Wednesday, January 11, 2012

第三回︰一乘寺.清水寺.嵐山

離開出町柳,下一個前去的地方是離京都駅再遠一點的一乘寺。正常來說,到一乘寺的話坐叡山電鐵就最方便直接不過,但是為了省錢和盡用手上的巴士一日乘車券,我們先坐 4 號巴士到洛北高校前再轉北 8 號巴士,有多轉折得幾多轉折。


到一乘寺的目的,是為了去連續三年入選食べログ Kyoto Best Ramen中華そば高安


中華そば高安是人氣很大的拉麵店,經常大排長龍,究其原因就是抵食夾大件。很幸運,我們來到的時候人不算太多,等了幾分鐘就可以入座。


中華そば高安平日限定的午市定食賣 750 円,有拉麵、白飯和炸雞一件,多一件炸雞也只要 100 円,其餘時候就只有連三件炸雞賣 950 円的套餐。當然,你也可以單點賣 600 円的拉麵。


一個小時前才吃過茶房いせはん的あんみつ(還有出町ふたば的豆餅),所以很克制地只點了一件炸雞的套餐,白飯也是正常的份量。不過當全部東西出現在桌面上時,仍然有很澎湃的感覺。


枱上放有聲稱激辛的韮菜,只可以吃中辛的我還是不要亂加。


平日我很常坐的 5 號巴士,如果是這部終點站是京都駅的 5 號巴士就好了。


京都的巴士一日乘車券只限在特定範圍內上落,否則就要補上車費差額。我們在一乘寺上車的車站剛好在均一區間之外,不過當時沒有為意,下車時就如常只給司機看一看乘車券,幸好沒有給他逮住。


計劃行程時知道這天 12 月 12 日是日本漢字能力検定協会發布今年の漢字的日子,想過到清水寺看清水寺貫主現場寫出今年の漢字,但後來才發現儀式不開放給公眾,而今年の漢字也要到明天 13 號才公開展出,於是就索性不進去清水寺。


不過我還是到了清水寺周邊,因為我要到二年坂和三年坂買東西。


當然沿途還要試吃不同口味的生八ツ橋。


清水寺外面的紅葉還很美麗,於是大家都趕忙補捉今年最後的紅葉畫面。


京都市內有太多地方想去和要去了,衹園和錦市場即使來過幾多次也要再去逛一逛,趁日落前到嵐山坐嵯峨野トロッコ列車的念頭最後也給擱置。或者,下次要花一整個星期在京都。下次、下次……


河原町有巴士直達嵐山,但我一直覺得手上面的乘車券沒有理由可以讓你免費坐到老遠的嵐山去。在巴士站猶豫不決之際,駕來返回京都駅的巴士,那就不如索性到京都駅轉坐電車吧,反正可能更省時間。後來才來發現嵐山位於均一區間之外,有乘車券也要補上車費差額。


六點來到嵐山,天已經黑透,從 JR 嵯峨嵐山駅走出來,感覺寧靜得來也有點蕭瑟。不過在不遠處嵐電嵐山駅那邊卻十分熱鬧,因為花燈路正在熱烈開催中。


嵐山每年都在這個時候舉辦花燈路,除了在街道兩旁放置花燈,也會在一些景點打燈製造特別效果,挺有氣氛。所以即使紅葉期已過,而且已經入黑,這裏仍是人山人海。


不單只渡月橋亮起燈來,連旁邊的山頭也給照亮起來,只是紫紫藍藍的燈光令人感到有點詭異。


法輪寺那邊好像很熱鬧,而且夜間舞台更是免費入場,但入黑後實在有點冷,而且走了一整天也有點累,就早點前去焦點所在的竹林小徑吧!


途中遇上四年前來嵐山吃過很美味的可樂餅。


竹林小徑在平常日子已經遊人絡繹不絕,這個時候更令人有置身公益金百萬行的感覺。


人雖然多,但大家都很安靜地欣賞眼前的景色。


沒有繼續向我很喜歡的常寂光寺那邊走,我們就在這裏折返。


抬頭望向給茂密的竹樹蔽蓋只剩下一小片的天空,覺得這一刻它來得特別神秘。


有想過回去時在二条下車去吃燒肉放題,但基於戰鬥力有限和想早點回旅館休息,最後還是一路坐到京都駅去。


老店東洋亭位於京都駅地下街 Porta 的分店的蛋包飯和意大利麵普普通通,但名物百年プリン果然很不錯啊。


臨近聖誕,京都駅擺放了巨型的聖誕樹,還播放着應節的歌曲。待在這裏的時間,出現過 Mariah Carey 的 All I Want For Christmas is You、Wham! 的 Last Christmas 和坂本龍一的 Merry Christmas Mr Lawrence。


京都塔又出現了!


雖然在日本聖誕不是假期,但聖誕氣氛卻比香港濃厚得多,每個角落都彌漫着節日的氣氛。看,連 Mister Donut 也推出聖誕限定的甜甜圈。這晚的宵夜就是這些吧!

29 comments:

jokelib said...

點解你可以咁強一日去咁多地方.....

卡臣 said...

清水寺好像出現過在「一休小和尚」的卡通片內

lau2tang said...

點解你咁強,可以一日食咁多餐!

Cat said...

睇你寫日本遊記,好以平時行街食飯一樣,你真係好熟日本喎。不過日本真係好靚好乾淨。同埋間拉麵店全部都係男仔既?

naruto said...

點解你咁強,可以寫咁多遊記(但爛尾)!

largeheadboy said...

Jackson︰因為我係一隻無腳嘅雀仔,要不停飛,一停低我就會死架喇~ ^^

卡臣︰係呀?我淨係記得好似出現過金閣寺。
話時話,早排我見重播緊喎~

劉鄧︰所以我咪搞到今日咁嘅身世囉,有因必有果呀~

cat︰熟又唔話得,不過係鐘意去囉,同埋覺得自己有啲似日本人,有禮貌之餘又有啲假囉 :p
可能拉麵係啲飽肚嘢,男仔多啲會去食,女仔就去食意粉呀定食呀之類。不過當其時都有女食客架,無入鏡之嘛,隔離枱兩個 OL 一人一個 set,戰鬥力好強。

naruto︰哈哈!要 like 呀!
呢個遊記進度開始放慢喇,應該離爛尾不遠呀~

瘋膏 said...

夜晚的竹林小徑都好靚~
唔好爛尾啦, 請繼續寫。

小彭 said...

雖然你去個D地方都好京都人, 但你嘅步伐出賣咗你啦香港人!

你呢句好呀:"自己有啲似日本人,有禮貌之餘又有啲假囉"!

ayclui said...

點解你咁強,可以一日食咁多餐!x 2
中華そば高安平日限定的午市定食真係好勁, 我地一set 兩份都得呀, 不過驚唔好意思幫襯咁少...

l.minor said...

點解你可以咁強一日去咁多地方.....x2

真係唔係講笑,好似講緊幾日嘅景點一樣

點解你咁強,可以一日食咁多餐!x 3

TY said...

"人雖然多,但大家都很安靜地欣賞眼前的景色" <--- 呢個係我喜歡日本的其中一個理由!

點解你可以食哂果個拉麵餐? 淨係食個飯都飽左啦我!

L L said...

你提及過祇園,我最有印象是祇園祭,85年在日本就專趕上這節慶。

largeheadboy said...

瘋膏︰竹林小徑好似喺花燈路期間至會點燈,其餘時間夜晚應該黑到伸手不見五指架。
我都希望唔會爛尾,但係唔太樂觀囉~

小彭︰我從來無掩飾我喺香港人嘅身分架,不過間唔時我都會講すみません,希望啲人唔會以為我係歪國人。不過我眼大又雙眼皮,啲日本仔一定知道我喺度扮晒野~

ayclui︰其實食完個拉麵都成好多個鐘頭之後先食晚飯,唔算食咗好多啫(中間係有蜜柑同埋可樂餅 ^^)~
白飯可以追加,咁兩個人 share 一個餐其實都得嘅,不過現場所見大家都一人一 set 喎~

l.minor︰我呢啲行程仲充實過乜呀,唔係受過特別訓練就千祈隨便試呀!:p

TY︰喺竹林小徑最殺氣氛嘅係聽到大大聲我聽得明嘅野,喺呢啲環境特別容易入耳。
開頭我都以得一定食唔晒碗飯,但係扒下扒下食埋啲醬蘿蔔又食得晒喎,仲差啲想添飯添~

laulong︰嘩,85 年!我就喺 06 年去睇過祇園祭,當其時人山人海好熱鬧,係一個好好嘅體驗。

maymay said...

幾拾歲人,咪貢趕啦,因住咩....野呀~^O^

largeheadboy said...

maymay︰因住咩呀?唔好嚇我喎~ ^_^

Ellen老師 said...

就係幾拾歲人要貢趕啦,驚住咩....野呀~^O^

largeheadboy said...

老師︰的確係,幾廿歲人趁仲行到就行多啲囉~

supageti said...

想當年我晌 ec2 出左個 post 介紹花燈路,竟然沒人有反應,我嬲嬲地咪刪左佢囉。

largeheadboy said...

意粉︰啲人咁唔識貨呀,不過我都試過 post 個簡單遊記上去無回應架。ec2 好熱鬧嘅日子真係好令人懷念,估唔到當時一啲會員今日會成為朋友~

naruto said...

不過我眼大又雙眼皮... 眼大定腩大呀?有無打錯字呀?

supageti said...

又係幾難想像既, 以我地既年紀仲會去識網友, 哈哈!

largeheadboy said...

naruto︰無打錯字,的確係眼大又雙眼皮,不過我都承認我同時眼大又腩大~

意粉︰我地?係,我地嘅年紀都差唔多啫 :p

小彭 said...

我個時係年少無知架咋! ^^

largeheadboy said...

咦,可以喺度 reply 喎,喺度試下先~
小彭,你依家都好年少吖,不過都唔再無知喇 :)

京都人 said...

Good!識去高安,不過最好味係每日限定嘅牛筋拉麵,哈哈哈哈~

卡臣 said...

祝新一年新開始,重新出發

Ah ming said...

恭喜發財
新年進步

ayclui said...

大頭, 恭喜發財呀~
祝你精神爽利, 事事如意, 年年有餘, 日日開心, 長食長有, 食極唔肥~

largeheadboy said...

京都人︰牛筋拉麵就留返你呢啲京都人食喇,我呢啲香港人食到普通嘅拉麵已經好滿足架喇~ :p

卡臣、ah ming、ayclui︰謝謝你們!新一年大家都身體健康、事事如意啊!