Saturday, January 29, 2011

大頭整餅

之前在網上看到有人用棉花糖做 tiramisu,不但做法簡單,也很適合家裏沒有相關用具的初學者,一直想找天大顯一下身手。昨天心血來潮,下班後就走去買材料,準備做我人生的第一個蛋糕。

做這個棉花糖 tiramisu 的材料不多,只有 mascarpone 芝士、軟芝士、手指餅、牛奶、棉花糖、珈琲粉和朱古力粉。


一般的 tiramisu 用上糖、雞蛋、珈琲酒,但這個懶人食譜卻用上棉花糖,省了不少功夫。棉花糖除了本身已經有糖分蛋糕不用再放砂糖之外,還有魚膠粉的成分,令蛋糕比較挺身,對初學者來說應該比較容易處理。


先把棉花糖浸上適量牛奶,然後用微波爐加熱一至兩分鐘,棉花糖就會融化,徹底拌勻再放涼後就加進 mascarpone 芝士和軟芝士,然後用力拌勻,鋪到浸滿珈琲的手指餅上。


一件疊一層,很快就完成這個 tiramisu,我的第一次就這樣完事了。吃的時候再灑些朱古力粉在上面,就是一個似模似樣的 tiramisu。


不過老實說,吃之前對這個 tiramisu 沒有太大期望,只求不太難食就收貨了,不竟這是我的第一次嘛。怎料放進口,實在不得不從心裏讚嘆自己確是個不折不扣的天才小廚師,因為這個 tiramisu 實在太好吃了,跟外面買回來的完全沒有分別啊!


我買的材料足夠做兩大盒 tiramisu,明天就帶一盒回娘家團年讓大家大讚我一番吧!

24 comments:

supageti said...

過得到我地依關至算啦 ~~~

lau2tang said...

喂,人地做嗰啲,係側邊係望唔到手指餅架,你做的芝士糊太杰了,流唔到去側邊。係咪的棉花糖溶液攤凍得太耐,變到太杰身,我估你舖係手指餅時都好難先撥得個面平均。

ayclui said...

嘩, 犀利喎...自己整 :)
不過咁多芝士唔啱我~

largeheadboy said...

意粉︰咁又係,你知喇,我x唔臭都覺得好味~ :p

劉鄧︰我呢個重內涵唔重外表架嘛!
不過個芝士糊的確係杰咗啲,個面一岩一忽完全唔平呀。所以做第二底嗰轉就落少咗啲 cream cheese 咁就稀身咗啲,感覺好啲。下次會做得更好架喇!

ayclui︰我都覺得自己好犀利呀!遲下我應該可以開班授徙,出咗名之後就可以上埋電視做中年食神呀,哈哈!

lau2tang said...

咁應該係你啲cream cheese攤得唔夠耐,所以唔creamy,下次遇到同樣情況,試吓加番少少奶入個芝士糊度再攪,睇吓會唔會好少少。

卡臣 said...

睇相都覺得好味

naruto said...

我就睇相已經唔想食

ROY said...

講到咁正咁,拎d黎試下先得架~

小彭 said...

咪可以整杯有雪糕球嘅tiramisu芭菲囉! 再大多一個雪糕筒都仲得呀!

largeheadboy said...

劉鄧︰係喎,可以加多啲奶喎!啲 cream cheese 係要等佢融少少呀?佢成舊磚頭咁硬呀,攪到我無晒力~

卡臣︰唔只睇呀,食落都一樣咁好味啊!

naruto︰一 pat pat 野咁,應該好鍾意喎你~

roy︰下次有機會再整一底吖,希望唔會搞到集體爭住上廁所喇,哈哈!

小彭︰係喎,等我加球雪糕自製一個大頭芭菲先,仲要加埋啲粟米片喺底喎~

lau2tang said...

" 步驟三:把 『退冰』 的mascarpone和cream cheese丟進棉花糖溶液裡盡量攪拌均勻... "
你無睇清楚咩?

小頭 said...

實在不得不從心裏讚嘆自己確是個不折不扣的天才小廚師... hahaha like!

下次又會弄些什麼新點子呢,天才小廚師?

娘家的親朋好友食完後有什麼評語?

largeheadboy said...

劉鄧︰但係我見舊 cream cheese 個樣又唔知放出嚟耐啲會諗啲喎!不過咁下次就放出嚟攤耐啲~

小頭︰應該都係 tiramisu,除咗因為易整,我又冇打蛋機同埋似樣啲嘅焗爐之外,最主要嘅原因係屋企人食完都大讚呀,仲要話味道啱啱好又唔太甜!哈哈!
下次整畀你試下吖!:p

小妹 said...

不如你就帶個去兼六家拜年啦~

largeheadboy said...

小妹︰咁屋主要預備定封大利是回禮啊!:p

lau2tang said...

入場費都唔畀,仲想拎番轉頭,真係想大你個頭囉!

largeheadboy said...

劉鄧︰係喎係喎,我咁樣唔得嘅,咁就帶多兩梳蕉喇~ :p

maymay said...

手指餅搣碎係咪好d呢
唔知我地幾時有得吃呢?

L L said...

哇,大頭哥,好掂喎!

年尾流流我就好想炸油角,但都幾麻頭煩,都係吹水居多咯!

largeheadboy said...

maymay︰唔駛架,佢地唔係消化餅嗰啲,成條浸落去啲珈琲度整軟佢就可以喇。你有時間嘅話不如自己整喇,好易整同埋好有滿足感架~

laulong︰呢鋪我都覺得自己好掂呀!:p
炸油角真係好大工程啊,不過就好有過節 feel,整喇~~

瘋膏 said...

見到製成品都想試吓味。
「...天才小廚師」<-- 睇到笑咗。

largeheadboy said...

瘋go︰仲有四分一底喎,有冇興趣?買定離手啊~:p

小頭 said...

天才小廚師的出品,真的不錯啊,不看這篇文章的話,真的覺得好 PRO 架...

largeheadboy said...

小頭︰我無講大話哩,我自己都覺得好正啊!快啲叫人日頭整個喇~ :p