Saturday, December 13, 2008

北上尋歡

數一數,原來自己有五六年沒有到過深圳。那時候,我的膽子還挺大,試過在羅湖過關後一個人打的到東門跟比我早到埗的友人會合。今時今日,我真的再沒有這份勇氣了。要不是友人極力推介深圳福田新開幕的香格里拉酒店裏面的自助餐廳 Café Zen 有買四送一的優惠,還有比橡皮擦還要大的帶子,我想我還是會繼續留港消費。

這天早了一點下班,然後乘坐比平日上班的地鐵還要擠的火車北上。我們這一眾港燦在上水站出閘,過了一分鐘後再入閘,一來一回,就省了幾塊錢,算是幫補一下算是很昂貴的車費。


落馬洲站很新很寬敞,還有落地玻璃讓你觀看外面的漁塘和間中飛過的雀鳥。


在這裏過關,的確比在羅湖舒適得多,不但人沒有那麼多,關員的態度也很不錯。事實上,從落馬洲來到福田,完全不會像羅湖在那邊感受到那很強烈的文化落差。


不知何故,原來深圳的地鐵站是不可以拍照的。舉機拍過幾張相後,就有職員前來提醒我。從前我在北京、上海和廣州坐地鐵,從來沒有人阻止我拍照。究竟,深圳的地鐵有什麼與別不同的地方呢?


福田是深圳的新開發區,感覺很現代化,街道也十分乾淨整齊,完全不像羅湖那邊混亂,令人提心吊膽。我們在會展中心站下車,再走幾分鐘就到了福田香格里拉酒店。


很奇怪,酒店大堂也不可以隨便拍照,結果沒有拍下那巨型的聖誕樹。這天餐廳幾乎滿座,沒有訂位的我們獲安排坐在吸煙區,幸好附近只有一個人在抽煙,影響不算太大。


餐廳供應的食物包羅萬有,除了沙律刺身生蠔海鮮各式熱盤外,還有即時烹煮的 counter,只要遞上放在枱面的捧子,說好你想吃什麼什麼,沒多久新鮮熱辣的食物就會送上前來。


哈哈,友人一再推薦比橡皮擦還要大的帶子果然名不虛傳。


或者是高級酒店吧,這裏的服務員大都很有禮貌,臉上永遠掛着笑容,又不停跟你說“謝謝”、“晚上好”。然後他們來跟我們清理碟子,我跟他們說“麻煩你”,他們又會說“不用客氣”,整個過程感覺非常良好。我想,香港那些皮笑肉不笑的服務員還是多上來培訓一下吧。


這裏的甜品也非常出色,擺設就好像高級餅店一樣。


來來回回,這晚所吃的甜品數量應該比以往在香港吃自助餐時多得多。


扣除優惠,這頓吃得很滿意的自助晚餐每人才不用二百塊,消費還可以累積到 asia miles 的帳戶裏,十分划算。離去時看着這個跟我從前所認識完全不同的都市,我想有機會我一定多北上來尋歡。

19 comments:

lau2tang said...

呢度近過我去銅鑼灣喎~
幾時帶埋我去尋歡呢?

supageti said...

間中上去行下都好嫁,不過係大陸做野既同事叫我唔好去東門,話依排治安又差番。

Anonymous said...

我晌九龍站都有比有阻止過唔比影相喎, 個職員講左一堆野但我聽唔入耳!
到目前為止, 我都唔敢一個人晌深圳搭的士, 一個人的活動範圍, 就只限地鐵沿線. 東門, 我點都唔去(一班人都唔去).

Anonymous said...

事實証明當周邊地方不斷進步時,香港不只沒有一同進步,還在退步中!

maymay said...

真係好多野食喎!
香港嘅服務業,唉,算把啦(除左沙士時代好少少外)!
我都N咁多年未去過大陸咯~~

Anonymous said...

深圳都有好多年唔敢去呢
看來要找機會去看看啦

Ellen老師 said...

尋歡~~~都好喎~~~

largeheadboy said...

劉鄧︰係喇,你咁近,隨時都可以上去抽啲豬肉呀棉胎呀洗頭水落嚟喇~
你想幾時上去就通知我喇!^r^

意粉︰福田呢邊企理好多呀,行得好舒服,下次有機會想行下啲書局呀 cafe 呀咁囉,我呢啲文化人嚟架嘛。^g^
就算當年我在東門一帶出沒,雖然人比較多混亂了一點,但都覺得還可以,只是要經常留心自己的財物。至於依家東門係點,我就唔清楚 lu~

小彭︰九龍站都唔畀影相?乜事呀?唔通又係私人地方呀?
諗返起當年我都覺得自己好勇,一個人車咗你去邊真係唔知道啊!當年深圳又仲未有地鐵~
東門好恐怖咩?難道你試過找錢找回一堆白紙回來?

薯嘜︰我真係覺得大陸越嚟越得,單係講城市規劃都已經做得比我們好,很有大都會的感覺。香港一式一樣的屏風樓很無生氣,反而在內地我仲見到更大片天空。

maymay︰啲服務員殷勤有禮到我直情覺得自己喺日本添呀。香港仲成日話自己點樣點樣,算吧喇!
我地組團北上尋歡喇真係!^t^

歐巴桑︰福田呢邊我覺得真係可以一去喎,邊防同地鐵基本上又連在一起,十分方便,感覺也很安全。我地呢啲港燦,有機會真係要上去見識一下祖國嘅偉大啊!

老師︰上去喇,淨係買啲日本語嘅書都回本喇!話時話,你都應該幾熟上面個呵~~

Anonymous said...

好有誠意喎, 專登北上尋食, 我都是對大陸無信心, 所以至今都無話會北上, 都是怕治安問題

Anonymous said...

”我們這一眾港燦在上水站出閘,過了一分鐘後再入閘,一來一回,就省了幾塊錢,算是幫補一下算是很昂貴的車費。”

團友們,我好幾次都想出聲 ......

”消費還可以累積到 asia miles 的帳戶裏”

有人應該眼睛放光.

”我想有機會我一定多北上來尋歡。”

係唔係真先?食唔食得辣?

supageti said...

我都試過幾次o係商場影相俾啲實 Q 制止,連o係日本都試過,整整下依家影相有啲驚驚。

largeheadboy said...

紅米奇︰香港治安問題都唔好得去邊呀!尖沙咀銅鑼灣旺角成日都咁多人,行親街我都要夾實自己個袋呀~
我諗開頭一定要多啲人一齊上去,有照應吖嘛。同埋,上吓去,真係可以去見識下。

lala︰我地搭去羅湖嘅車,然後在上水出閘,剛好搭到下一班去落馬洲嘅車,時間配合得好好。慳咗幾蚊,夠搭深圳地鐵有餘呀!下次你唔好理啲團友啫!
辣我唔係太得,不過有得北上就得架喇~ ^t^

意粉︰我覺得今次喺香格里拉唔畀影相真係好奇怪,咁我可以喺度住架嘛!所以有部有影相功能的電話其實幾好,冇咁揚吖嘛~

Anonymous said...

我都無需要晌上水出閘... 如果有必要咪出聲囉... 不過次次都時間緊迫... 要等一分鐘架... 秒秒都上落好大喎... 下次北上都係唔好預我喇!

我... 我... 我尋日真係又溫左一次asiamiles的食肆名單...

Anonymous said...

上水出閘...呀~係喎! 好似係有得平d果喎...lala你下次提吓我啦.

哎...我本來想係name打自己係"領隊"架...家下點敢o者?

我都係文化界架, 下次北上"行下啲書局呀cafe呀咁囉" call埋你, 好嗎?

largeheadboy said...

團友#1︰上水出閘好呀,除咗慳幾蚊之外,仲可以幫啲水貨客帶返啲洗頭水奶粉上去,賺番啲水腳嘛~
呢日我得到成 500 里,好開針啊!

小妹︰你好熟上面架步架嘛,你唔做領隊邊個做呀?
除咗行書局去 cafe,我呢啲文化人仲會關心祖國經濟發展,順便會去埋家樂福抽幾條廁紙落嚟推動一下消費架~ ^t^

Anonymous said...

去埋家樂福抽幾條廁紙落嚟 ... 咁就啱喇 ... 我下次打算去買Shiseido洗頭水同薰衣草廁紙 ......

小妹領隊,下次食乜?

largeheadboy said...

lala︰薰衣草廁紙?聽落幾吸引喎!不過呢,啲薰衣草係產自普羅旺斯、北海道定華僑城先?

Anonymous said...

真的很不錯呢! 尤其是甜品...

largeheadboy said...

貝拉︰呢度嘅甜品確實很出色,我食完一次又一次啊!又想再北上添~~ :P