Sunday, March 30, 2008

麵.麵.麵

這個周末的三餐很巧合地都是麵。

1. 黃大仙蘇記


這家位於黃大仙鳳凰新村的車仔麵店是幾個月前無意之間碰上,之後每隔一會就心思思要再來光顧。除了是因為味道好之外,我很喜歡這裏很舊式的風味。在這裏,你不用劃飛仔,而是走到淥麵的地方先點了麵,然後再逐一揀選自己喜歡的車仔餸,情形就像小時候街邊的車仔麵檔一樣。我覺得這店比附近另一家被電視雜誌吹捧得很厲害的車仔麵好吃得多、人情味也濃得多。可惜相逢恨晚,店子因為租約期滿只營業到三月底,現在還在附近物色地方繼續經營。你可以留下聯絡方法給他們,好讓他們重開時通知你。不過我沒有這樣做,因為我深信有緣的一定會再遇上。

中場休息到了中環荷里活道警察宿舍,參觀只開放兩天的中央書院遺址。



這警察宿舍建在有百多年歷史的中央書院遺址上,在去年準備清拆宿舍時才被發掘出來。我一面看一面在想,究竟為什麼幾十年前興建這警察宿舍時,工人竟然沒有發覺孫中山先生曾就讀的學校就在他們下面。



這天來參觀的人好像對中央書院的遺址沒有多大興趣,反而對警察宿舍興趣更大。不過更多人應該都像我一樣,把這裏當作一個拍友試機場地,一草一木都成為鏡頭下的目標。



2. 灣仔新記


晚上經過灣仔,記起小頭提過這裏的芝士麵很有名,連自拍王也曾到此一遊,就決定試它一試。芝士是一“劈”的“劈”在麵上,賣相不太吸引,不過味道還算不錯,有機會還要再試這裏的乾撈麵。值得一提的是店子由一群疑似童黨的小朋友主理,害得我們一面吃一面擔心會不會有另一群疑似童黨前來尋仇,來個亂槍掃射或者亂刀劈友,還把正咬着麵條的我們一併幹掉……

這回中場休息的地方是銅鑼灣時代廣場,看台灣插畫家幾米的十年作品展。



室內展出的主要是插畫,不過現場不可以拍照,你一舉起相機有所動作,一位哥哥就會走到你面前勸阻你。現場所見,這位哥哥的確很忙。比較起來,室外的公眾空間自由得多,你除了可以慢慢拍過夠,還可以隨便坐下來或看些街頭表演。



3. 銅鑼灣榮記


宵夜來了平時根本不可能光顧的人氣車仔麵店。我們在店子快關門時來,客人不算太多,還可以獨佔一張大枱。坊間一直說這裏的車仔麵怎樣好怎樣好,這天終於有機會一試,不過我想我應該不會再來了。這裏的麵不是不好,可是我要的是車仔麵啊,這裏所謂的車仔麵跟外面的牛腩魚片米或紫菜四寶麵味道根本就沒有分別。

除了“行家”,我想經過這天之後我還可以兼任“麵家”了!

28 comments:

Anonymous said...

大頭竟然認做麵家?! 你想挑戰灣仔麵王呀!

Anonymous said...

我嬲你!
人地都話新記乾撈麵好食囉, 你做咩點芝士撈麵o者.... ^t^

銅鑼灣榮記, 我食了一次就無回頭了.

蘇記...想去...但黃大仙喎?

supageti said...

係街又食麵,係屋企又食麵,大頭果然係麵家,哈哈 ~

Anonymous said...

大頭不是也說乾撈看來比濕撈吸引的嗎?

嗯,我那晚在等乾撈麵的時候見到其中一位童黨在吃晚餐,他也是吃乾撈,所以有理由相信乾撈真的較好吃。

話雖如此,我也要吃一次芝士撈,否則沒資格說:乾撈比濕撈優勝、濕撈名過其實、濕撈好溜....etc

Anonymous said...

單從相片看, 我覺得蘇記比榮記吸引得, 蘇記的出品才像車仔麵.

不過, 我喜歡車仔撈麵多過車仔湯麵, 以前荃灣有一檔, 晚上6點左右才開檔, 雖然衞生環境不佳, 但好多人幫襯, 自製蠔油汁的味道好好. 後來停業了一段長時間之後再開番, 但味道不及從前.

largeheadboy said...

小彭︰兼任啫!我主力仍然係行家啊!話時話,邊位係灣仔麵王,等我搵日拜候下!^o^

小妹︰我諗我搞錯咗!原來係乾撈好味啲呀?我食嘢咁冇所謂都覺得榮記唔係咁得,咁佢就真係幾唔得啊!至於蘇記,有緣的!

意粉︰哈哈!依家米貴呀!食麵平啲呀!^b^

小頭︰我的確唔係太鍾意一“劈”嘢,尋日匆匆看完你的介紹,腦內就只有芝士撈麵,完全唔覺有乾撈呢回事,所以去到就即刻叫了芝士撈。都好味嘅,不過我知道乾撈一定好味啲!下次喇就!

wendy︰蘇記真係得好多,舊蘿蔔好入味添。至於榮記,幾時有車仔麵有冬菜喺面架?
車仔撈,未試過喎,會唔會濃味嗰頭架?
係呀,喺 ec2 見你話去立山黑部,進展成點呀?我都去睇雪之大谷呀遲吓!^r^

Anonymous said...

早幾年前晌荃灣食過撈車仔麵(唔知同WENDY講個間係咪一樣), 聽說以前係街邊檔, 我食嘅時候已經入左舖(近川龍小巴站), 都係蠔油汁. 同事係荃灣原居民, 話以前街邊檔好食D. 不過, 宜家都執左LU.

maymay said...

蘇記~好想試,祗可惜做埋聽日就搬,相逢都冇得逢,得個恨字!
你做乜鬼唔留個電話俾人地唧! >_<

largeheadboy said...

小彭︰美好的東西總是跟我們擦身而過!睇嚟要有一排冇得食車仔麵 lu!>_<

maymay︰我有諗過畀低 email 佢地架,但係我又諗佢地應該一定會在附近找鋪位啩,遲啲上網應該搵得返佢地。有緣嘅話!

naruto said...

中央書院D相幾得,讚

lau2tang said...

山中方一日,世上已千年!
返到嚟先知香港人在搶米!
我家一粒米都無呀!陰公!
仲諗住返嚟先買都唔遲,今次註定要轉行跟你食麵喇。

maymay said...

我公司附近同埋屋企間惠康都冇晒米賣呀,奸商囤積居奇!

Anonymous said...

我去新記時係疑似童黨家長主理個喎!

largeheadboy said...

naruto︰謝謝!那天很多人,要就好耐至可以搞到冇咁多人入鏡。

劉鄧︰真係出現搶米呀?我今日咁啱都去買咗包米,仲都見有好多貨呀!我諗就快連雞蛋都畀人掃架喇!

maymay︰所以係時候唔好喺屋企煮飯喇,可以轉食麵喇,又或者買飯盒都得!^t^
咁你屋企有冇存貨呀?

小彭︰你係唔係平日去呀?平日啲疑似童黨可能要返學嘛,我嗰日禮拜六佢地直頭喺度打躉。

Anonymous said...

大頭, 蠔油汁係經過調教既, 而且餸料總會有少許水份滲出, 撈均後味道剛好.

係呀, 我會去立山黑部呀, 已經係學x訂左名古屋package, 12號出發, 暫定係21號上山. 你呢?

小彭, 就係呢間喇, 舊年我朋友話俾我知佢搬左去香車街街市樓上個熟食市場, 我都去幫襯過好多次, 今年仲未去過, 今個禮拜去幫襯吓先, 希望仲係度喇.

maymay said...

老公話屋企d米仲可以食十幾日咋,到時食晒問你賒,得唔得呀?

largeheadboy said...

wendy︰你就好喇,去咁多日!我去五日咋!>_<
我 18 號飛名古屋,應該就 20 號上山!我就去到室堂就回頭,唔去富山喇,因為實在冇時間。希望嗰幾日都好天氣喇!依家櫻花情報越來越早開花,我怕我乜都冇得睇呀!你都去高遠城啊呵?

maymay︰咁唔係辦法喎!尋日請假去掃貨喇!我屋企仲有兩包糙米,不過應用過晒期。你要就畀你喇!

Anonymous said...

係呀, 會去埋高遠城, 預左18號去.

我啱啱係ec2 post左個最新行程出嚟, 得閒過嚟比d竟見喇.

largeheadboy said...

wendy︰一陣過去睇下先!高遠城越來越早來,最初話 22 號,之後提早到 20 同埋 15 號,嚇到我吖!我應該 19 號去,諗住限定的那隻 pass ,同埋去同人迫番餐!^i^

光.軍 said...

中區依輪都好多地方開放喎.中區警署又開.中央書院又開。唔知會唔會開放完就賣地呢..

largeheadboy said...

光.軍︰警察宿舍塊地咁值錢,點會唔賣吖?
嗰日其實仲想上埋去衛城道嘅孫中山博物館,咁啱有個自稱地膽嘅途人話要先在 urbtix 買咗飛至可以入去,所以我地就冇上到去。返嚟 check check,原來根本冇這回事。

Anonymous said...

是中區警署,不是西區警署呵?

naruto said...

孫中山博物館唔駛買飛架,比人坤啦

largeheadboy said...

tmc︰係,係我唔啱,帶咗你去西區警署,不過西區警署行返過去都好近啫!hehe!

naruto︰唔係都要畀十蚊入場費咩?

光.軍 said...

"香奈兒"個Mobile Art至喺Urbtix訂飛之嘛。佢收嗰十皮話係"服務費"..聽個電話都值十蚊。香港經濟再一次起飛喇! :S

largeheadboy said...

佢地話要限定每場入場人數吖嘛!你有買飛嗎?

光.軍 said...

係呀.佢限人頭入場。你打電話去只係等佢地按排日子俾你O架咋。本來有少少興趣.見佢搞限定版.所以連少少都無埋.. :X

largeheadboy said...

我有諗過去見識下架,不過就懶得上去訂飛囉!