Tuesday, December 11, 2007

餸貴

今天陪爸爸到醫院做個小手術,回到家裏已是兩時多。為免媽媽再頻頻撲撲走到街市買菜,我便說這天就由我充當斧頭大將軍吧。

到街市走了一個圈,買了足夠做三個菜的材料,包括有鯇魚一份 $11 、八両鯪魚肉 $10 、大半條炸魚片 $10 、豆腐一磚 $2 和一斤豆苗 $20 。我還怕媽媽會說 $20 一斤菜太貴,便騙她說才是 $10 一斤。簡簡單單的晚飯,再加上一些水果,原來也要花上近一百塊。



平時我很少到街市買菜,不太知道米價,所以近日新聞經常說百物騰貴,米貴了豬肉貴了,都似乎與我扯不上關係。不過事實上,通漲真的在慢慢蠶食我的人工,公司附近的快餐店的燒味雙併飯,最近便悄悄地由 $29 漲到 $30 。我想,最能夠親身感受到物價颷升的,就是像我媽媽每天都會逛街市的人。

今天報紙有一個海味公司的全版廣告,吸引我的不是什麼鮑翅只賣 $68 ,而是海味公司利用了部分版面呼籲政府應該增加老人家的生果金,讓弱勢社群可以應付現在百物騰貴的環境。



姑勿論海味公司這做法是否一種噱頭,但這種關懷社會上被忽視的一群、為他們爭取權益的做法,我實在很欣賞。好,就找天買罐鮑翅給媽媽加料。

21 comments:

supageti said...

你負責打斧頭,大頭媽先係伙頭大將軍嘛?

supageti said...

仲有,味味都係魚 …

galaxy said...

我仲用緊報紙來舖檯的, 多年習慣好難改, 哈哈哈

lau2tang said...

以前做一餐三餸晚飯我通常要用三十元;現在差不多要五十元才可以。最貴是雞蛋和海水魚,紅衫魚竟然賣到2蚊至3蚊一兩,真是食養斑都唔駛咁貴。份粮越來越唔見駛。

largeheadboy said...

意粉︰我冇打斧頭呀!^t^
本來想買些豬肉,但去到肉檔唔知點買又覺得好混亂,咪改買魚片囉!食魚好過食肉吖嘛!

galaxy︰我一個人食飯都會用啲信用卡宣傳品呀廢紙呀來舖檯,不過就好少用報紙,會甩油墨落張檯架!

劉鄧︰我有印象話依家雞蛋要成兩蚊一隻,係咪真架?咁街邊的鹽焗雞蛋才十蚊四隻咪好抵?
依家乜都貴,一頭家的開銷真係好大!下個月仲要交稅添!>_<

Roy said...

三味食送都係魚既?

而家好多時出去買外賣抵過自己煮~

lau2tang said...

我通常幫襯街市買開的雜貨舖買荷蘭蛋,半排十五隻從前只要七、八元,現在加到十一元。
我呢個月要幫Winnie交下學期學費,咁又唔見二萬三,今次旅行都喺慳啲好喇。

光.軍 said...

真係糖又加鹽又加.成日咁加由佢話。你餐"好魚"晚飯都好花心思喎 :P

Ellen said...

今次旅行有人分攤,加上日元高企,應該都會好慳喇~~~

supageti said...

大頭:新鮮肉點都有益過炸魚片 …

largeheadboy said...

roy︰真係呀!早兩日煮意粉吃,買了些雜菌、西蘭花和番茄便用了六七十蚊,同去大x樂冇乜分別。之後仲要洗碗哩!

劉鄧︰荷蘭蛋半排 $11 雖然貴咗好多,但都仲可以接受啊!平時在超市買一打大陸蛋也要成 $12 !
交學費可以簽卡儲 mileage 呀!尋日碌了萬幾蚊,竟然醒唔起用張 cx 卡!

光.軍︰人工都係咁加就好喇!我買完餸才發覺成餐都係魚……

ellen︰日圓高企唔係應該開支更大嗎?睇嚟跟住呢幾個月要慳啲駛了!

意粉︰咁又係喎!但係我又怕叫佢切十蚊豬肉佢話少唔做我生意呀!

lau2tang said...

如果手頭上的潛水股票,好似啲荷蘭蛋咁升咁多就好囉~﹝我今晚食多咗大頭菜添!﹞

largeheadboy said...

股票仲潛緊水就由得佢地喇,當冇咗都好架,等某日見返家鄉,你就會突然覺得自己發咗達!^t^

Ellen said...

無得瘋狂shopping啦~~~

supageti said...

十蚊豬肉唔算少喇。

largeheadboy said...

ellen︰好彩仲有啲 6.6 入嘅貨!

意粉︰早幾年我試過話買五蚊叉燒唔肯賣畀我呀!有陰影呀!>_<

supageti said...

五蚊叉燒?梗係唔賣啦!

Roy said...

5蚊叉燒?廿年前都唔賣啦!

maymay said...

既然世界咁艱難,好啦,今次就免收手信,等你地慳番筆啦。

Ellen said...

大頭話買芝士蛋糕周圍派呀!

largeheadboy said...

意粉、roy︰有生意一蚊都要做喇!我仲記得嗰日諗住買少少叉燒炒蛋,十蚊又好似太多,最後咪直頭唔買。唔係呀,廿年前應該仲五蚊叉燒賣架嘛?

maymay︰你呢招以退為進好犀利喎!^t^

ellen︰你都要入啲貨先至可以周圍派架!^w^