Monday, December 08, 2008

星期日的米芝蓮

上星期公布的香港米芝蓮餐廳,很大部分都是非富則貴的上等人飯堂,我等一介草根當然不會經常有機會光顧。不過,我又不會因為少上那些一二三星級食肆而發愁,更加不會因為曾經光顧過其中一兩家而沾沾自喜。貴的不就一定是好的,便宜的也總會有值得欣賞的地方。昨天隨便走進幾家食肆,都換來非常良好的感覺。

第三次來伊呂波午飯,但多心的我每次都只會點那個排場十足的的伊呂波定食。除了燒肉之外,這個定食還有刺身、泡菜、茶碗蒸、天婦羅、味噌湯和雪糕,豐富得好像永遠都吃不完似的,叫人滿心喜歡。把鞋子脫下,坐在榻榻米上毫無拘束地吃着微焦的燒肉,很幸福耶。


微涼的午後,躲進客人還不算太多的 Habitu,兩個人就點了兩杯加上奶油的 mocha。我們坐在彷彿與世隔絕的角落裏,在對面大廈反射過來的陽光中,呷一口珈琲,然後閒聊幾句,又或者呆看着外面的汽車和行人,不知不覺百多分鐘就這樣溜走了。


在銅鑼灣找東西吃,可以是件很頭痛的事,因為什麼地方都是人頭湧湧,同時也要有準備坐得不會太舒服。這晚正在煩惱之際,眼前就出現了曾幾何時經常光顧的沙嗲王。我們坐在很闊落的卡位,點了味道依舊很不錯的咖哩豬扒和挺飽滿的牛油雞翼,很快就扒光了一碗白飯。


其實只要吃得開心,再加上有好的食伴,在我心中每一家都可以是星級餐廳。

24 comments:

lau2tang said...

係架~食伴好緊要架~
佢會搶走你的美食,又或者將不大好吃的,推到你的面前~

Anonymous said...

真的, 食的開心就好啦!

今日那碟令我地笑不停口的risotto都值的摘星啦.

(btw, 回去時見到兩大門神...好驚呀! 人真的不可做壞事...)

Anonymous said...

沙爹王既白咖哩豬扒飯係lunch賣飛佛~

maymay said...

好悠閒的一天啊~
祗要是兩個人便好!^^

supageti said...

齋睇都開心呀 ~~

Anonymous said...

食伴真係好重要
被迫參加的奄悶飯局就是吃龍肉都無味呢

largeheadboy said...

劉鄧︰我知你對我好好嘅,就算只係得五粒炸蠔都會畀一粒我。嚟緊年末年始我一定會好好報答返你架!^t^

小妹︰係喇,有冇可能碟飯少得咁過分吖,就算女仔都要起碼食三碟至夠喇!好彩堂主割咗忽肉畀我頂吓肚咋,唔係下晝又血糖唔夠喇!
我今日都搭二至返到公司,好彩老闆仲未開房門啫~~

roy︰白咖哩都好好味,不過我覺得普通咖哩汁撈飯仲正。尋日同朋友仔講開,其實可以叫 $8 一碗飯,再加多 $10 咖哩汁就可以搞掂一餐~ ^t^

maymay︰尋日真係好正,全程都好舒服,每一餐都沒有可以投訴嘅地方。如果唔係要去廁所,我諗我地可以在 habitu 坐到天黑啊。

意粉︰冇乜特別節目悠悠閒咁過一個周末就最開心了。好財尋日冇去電腦節同人逼啫~:p

歐巴桑︰有理想的食伴,就算啲嘢幾難食都已經係次要啊!
年尾喇,奄悶飯局陸續出籠喇!如果有人照嘅話就搏命食返夠本喇!^v^

Anonymous said...

今晚呢個$14.5土瓜灣古早味北菇蒸鮮雞飯真係好味到暈,雖然都係一個人響屋企食,但如果唔係剛才同舊同事們小聚,就唔會有人車我去買車埋我番屋企,所以o係我心目中呢餐都係開心的一餐.

其實開心有時好簡單.

但中到六合彩就更加開心.^^

Anonymous said...

午餐割肉, 晚餐要買番半隻燒鴨補數.
(係咪有人會book定神奇的意粉店呢?)

largeheadboy said...

lala︰嘩,你講中咗我嘅心聲呀,我都要求好簡單架咋,都係中返一兩期六合彩就得架喇~有時唔需要大魚大肉和牛鮑魚,一碗餐蛋麵就可以回味無窮,中嗰下就中架喇!
不過話時話,古早味有冇怪味?

堂主︰你捨身成仁,好偉大呀,此恩此德,就留待喺東京償還喇!
唔,神奇意粉店呢家嘢,就等你參加完紅白返嚟先喇,我會做嘢架喇~

Anonymous said...

好, 我會記住... 總有一次機會晌東京相遇的嘅! 就去餃子城啦!

Anonymous said...

古早味冇怪味呀,咪就係舊史o個o的味囉!

largeheadboy said...

小彭︰係嘅,仲要行埋 kiddy land 呀淺草雷門呀阿美橫吖嘛~ ^t^

lala︰咁下次就整番個古早味鳳爪排骨飯喇!

光.軍 said...

跟朋友嘻嘻哈哈到處搵食 樂趣多過靠一本書指東指西而食.. 你杯"莫卡"好Creamy 好似好好味咁喎 :D~
草根們Cheer :) 

Anonymous said...

個間野叫明珍美食,街坊評語幾好喎:

http://www.openrice.com/restaurant/sr2.htm?shopid=12616

largeheadboy said...

光.軍︰加咗 cream 成杯珈琲都更滑更 thick,當然就肥仔啲喇,不過有乜所謂吖,最緊要開心嘛!^t^

lala︰有印象喎呢間,鱔稿王以前好似介紹過喎。搵日收工都可以落車幫襯下~

Anonymous said...

呢間"蒸飯店"我都食過一次喎, 不過我係食蒸魚同客飯個D囉! 親切街坊小店黎架, 個次食唔晒d野, "被迫"打包拎走.

Anonymous said...

親切街坊小店呀吓 ... 個地點都幾唔容易尋找o架 ......

話說我買飯個陣阿叔顧住兩隻街坊貓o既晚餐,都唔係好理我,不過我都顧住睇貓,可能司機已經有o的唔耐煩,好彩一早送左愛心小禮物補數.^^

去左OK換野未?

largeheadboy said...

小彭︰我都想我屋企附近都有一家這樣的食店,今晚諗唔到食乜就外賣一個滑雞飯咁。屋企樓下只有一家普通過普通的茶餐廳咋~~

lala︰有貓睇又唔同喎~
同埋一個飯好快就走得喇~
尋日有諗過一次過換晒佢,不過收咗工又唔記得咗 lu!:p

Anonymous said...

咁呀... 間舖頭都好有性格呀... 都OK易搵啦, 起碼附近有大街又燈光火著. 同埋佢D蒸飯係一輪輪咁出, 可能會無心水.
我換左隻雞... 俾人... 不過隻熊真係點睇都無日本個D咁かわいい。

supageti said...

話時話我未食過伊呂波,幾時帶我去見識下?

largeheadboy said...

小彭︰其實我超喜歡吃北菇滑雞飯之類的蒸飯。記得當年在新蒲崗返工,成日都幫襯一家有蒸飯又有甜品賣的小店。我仲記得北菇滑雞飯賣 $14 咋,啲雞仲啖啖肉無骨架,之後再加碗紅豆沙就超級滿足啊!
換咗雞雞畀人?唔係送畀我啊呵?^t^

意粉︰我覺得伊呂波食得開心過和宴,選擇多好多啊!同埋,同一大班人坐在 たたみ上面,感覺好 warm 好日本。你想去的話就 call 埋我喇~~

Anonymous said...

隻雞雞比你都唔好要啦, 都唔かわいい。日本o個d好... 唉... 本來晌ナゴヤ的デパート
有個展覽, 不過到25號咋, 趕唔到.

largeheadboy said...

小彭︰我識得睇ナゴヤ同埋デパート呀!不過點解ナゴヤ用片仮名嘅?
唔係吖,雞雞都好かわいい呀!咁,我要靠自己換晒佢地成家返嚟!^_^