Tuesday, August 12, 2008

第六日在馬德里

為了坐九點半的飛機,這天沒有享用旅館提供的早餐就要退房。不過,我知道我一定會再訪這家位於亞皆老街的旅館,只是不知道會在何時。



在飛機等候起飛期間,剛好看到我們的行李正運送到機上。倫敦,暫時要告一段落;兩個多小時後,我們來到馬德里 Barajas 機場。



落成才兩年的 Barajas 機場第四航廈是現時全球其中一座佔地最廣的航廈,我就從沒有花那麼多時間從飛機走到領取行李的地方。不過大又不一定代表是好的,我們等了接近半個小時才領回行李,或者機場職員都午睡去了。



話說回頭,馬德里的地鐵系統卻不得不讚,除了方便快捷之外,一張可以坐十程的車票也只是 6.70 歐羅。在一罐汽水可以賣 2.50 歐羅的地方來說,這算是十分超值。



在馬德里的這三天,我們都住在市中心 Puerta del Sol 太陽門附近的 Hostal Comercial。這家旅館很受背包客歡迎,很早就爆滿,原因不外乎地點超好、房租相宜、乾淨企理。令我最感動的,莫過於房間外面的小露台。



安頓好後,我們就展開西班牙的行程,不過首站不是到什麼皇宮什麼博物館,而是到 Atocha 車站預訂幾天後的火車票。可是不知怎樣搞的,在票務處輪候的人超多,但開放的櫃檯卻只有兩三個,結果我們花了將近三個小時才訂妥兩程火車票,半天寶貴的光陰就這樣溜走。



Atocha 是馬德里最大的火車站,幾年前曾受到恐怖襲擊,造成嚴重傷亡。今時今日,這個猶如一個巨型溫室的車站當然一切已經回復正常,每天處理成千上萬的旅客。



之後我們回到太陽門這個馬德里最熱鬧的地方之一,聽聞這裏扒手的數目也最多。不過在西班牙的這幾天,倒覺得這裏的治安問題不算太嚴重,人們都來得熱情友善。



沿着 Gran Vía 大街,邊走邊看很快就來到 Plaza de España 西班牙廣場。這天廣場有部分地方圍起準備三人籃球賽,而面向廣場馬德里其中一座最高的建築物西班牙大廈也碰巧正進行修葺。



我們有想過參觀不遠處的皇宮,但經過一輪折騰後什麼都關門了,只可以在外面拍照。這裏的警衛不太好惹,當知道被攝入鏡頭後即時怒視着我,嚇得我拔足而逃。



即使已經是七八點,陽光仍然很猛,開始缺水的我們看到路旁的雪糕店就馬上衝進去。



西班牙人的晚飯時間一般在九點後才開始,來到這裏我們不得不入鄉隨俗,況且在陽光普照下吃晚飯感覺也怪怪的。這天不太順利,我們決定晚飯要吃得好一點,對自己好些,於是就不理會 Plaza Mayor 主廣場的餐廳以宰割遊客聞名,挑了一家客人蠻多的露天餐廳。



這頓飯不能說特別好,但能夠在歷史悠久的主廣場一面喝着 sangria 一面看着夜幕除除落下,什麼也是值得的。

24 comments:

娜娜 said...

日頭長啲時間都好似見使啲.

largeheadboy said...

真係極度見使呀,晚晚十點十一點至肯返旅館,因為冇理由八九點日光日白就返歸架嘛 ^g^

supageti said...

兜海鮮飯黑媽媽 ~~

largeheadboy said...

呢款係墨魚汁吖嘛!不過呢碟又真係唔係好得,好乾又得個鹹字,不過坐得舒舒服服,算佢喇~~

roy said...

出車飛要等三粒鐘! 嗯...都係日本好~

經過依個暑假對馬德里好反感...

光.軍 said...

可唔可以介紹一下日光日白食o既晚餐其中o個碟"黑色疑似蝦"o既主菜呢... 驚驚ing..

小彭 said...

晚餐個環境好舒服喎!

歐巴桑 said...

歐洲的汽水真係貴到離奇!

largeheadboy said...

roy︰我都唔知點解,攞咗飛仔叫極都輪唔到你,又唔走得開,焗住喺度等,日本邊有咁架,嗚~~
點解唔鐘意馬德里呢?我幾鐘意喎話時話。

光.軍︰呢碟係墨魚汁西班牙炒飯呀,黑 mun mun,真係有蟲都唔知呀~~

小彭︰呢餐個環境真係好得架,仲有人喺你面前拉小提琴,好有氣氛。最後畀咗五毫子歐羅佢。

歐巴桑︰係呀,真係貴到唔駛本呀。不過有時渴到你傻嘅時候又要焗住去買。嘩,未試過罐可樂咁好飲架!^d^

maymay said...

你同蟲蟲最有緣啦,可能已經食左落肚lu,哈哈~~

largeheadboy said...

maymay︰我冇有怕呀,蟲蟲至營養豐富呀,唔係邊得我肥肥白白呀!^e^

supageti said...

超級自戀狂!!

ROY said...

因為依期皇家馬德里好X煩!

maymay said...

牙擦擦,早知影低你上次見到蟲蟲個驚青樣啦~~

largeheadboy said...

意粉︰肥肥白白之嘛,我又唔係話自己係帥哥。^t^

roy︰咁咋,仲以為乜嘢添!車仔都好似好煩喇!

maymay︰上次嗰條點同,成尺長咁濟,仲見唔到尾添,驚驚~~

supageti said...

唔係話自己係帥哥至叫做自大既,呵呵 ~

小彭 said...

拉小提琴?! 我邊樹咁有文化呀, 都係襯你多d, 又帥又有文化

supageti said...

小彭:有人真係會信以為真嫁,哈哈。

largeheadboy said...

小彭︰唔好成日大庭廣眾咁讚我喇,我臉紅架 :p

意粉︰有時畀人氹吓麻醉一吓自己都得啩~~

supageti said...

〔托眼鏡〕。。。。。

小彭 said...

我講事實咋嘛... (等帥哥繼續醉啦!)

largeheadboy said...

哈哈,咁搞法,未見過我的一定以為我型英帥靚正啊!^t^

貝拉 said...

我都覺得夏天去歐洲D時間見駛D, 你去的地方我都去過晒, 皇宮個日仲有騎馬睇, 但我只在大廣場喝TEA, 晚餐去了朋友介紹的餐廳, 吃了些特式菜, 不錯, 但在這裡買了很多ZALA既衫同兩雙西班牙BOOT.

largeheadboy said...

貝拉︰歐洲始終都係夏天去好啲,冬天太灰太蕭瑟會搞到個人好 down 架~~
我都有諗過買 camper 鞋,但係又唔覺好平,就費事抬返嚟囉。不過 zara 同埋 h&m 就真係好平啊!