緊了一整天的肌肉。我們連氣浸了旅館的兩個溫泉,其中位於八樓的展望風呂更放進了很多德島產的柑橘,雖然沒有感覺到柑橘的香味,但還是覺得挺特別。


睡覺前走出露台,看着滿天的星宿,要是每個晚上都能夠看到這樣的星空就好了。

23 comments:

小彭 said...

住呢間Renaissance有無得儲Asiamiles架?

maymay said...

噢,咁樣叫做為港人爭光,真係唔該晒~@@

歐巴桑 said...

一定係單車的問題啦~~:-p
整個環境都很舒適呢

ROY said...

呢間酒店個環境睇落幾好喎~

largeheadboy said...

小彭︰唔好提喇,我當其時有諗過架,不過最後無咗件事。應該無架應該無架應該無架……

maymay︰我無力擔擔抬抬,係得呢樣好過人少少,由得我喇你~

歐巴桑︰我地都有懷疑過啲單車太舊又無得轉波,唔係無理由攰成咁。不過咁都好,提醒咗我地可能無能力踩足一日。
唔錯呀呢間,我地仲諗過開住窗聽住海浪瞓,不過最後都頂唔住要開冷氣。

roy︰除咗房舊少少之外,我好滿意呢間旅館呀,價錢又合理,jalan 價先至 Y11,700 一個人(九算其實都成千蚊 :P)~

TY said...

睇完你呢篇我已經好懷念鳴門啦!!! 仲好掛住枝4.3牛奶,好味既寒天....好好笑既阿波舞.. 我同朋友係呢間酒店既shop買左好多土產返香港...

你最尾果張瀨戶內海,好似我係直島看的藝術品(不過佢係黑白色)!! NICE!!!!

naruto said...

即使肚皮已經微微隆起.....請問點為之”微微“,你有唔”微微“嘅時侯架咩?

ayclui said...

樓上大叔: 我諗大頭個肚都應該有d時候係唔微微隆起嘅, 例如平卧果陣啩...^^
大頭果然好食力~ 我有諗過o架, 我打算用我自己d錢去日本,食哂佢d食物,用哂佢d水,報仇咁報呀~

lau2tang said...

當東橫Inn單人房都要收七千円樓下一晚,呢間假假地都係間resort hotel啦!一千蚊港紙包兩餐,仲有無料洗衣、仲有溫泉浸,你都嫌貴??

瘋膏 said...

Hi, 最尾温泉張相好正。

largeheadboy said...

TY︰我都好喺呢度想買啲土產,不過我地無喼喺身唔想抽住,所以無乜點買野,殘念啊!鳴門唔知會唔會再嚟 lu~
咁厲害,我啲相有大師級水準?咁我要搵定啲作品喺下次瀨戶內國際藝術祭展出先至喇!:p

naruto︰唔好玩踢爆畀返個美好形象我嗰啲未見過我真身嘅千千萬萬讀者好喎~

ayclui︰其實我瞓喺度嗰陣個肚腩都凸起架~
好有大志呀,用自己啲錢,我就諗住用返日本仔啲錢食晒佢地啲野買晒佢地啲野。

劉鄧︰仲有單車踩、巴士接送、無敵海景添,其實呢間我真係好滿意喇。當然,如果唔係九算嘅話,我會覺得仲抵啊!

瘋go︰你好呀!
溫泉啲相係喺佢地個網頁 download 架,我去浸嘅時候已經黑漆漆一片喇。

紅米奇 said...

一杯冰凍的柑橘汁好似細杯咗D喎, 夏天踏單車簡直係體力大考驗~
阿波尾雞好食嗎? 我曾係青森食過雞翼咁大把, 但已經覺不錯啊

supageti said...

每個晚上都能夠看到星空梗好啦,有夢想點都好過無夢想既 ~~~

largeheadboy said...

紅米奇︰唔駛錢嘅迎賓飲品唔要求得太多架喇,好在仲有杯冰水,唔係就更加到喉唔到肺。
青森都有阿波尾雞食架?其實都唔記得有冇食過阿波尾雞食,因為一碟一碟咁捧返嚟,沒有仔細研究啊。鳴門鯛都唔覺有乜特別吖~ :p

意粉︰起初出去望住個天,只係見到一兩粒星星,之後眼睛開始習慣了黑暗,就見到越來越多星星,成個天空都係,好靚,好耐好耐未見過咁嘅畫面。我地呢啲城市人嘅夢想係見到星空,都咪話唔悲哀~

小彭 said...

應該無架, 兩美金1里應該無你份架, 應該無架, 真係無架! 我d朋友住親d集團酒店疑似可儲里數, 一check in就問有無得儲架喇!

largeheadboy said...

小彭︰係喇,我仲喺 jalan book,應該唔會有架喇,點會仲有咁着數呢?無架喇一定……呀,兩美金 1 里,應該有成過千里喎~

supageti said...

好似係要直接晌酒店 book 房至會有哩數回贈,經 agent book/買 package 既唔會有 ~~~

Rempei said...

咁劇烈的運動, 相信都唔啱你呢D年紀架喇~~

largeheadboy said...

意粉︰係喇,我都係咁話,邊會仲有得儲 mileage 咁着數~ :p

rempei︰唉,諗住仲有丁點青春嘛!不過原來青春一早已經走咗 lu,嗚~~~

Ellen老師 said...

上回walk in 住日航関空就儲到JAL 里數囉!

largeheadboy said...

老師︰walk in 價貴咁多梗係有得儲喇,所以我都應該無得儲架喇,無架真係、應該、可能~

l.minor said...

你張藍帶紫加紅張對海相好靚喎! 另外間酒店雖然你話舊,不過都好舒服吖!

largeheadboy said...

l.minor︰嗰張我“撻”旅館網頁嘅相咋,我邊有咁好功力。
間酒店的確好舒服,我都非常滿意架喇~