Thursday, December 18, 2008

勉強します

今年日語班的最後一課本應是在大除夕那晚,但是那天適逢我在日本遊學途中,所以昨晚的就是今年最後一課。好了,終於可以把幾乎每日都放在身邊的課本暫時擱在一旁了。


我承認自己是個懶散的人,除了缺乏動力之外也沒有什麼自制能力。現在每天下班回到家裏,雖然明知要溫習和做家課,但我還是只顧對着電視和電腦的屏幕,一時追看電視連續劇,一時看看網誌和到訪各大大小小討論區,直到累了要上床休息都不會拿出課本來翻一翻。

結果,我總是等到死線臨近前一刻才肯抽出一兩個小時來鋤書。有因就必有果,現在我不但還沒有搞好五十音,還漸漸被其他同學拋離了。我就曾不只一次因為不懂怎樣回答せんせい的問題,腦裏只有一片空白,在同學面前大出洋相。的而且確,家裏又實在有太多比書本更有趣的東西令我無法專心了。為了不想跟同學的距離越來越遠,我必須想想辦法。

於是某個周日下午,我就帶齊裝備,來到灣仔的這家珈琲店,在沒有太多干擾下從日曜日到土曜日、從おととい到あさって、從食べます到寝ます,很專心地複習了個多兩個小時。然後那個星期的日語課,我總算順利回答到せんせい的問題,連帶自己的信心也回來了。


星期二晚上,下班後我又一個人來到這珈琲店,一面喝着珈琲一面預備這個星期的測驗。

我對現在這位せんせい已經沒有太大好感了,要是連自己也不用功一點,我想我很快就會放棄。新年回來後不久又會有年中考試,或許到時每天晚上都要泡珈琲店了!

23 comments:

supageti said...

咁即係搞好五十音未呢?

largeheadboy said...

意粉︰即係仲未呀!平仮名仲叫做好啲,片仮名就好唔得呀~

supageti said...

要搞好依瓣先喎,哥仔 ~~

maymay said...

藉口!出街咪仲多引誘,你想嘆啡之嘛!

maymay said...

個せんせい好樣衰架?

Anonymous said...

今天請了假打算偷偷留在家中勉強
搞下搞下都仍未打開課本.....

lau2tang said...

哥仔,
你依家先知讀書有壓力喇~
俾心機啦~

Anonymous said...

o個時我問親書都唔識架, 又唔比心機, 所以我家下d生字又唔識, 發音又唔準.

咖啡店都係我做功課同溫書嘅地方. 晌屋企咩都做唔到.

Anonymous said...

自知都是懶鬼同記性唔好, 又無語言天份
所以至今都唔敢報名去讀, 曾自己學下50音
結果足3個星期後就讀完都忘記lu, 點搞?

largeheadboy said...

意粉︰其實要再溫習五十音都幾困難,因為每個星期不斷教新嘢,要溫都溫咗剛剛教的東西,所以依家就希望睇多啲可以記埋嗰五十音囉。
教得實在太快了~

maymay︰我係咪都要出街架喇!
呢位せんせい好大細超,叻嘅同學(即係那些其實可以考三級的)就好鍾意,成堂都望住佢咁濟,又成日同佢傾計,其他同學(即係我囉)可以成堂沒有眼神接觸,搞到我好似唔關事搭枱咁,完全感覺唔到有交流。有個比較多咀的同學成日問問題,佢可以即刻黑埋口臉,我覺得咁樣好唔得囉。

歐巴桑︰咁乖呀,又要測驗嗎?希望你最後無掛住煮飯畀大叔食冇溫習到喇~
大家都要繼續努力勉強落去啊!

劉鄧︰我不嬲都話讀書辛苦架喇!依家搞到成日覺得有啲嘢(即係溫書呀做功課呀)未做好咁,放工休息都有啲嘢牽掛住,好似休息都沒有那麼盡情。唉,真係攞苦嚟辛啊!

小彭︰咦,咁我可以朝你呢條路線走喎~ ^_^
係呀,屋企完全溫唔到書呀!除咗珈琲店,我遲下應該會進駐埋圖書館!

largeheadboy said...

紅米奇︰你同我好似喎!我之前好似你咁諗,但係覺得去得日本多,很想更加投入知多些,所以最後都報咗日文班。或者你可以報下一些比較輕鬆的興趣班,我地呢類懶人,可能會適合啲~~ :p

Anonymous said...

大頭,唔駛咁無心機喎,五十音我都係未惦檔,有我陪您!

話時話,我都係時候要用些時間谷谷佢!

lau2tang said...

Rempei,
唔通你又就快飛?

Anonymous said...

我都想,尋晚仲諗緊過年時係咪要快閃幾日!但係實在好~~~~貴,真痛苦~~

largeheadboy said...

薯嘜︰最衰係,大部分同學表現都比我好,我開始覺得跟唔上,而且成日都要睇好耐至讀到啲仮名出嚟,仲要成日都讀錯,好大挫敗感啊!
算喇,不如等多兩三個月復活假至去喇,平一截啊~

Anonymous said...

丟低書包N年咁耐, 要再重拾書本真係有難度架~

Anonymous said...

走我呢條路線好呀, 我正正式式個d就讀左兩年啦, 你咁聰明, 年半得啦! 不過話時話, 我晌會話班先生成日讚我, 衰在真係唔記生字(你讀緊個d我真係有d都唔識), 如果唔係仲叻呀! ^^
其實, 自修室我都去過下架!

Anonymous said...

我覺得溫書要在圖書館至係王道呀, 有時我會朝十晚十添呀, 不過當然也有偷走去book上網鬆一鬆啦. 係cafe溫書會肥死人架! ><

Anonymous said...

日文, 總是距離我那麼近, 又那麼遠!

Ellen老師 said...

大頭~~
來日本幫你補習!

largeheadboy said...

roy︰係呀,再加上依家咁嘅年紀,腦都實晒,要花上加倍精神和努力。所以我覺得我地好叻架~ ^t^

小彭︰咁相反,都會有好多生字你識我唔識喇。
我資質同你差唔多架咋,不過我諗我一定懶過你好多囉。我姓賴架,如果依家個せんせい係第二個,或者我會更加投入成績會好啲

小妹︰我真係研究緊遲下收工去圖書館溫架,不過我好多年冇去過喇,唔清楚依家個架步係點,有隱秘啲嘅枱個呵?唔駛同啲刨報紙嘅叔叔爭位個呵?

joeyee︰其實你可以令到日文成為你生活嘅一部分架。我諗以我依家識少少あいうえお,呢次去日本就可以扮吓代表。你都去學喇(不過去報工聯會可能會舒服啲)~

老師︰咁夜呀你~
我都好想快啲過去呀!蛋禾呀!

naruto said...

加油啦!係唔易架啦!

largeheadboy said...

naruto︰希望我捱到落去喇,睇住畀咗幾千蚊嘅份上~~