Thursday, December 06, 2012

20121130︰再會東京


五日四夜的小旅行,在時間有限的情況下又選擇坐上凌晨出發的航班。四個鐘頭的航程,睡了一個鐘頭都沒有,落機時精神有點委靡。
 

入境時遇上人潮,耽誤了不少時間,在最後一分鐘覺得還是可以趕上七點鐘的京成電車,結果在售票機前忙亂中按錯了掣,多付了 40円車資


東京,我又來了!


之前九月過來時住過淺草橋的 Mystays Inn,對它非常滿意,地點方便之餘房租也很相宜,這次就決定連續住上四晚。


米飯和雞蛋,是我在日本的早餐首選。


連續三年都有在秋去冬來的時候來東京,每一次我都沒有錯過明治神宮外苑的銀杏。


外面的一排銀杏葉片已經完全轉黃,內裏的一排還有一點青綠色。


這裏的銀杏實在美得叫人不想離開。


如果下年又在這個時候來東京,我還是會再來走這條黃色隧道。


坐地鐵來到新宿三丁目,十二點還未到,但家庭料理店いまゐ外面已經有一條小人龍。


いまゐ在飲食網站食べログ的評語不錯,還入選東京頭一千間最佳食店。以午市定食不到一千円來說,實在覺得很超值。


坐下來已經是差不多半個鐘頭之後的事,點了這裏的人氣定食,銀むつの煮付け定食和さば塩焼き定食,另加一份野菜和鮪魚刺身。


銀むつ應該是類似鱸魚的東西,用甜甜的醬油煮得又香又滑,而鯖魚也燒得十分可口。這頓午飯叫人吃得滿心歡喜。


從いまゐ走不到五分鐘,就是新宿御苑的新宿門。在這個紅葉季節,當然要進去逛一逛。


新宿御苑的紅葉很有看頭,要紅有紅,要黃有黃,要綠有綠,可惜天空不配合,沒有展現這個季節應該常見的藍色。


新宿御苑佔地很大而且亦十分空曠,寒風吹過來覺得份外冰冷,鼻水也不自覺地流了出來。


又冷又倦,找個地方喝杯咖啡暖暖身體絕對是不錯的提議。


回旅館小休一會,為自己充充電之餘也要為手機充充電。


從窗看出去,剛剛可以看到 Tokyo Skytree


這天買了都營地下鐵一日乘車卷,當然不會讓它閒着,晚上又跑回新宿血拼。


晚飯在京王 frente 開張才幾天的ねぎし,門外的祝賀花牌還未有移走。


ねぎし是炭火燒肉連鎖店,在東京有不少分店。他們的炭燒牛舌尤其受歡迎,燒得剛好的厚切牛舌可以叫人連吃幾大碗飯,還好這裏的麥飯可以自由添加。


只有肉沒有菜營養不均衡,於是每人多點一份單看樣子已經感覺非常新鮮的沙律。



回旅館休息前再逛逛附近的超市和便利店,買些水果和明天的糧餉。


24 comments:

naruto said...

銀杏咁靚我又未睇過,預定出年秋冬去一次先~

卡臣 said...

靚到不得了,又浪漫,唉~~香港找不到

Ah ming said...

你就好喇......今年獅子幫我輸的強積金,夠我去一次日本豪華遊>_<

largeheadboy said...

Naruto︰好呀!你去得成我跟埋你一齊吖~

卡臣︰香港諗極都諗唔到有乜野植物令人感覺浪漫,唔通洋紫荊同木棉樹咩。不過鳳凰木都 ok 喎~

ah ming︰咁壯烈呀?錢財身外物,去咗至算喇~

Jackson said...

都係嗰句, 佩服一日變兩日用.

the inner space said...

您的五日是全日用到盡抵玩!

Cat said...

好呀!大叔同大頭一齊去,變成"大大"旅行團,哈哈!!
不過最緊要係一定有好多靚相睇。

紅米奇 said...

有埋藍色真是接近完美, 但對我來講, 有得多次欣賞都已經夠, 其實滿足是很簡單, 大頭哥應同樣enjoy ^^

l.minor said...

銀杏真係好靚,平時啲人只會講去旅行睇紅葉,下次要同人講我去旅行睇銀杏先得

l.minor said...

原來你又係坐零晨機,我今次都係,坐peach,感覺麻麻,而且重delay咗成個鐘,下次都係坐番其他算數

點解你坐完零晨機都重可以去咗咁多地方嘅?我玩到下午巳經個人吽吽地

laulong said...

銀杏好靚呀,靚得黎平和而有深度!

maymay said...

走在銀杏樹下,實在太浪漫了~~~

ayclui said...

我蝦子餅講明唔坐凌晨機o架...所以唔會好似你咁搏命...
銀杏真係好正, 我今次都影到一條黃金大道呀~

佛爺 said...

我就睇見D美食流哂口水,最好在銀杏樹下進食,咁就無得頂啦!

largeheadboy said...

jackson︰係咪應該話我兩日變一日用呢?呢日行程對我嚟講超悠閒超鬆散喎~

space︰直頭一個鐘都無浪費呀!去到第三日仲已經有去咗好耐嘅感覺添~

cat︰大叔要狂影相我就要狂食,大家都唔係好夾噃 :p

紅米奇︰的確已經好 enjoy,藍天係錦上添花,睇住啲咁靚銀杏同紅葉,大滿足矣~

minor︰去程定回程 delay?我聽其他人講對 peach 都幾滿意喎,你咁黑仔?
我其實成日都吽吽地架,不過第一晚都搞到成十二點至瞓,而第二朝就六點起身,好唔夠瞓啊!
大阪京都銀杏都好壯觀啊~

largeheadboy said...

laulong︰銀杏同紅葉絕對有得揮,我尤其鐘意銀杏葉嘅形狀,好有詩意~

maymay︰你又唔同我一齊去,同我慢步銀杏樹下仲浪漫呀^^

ayclui︰凌晨機 ok 架,一瞓醒(如果瞓到嘅話)就係日本,好爽架!搵次試下喇!
咁你去咗邊呀?

佛爺︰都有好多人帶埋便當喺度食架,不過就算無野食,齋坐睇住啲黃葉一片一片咁跌落嚟都一樣正到無得頂。

l.minor said...

我係兩程都出事,去程個幾鐘,回程就半個鐘,真係好黑仔~

largeheadboy said...

minor︰不過好彩唔算 delay 好多,第二朝都係六點幾到關西啊呵~

小彭 said...

你用咩方法回魂架? 黎緊嘅兩個旅程, 都應該係坐零晨機, 等我參考下先.

largeheadboy said...

小彭︰總之有好野食就得架喇~
其實第一日我成日都呆下呆下,不過係純粹因為身在日本我至撐得到架咋!你都一定撐得到架!

小彭 said...

日本我都唔太擔心, 總有D方法, 想睇下有無良方咁啦! 今日見航空公司又放位, 都係將下下轉改番日頭機(價錢一樣), 同一個BKG CLASS, 一個人5點幾去到陌生地, 都有D驚驚!

largeheadboy said...

小彭︰即係轉咗唔坐凌晨機喇?日本有幾陌生呀~

小彭 said...

哦... 下下次我唔係去日本呀!
日本就梗係無問題啦!

largeheadboy said...

小彭︰噢,原來我搞錯咗,下下次嗰度睇嚟應該都係洗歐羅啊呵~