Thursday, January 20, 2011

團購熱

精打細算、貪小便宜、事事算盡、貪得無厭,往往繼而因小失大如我者,墮進團購的深淵是遲早的事。剛過去的一個月,參加了兩次團購,算是很克制吧。

去年農曆年前,有想過買囍宴的蘿蔔糕,但一直不了了之。之後某天下班後造訪,一心想買的蘿蔔糕已經售罄了。

早陣子在開飯網站看到有囍宴的蘿蔔糕團購活動,覺得價錢合理,就乖乖奉上個人資料,然後就換來這幾張換領券。原來團購是這樣簡單的一回事。


我某個專責商務往來的電郵信箱現在每天都會收到另一個團購網站的優惠通知,不過我對那些白金鑽飾和美容護膚興趣不大,那些優惠通常看過便算。直到上星期看到 Triple O's 的半價現金券優惠,我就忍不住立即註冊成為會員。


早兩天現金券第一天可以使用,我就急不及待跑到公司附近的分店,才發覺原來跟我一樣精打細算的大有人在,每位顧客都手持着現金券,擠滿整間店子。難怪報道說這次團購活動是該網站最成功的一次,賣出的現金券超過七萬張。原價 $72 的磨菇漢堡包套餐現在只需 $47 就到手,雖然還是比麥當當的套餐貴了一倍。


店內人太多,不宜久留,走到灣仔運動場旁邊的露天平台,一面曬着太陽一面享用我這頓午餐。也要多謝這次團購活動,讓我知道公司附近有這個好地方可以在午飯時間伸展一下筋骨。當然,夏天來到後我就不會在這個地方出沒了。


團購確是可以讓你以比較便宜的價錢買下心頭好,相信熱衷這玩意的人會越來越多。又多一樣東西要關注,以後會很忙啊!

23 comments:

小彭 said...

本來都想買triple o's傍下身, 不過要指定店舖先用得, 所以唔買囉! 話時話對上一次食都可能係兩年前嘅事.

LostAndFound said...

原本是次triple o's團購咁熱烈, 我見過, 不過到click入去買時,已expired咗...嗚嗚....

L L said...

最近讀報也知道這些東西,是集中消費者力量去掙一個好價錢罷,但會不會令消費的次數多了?

博頭的相很美,佷別有一格的角度!

naruto said...

睇到最後都無“因小失大”,呢篇都唔好睇嘅

灣仔之友 said...

哎呀~ 揚左我個後花園出來喎...嬲囉...你分張coupon過我,就算數啦!

TY said...

哇哈哈! Triple o's賣飛佛呀!!! 我都買左幾張傍身呀~~ 灣仔triple o's見!

largeheadboy said...

小彭︰我就係見公司附近有至買咋。不過我都唔係成日食,但好似好抵咁咪買囉。

lostandfound︰我都係尋日睇報紙至知賣咗咁多。下次囉,可能有啲仲筍嘅優惠,不過真係要日日留意住囉。

laulong︰可能會消費多咗架,例如如果我唔團購,我可能唔會去幫襯囍宴同埋 Triple O's 。不過你唔幫襯呢度都會幫襯第二度。
博頭張相我都好鍾意,鍾意啱啱畀風吹起的布~

naruto︰有因小失大架!我貪新鮮第一日就仆去食,人多到哩要排好耐隊呀~ :p

灣仔之友︰呢邊個後花園留畀我喇,你嗰邊自己都有架嘛!
我哩,懷疑啲 coupon 可以再用,因為佢地忙到好似無 check 過啲 code,我畀張用過嘅你試下吖~ ^^

TY︰我買咗十張啊,見佢可以用到年尾吖嘛,睇怕佢唔會走佬啩!

小頭 said...

囍宴蘿蔔糕好吃嗎?蘿蔔夠唔夠多?

去年買過華麗園,覺得好過前年買的利苑,如果囍宴得,今年可以考慮嚐新...

卡臣 said...

午間在公園吃漢堡飽?好new york呀你!

ayclui said...

團購網站質素真係好參差o架, 我試過有D買完Q旁間鋪頭無耐就摺埋...所以D Q旁快D用呀~

largeheadboy said...

小頭︰唔知可唔可以架,不過我記得有朋友講過話普普通通,我見佢平咪即管試下囉。舊年喺灣仔有個臨時鋪賣鱔稿皇都介紹過唔記得邊度嘅呀婆蘿蔔糕,我覺得唔錯。今年唔知會唔會撞得返呢?

卡臣︰不過隔離有啲人食緊火腩飯又耍緊太極喎~

ayclui︰所以我見呢兩間應該無咁易執我至幫襯咋,同埋都唔算洗咗好多。係呀,有時啲小店一下子應付唔到咁多生意水準下降都係問題啊!

supageti said...

大頭家以後除左過期食物以後仲會有過期 Q 旁 ~~~ @@

largeheadboy said...

意粉︰希望唔會用到過期喇,我已經用咗兩張 Q 旁喇,剩返八張一陣就用晒喇,係驚去執次嘛!touch wood, touch wood~

小彭 said...

你搵灣仔之友啦, 佢應該知你要搵ge阿婆晌邊樹. (有coupon用架)

largeheadboy said...

小彭︰當真?仲有 coupon?calling 灣仔之友))))))

灣仔之友 said...

今年阿婆柴火年糕的臨時檔在國泰88商場呀~ coupon要買大底糕才可用, coupon買時即取即用就可以了. 問左佢地會開到年三十晚, D糕無防腐劑, 只可存放7日, 遲D先買啦.

largeheadboy said...

灣仔之友︰感激呀,不愧為灣仔之友呀!等我呢個禮拜尾去睇下先~
想食 Triple O's 搵我喇 ^t^

ayclui said...

阿婆柴火年糕有幾好味呢?

largeheadboy said...

ayclui︰我覺得幾有屋企 feel 架,同埋又唔係貴一大底咁,可以試下喎~

lau2tang said...

啲喜宴糕點券就快到期喇,搞點咗未?

largeheadboy said...

劉鄧︰諗住聽日收工先至去攞呀~

lau2tang said...

仲以為你又想等到過期添~

largeheadboy said...

劉鄧︰我有諗過等到 31 號最後一日至攞架,諗住可以擺耐多一兩日嘛,不過驚到時無晒貨就麻煩喇~