Wednesday, April 23, 2008

五天精華遊之第一天

斷斷續續飛了接近四個小時,中途在台北的桃園機場停留了一會,下午三時多在細雨中再次踏足日本的國土。沒見一年半,名古屋中部國際空港的吉祥物 なぞの旅人フー 依舊很熱情地向我們招手。



由於這次行程只有五天,所以每一分每一秒都來得特別珍貴。為了不想誤了時間,多付 350 円乘坐機場的快速特急前去名古屋也是值得的。



半個小時後抵達名古屋,先買了往松本的車票,然後趁空檔走到高島屋地下的食品館找地雷也。很傻很天真的我一直以為地雷也的天むす像普通飯團那麼大,但原來它只是比乒乓球大一丁點兒。



以往到日本,通常都會購買火車證,乘坐指定席就變成了理所當然的事。這次沒有火車證,就不得不早一點到月台排隊了。



在列車上,我們跟當地人一起開餐。他們吃的是在車站買的弁當,而我們除了天むす之外,還有從香港機場的候機室新鮮空運過來的三文治。



正如很多人所說,天むす看似沒有什麼特別,只是把紫菜包着炸蝦和白飯,但卻不知何解十分好吃,即使放涼了味道也很不錯。五件天むす,不到五分鐘就給掃光了。



搖了兩個小時,我們在天快將黑透的時候到達松本。在旅館卸下行李後,就徒步前去位於不遠處的國寶松本城,觀賞很有名的夜櫻。



在二十號之前,松本城都會舉行一年一度的夜櫻會,遊人可以免費進入平常要付款才能入內的庭園。可是我們來到的時候剛好過了八點半的閉園時間,只好在城外四處走走。這天,城外的櫻花正開得燦爛。



松本城護城河旁的櫻並木光の回廊,一排櫻花樹給燈光照亮起來,就像一條長長的櫻花隧道。



頻撲了一整天,是時間找個地方坐下來好好吃一頓晚飯了。經過一輪挑選,最後選了駅前的坐.和民



這天很晚才吃飯,回到旅館已快到午夜。攤在床上,幻想着藍天白雲下的櫻花。

**********************************************************

喜歡寫遊記把旅行的點滴記下來但又通常爛尾收場的我竟然再一次向難度挑戰,在紅葉之旅還沒有埋尾的時候就展開櫻花之旅的第一篇。或者我應該把難度提高,一併開始記錄年末年始夢幻之旅。

這兩個開了頭的遊記,不知道能否在下一次出發之前完成呢?

22 comments:

lau2tang said...

我估呢個得五日,會寫得快啲!

Anonymous said...

好想去玩.....

largeheadboy said...

劉鄧︰有時啲嘢未必講邏輯架!所以對呢個短短五日的遊記不要抱太大期望啊!^p^

歐巴桑︰想去就去吧!當然要睇下老闆嘅眉頭眼額先喇~~

Anonymous said...

爛尾遊記,我都有丫,呵呵~

largeheadboy said...

roy︰你好似都唔只一個添~~
呢啲叫缺憾美吖嘛!^o^

maymay said...

我都好想食地雷呀!

第一晚就有得賞櫻,看來跟住幾日都相當精彩喎~

將"爛尾"美其名為"缺憾美",你都得架喇,為自已鋪定後路乎?

Anonymous said...

天むす看似幾好味,如果加埋沙律汁....

你就好啦~~~可以親身看到咁靚既夜櫻,啱啱嗰次旅程我本來想去輕井澤時去埋松本,但最終因為車程太遠而放棄左~~

希望您今次唔好爛尾,因為好想睇你介紹吓那些"未聽過"的地方!

Ellen老師 said...

點解係支B~~水?

Anonymous said...

支持你開始寫埋夢幻之旅, 要挑戰一下嘛!
我食過拳頭咁大嘅天むす, 不過係晌味千拉麵同系嘅雪村... 嘩, 簡直極品啦!

largeheadboy said...

maymay︰你又飛轉名古屋喇,長期 $1,990 呀!
第二同第三日都好精彩架,不過隨後兩日就平淡咗啲喇,要抖下氣嘛!
今次五日就搞得掂,希望唔會爛尾喇!要努力啲先!

rempei︰天むす真係幾好味架,唔駛沙律醬都好好味啊!有機會你也要試試。
松本都好近輕井沢,就算落東京都只不過兩粒鐘,下次可以去埋上高地同埋妻籠宿馬籠宿添。
好,今次應該唔會爛~~^o^

ellen︰樽 b 水都係空運過嚟,仲成功逃過機場的嚴密保安。^t^

小彭︰夢幻之旅就等我完成埋呢兩個先喇,壓力好大啊!
極品?你係讚定彈呢?
我就係見你舊年的遊記影得咁大個,所以以為佢好大……

Anonymous said...

都好快手吖,已經有o野睇囉!

largeheadboy said...

lala︰我話過要在下一次出發前完成呢兩個遊記,希望唔會衰收尾喇!^O^

naruto said...

夜櫻。。。好得

Anonymous said...

天むす旁的是自家制三文治嗎?

largeheadboy said...

naturo︰都係嗰句,現場睇仲得呀,當然我的攝影技術實在有限。很懷念看着櫻花的花瓣隨風散落的景象。

wendy︰實不相瞞,三文治是早上在香港機場的 lounge 撻的……:p

Anonymous said...

看完好後悔當年扮細食,無買天むす...一個人要食五件喎?

Anonymous said...

地雷也天むす好細粒架咋, 食下一粒食下一粒, 好快食晒!

largeheadboy said...

小妹︰扮細食實在係件好蠢嘅事呀!有得食就要食呀!朋友唔食得蝦,我一個人食晒五粒,不過我都有畀啲白飯佢食~~

小彭︰我仲以為係一袋一大粒呀!
我有諗過買黑米版架,不過貴成 50 yen 喎!

Anonymous said...

咦, 黑米版, 之前未見過, 係咪名古屋限定架, 下次試下先!

largeheadboy said...

小彭︰又唔見佢話係名古屋限定呀,你下次去東京又不妨留意一下吖!^c^

Anonymous said...

我會精神上支持你呀 ^^

largeheadboy said...

貝拉︰謝謝你啊!希望呢一兩日會上載第二天喇!