Monday, November 22, 2010

尋豬記

謝謝同事以原價讓給我電子動態版的清明上河圖入場券,讓我有機會去看一直以為沒有機會欣賞的國寶級展品。沒有認真做功課,只知道清明上河圖什麼都可以不看,但就一定不可以錯過小孩追豬的場面。這個星期天,就出發尋豬去。


說了很多個星期,終於趕及落畫之前看了《告白》。在漆黑的電影院裏,一面看一面感到不寒而慄,日本的社會問題真的這麼嚴重嗎?還是只是電影(又或者應該說是小說)誇張了一點?


的確是很值得看的電影,但卻不禁令經常疑神疑鬼的我有點擔心這個星期日本之行的安全問題。我想,我應該是想瘋了。


本來可以坐機場快線直接前去機場博覽會,但為了一頓下午茶,也為了省下一程地鐵車資,我們冒險穿過地盤油站停車場和一條又一條沒有行人過路設施的馬路。


這樣做值得嗎?當全港所有茶餐廳的下午茶都是雞脾跟薯條沙律,這家卻同時有薯條沙律,多走幾步路也是值得的。


很佩服E車的司機,在機場一帶轉來轉去但卻很少走錯路。不過這個星期再到機場,我應該不會選擇E車。


清明上河圖確是很值得一看,不過人實在太多了,無法盡情欣賞。爸媽下星期也會來看,得提醒他們小心一點,不要走失。


萬眾期待小孩終於追着豬走出來,附近的人即時起哄,不停地拍照攝錄和互相研究討論。然後小孩把豬抱走消失在橋上,大家就像戲院散場般紛紛繼續往左走。


從博覽會走出來,發覺月亮也跟着走出來了。


為了得到月曆,回到市區我們去吃壽司。我們點算吃了多少碟紅碟多少碟金碟,打算一吃夠 $250 就停口,怎料結帳時發覺大大超出了預算,原來我們忘記了計算放在我們前面的那兩隻碟。


很豬啊!

20 comments:

naruto said...

真係低能仔,每舖最後都係得不償失

supageti said...

算啦 ~ 都係食左落肚啫 ~~~ :p

ayclui said...

到底邊間茶餐廳下午茶係雞脾跟薯條+沙律呢?
啊...又去日本? 玩得開心D~

largeheadboy said...

naruto︰就算真係低能仔都唔好咁大聲講吖,好 hurt 架我~
唉,因小失大呀!飽到我哩尋晚。

意粉︰咁我地計好晒數以為掂掂好架嘛,好彩無同收銀哥哥 check 單咋,唔係就燶爆~

ayclui︰呢間應該喺你屋企附近喎,可能你都幫襯過,$23 咋,鹹O七加四蚊~~
係呀,又去日本,之後返新工可能難啲放假吖嘛!

ayclui said...

即係邊庶啫? 海富? 唔怪之得張相有D 眼熟...其實你係咪成日去大角咀o架?

L L said...

呵呵,我聽日就去尋豬咯,師生共 300人呀!

歐巴桑 said...

唔緊要啦!個月曆出面買不到嘛^o^

ROY said...

你係元氣member?

卡臣 said...

豬真係好難搵到啦家陣

largeheadboy said...

ayclui︰係呀,隔離咪就係萬寧囉!我呢啲小霸王成日都泡油尖旺架!:p

laulong︰300 個細路?要跟得好足喎,走失一個半個要尋返佢地都好頭痕喎~

歐巴桑︰個月曆話有總值超過 $400 嘅優惠,我呢啲師奶梗係唔會放過喇!

roy︰係呀,我係 member 嚟架,有需要就搵我喇~

卡臣︰你搵乜野豬先?樓下街市都應該有好多架~

l.minor said...

啊~原來你去咗大角咀吃下午茶?重要係海富吃?好近我啊!啱啱上星期六,我都入咗去亞博,不過就唔係睇上河圖,而係去咗睇音樂會,都係坐E21,坐咗我成1個鐘零20分鐘

另外,告白我都睇咗,雖然劇情都唔錯,不過我就唔係太鍾意呢個戲種,都係d愛情/動作片啱我多d.

雖然唔知你係邊度行過黎(我估九龍站方向),下次可以由渡船街方向行過黎會好d,地盤油站停車場好似好危險,俾狗咬都唔好啦!

去日本玩得開心d!

lau2tang said...

仲以為你話黎搵我添~

TY said...

個calendar都幾靚喎!!!

下星期去日本邊區呀? 我都剛從東京回來,感覺上D野好貴呢!! (9.55的兌換結果..)

maymay said...

個月曆好靚呀,搵日帶我去元氣吃吖

largeheadboy said...

l.minor︰我喺九龍站行過嚟呀真係,有經過渡船街同埋狗仔公園,然後穿過個停車場,幾驚呀看更叔叔唔畀我過呀!大角咀我久唔久就會去吓架~
嗰日喺《告白》同埋《山楂樹之戀》二揀一,我就想睇《山楂樹之戀》多啲啲,但係朋友想睇《告白》,咁其實我都想睇嘅,結果大家對呢齣戲都非常滿意。松隆子好正啊!

劉鄧︰係喎,有一排無入嚟搵你喎!上次係啱啱好三個月之前~

TY︰個月曆係貪佢啲優惠券咋~
今次主要去東京,依家應該加插埋去長野扮劉德華睇馬騮浸溫泉。9.55 真係好高啊!早幾日都喺 9.3X 入咗啲貨,好肉赤~

maymay︰帶你去都得,不過唔好同德德佢地比喎!

Manatree said...

我想告白裡的社會問題無十足都有八成,只可以講放炸彈和松隆子報復那些劇情誇了點,但怪獸家長和校園欺凌應該有過之....,不過對你去旅行應該無影響就是了。

largeheadboy said...

manatree︰啲學生上堂時會唔會真係完全當老師冇到呢?如果真係嘅話,喺日本做老師就好辛苦了。好彩我地只係遊客~

Manatree said...

會,即使香港都有咁既情況,唔好講日本,而且日本啲"家教會"好惡,你對佢啲仔女嚴啲,除時連份工都無埋,不過我地做遊客既唔使深究咁多,玩得開心就ok啦!

lau2tang said...

完全同意Manatree所講,香港唔好得日本幾多,一樣有又惡又不可理喻的家長。唔信?問吓Ellen老師吖!

largeheadboy said...

manatree、劉鄧︰依家啲學生同家長都好惡,好難搞,好彩當年知道自己無本事無繼續執教鞭,沒有誤人子弟之餘也沒有為自己增添壓力。所以都係嗰句,教師真係唔易做!