Sunday, May 18, 2008

巴斯光年

這天弟弟傳來幾張貓的照片。看着這貓,我不其然想起很多很多。



這貓叫巴斯,名字源自電影《反斗奇兵》裏面的巴斯光年,今年應該七歲。巴斯曾經斷斷續續寄居我家接近一年,把我的家搞得翻天覆地。那時候正值沙士肆虐的日子,我家的窗沒窗花,就算當時政府呼籲我們要經常打開窗戶,保持空氣流動,我都不敢把窗開得太大,因為害怕牠因為好奇而飛墜街上。每次外出,我總會再三檢查家裏的窗戶是否已經緊緊關上。記得有天回家,看見巴斯危坐在窗台,而窗又竟然沒有關上,我當場嚇得臉也發白,連忙引牠跳回地上。



巴斯脾氣很差,我猜理由準是牠給牠的主人寵壞了。我不太敢碰牠,因為牠會失驚無神抓你甚至咬你。有一次牠陪着我坐在沙發上看電視,怎料牠突然無緣無故伸出利爪抓破我的肚子,然後就拔足逃去。那一刻,我覺得自己很可憐,每天照顧牠的起居,最後還落得遭牠欺凌。不過,始終牠是很喜歡親近人,有時我把牠關在房外,牠就會發了狂的不斷撞向房門,跳高跳低,直到我忍不住牠的騷擾讓牠走進來然後坐到我的旁邊才安心。



雖然巴斯很喜歡牠的主人而牠的主人也很寵牠,可惜他們共處的日子不算多。除了寄居我家之外,巴斯這幾年一直在馬來西亞生活。上個星期,牠終於回到香港,由現在開始會是弟弟家中的一位新成員,過新的生活。



巴斯,你要好好生活啊!

17 comments:

Anonymous said...

我想起有個舊同學家住二樓, 佢隻貓經常自出自入玩跳樓之類, 不過出街玩完又會自己返屋企.

最尾一張巴斯個眼神好無耐咁喎!

Anonymous said...

I feel so relieved when I finally saw his photos. Even though he was with Professional pet agent, I still thought he's not safe....it's much better to be with family members.
Ricky

Ellen老師 said...

相比狗,老師害怕貓多D喎!

Anonymous said...

寵物入境,係咪要晌漁農處定海開隔離一星期架?

lau2tang said...

巴斯,
很高興認識你!
你要乖乖聽話啊~

supageti said...

巴斯的生活很飄泊呢,希望牠終於安定下來吧 ~

Anonymous said...

真係貓不可以貌相呀吓,睇佢斯斯文文咁,係唔係女仔黎架?

我隻貓都係成日咬人抓人,細時仲勁,成日同佢搏鬥到損哂,同佢相處左十年,而家我都對佢有相當理解,第一要明白貓同人一樣都係有唔同性格,我隻衰貓都係脾氣差冇耐性,細個時好怕人,可能之前遇過o的可怕嘅事,所以人地行去摸吓佢佢會以為人地打佢所以反抗咬人,不過日子一久佢會知道人係對佢好,而家都會咬吓人,不過我估對佢黎講呢個係玩遊戲或者表示不滿嘅一種方式.有時都會從後偷襲,好明顯佢係撩人玩,不過有時佢會玩過頭,但係佢一定知道o個囉.

其實無端端要佢寄居去第二度佢都要時間適應,喺佢個角度佢係唔會明白要遷居嘅原因.

我都要出去摸吓隻貓先.

largeheadboy said...

小彭︰我住 27 樓架,真係跌咗落街乜都冇呀!
最後嗰張相係巴斯當年第一次上來我家,一入到嚟就周圍搵地方“呢”,結果就走到去 sink 盤度,好可憐咁。

ricky︰估唔到巴斯咁快就融入咗新居,仲好似已經有埋地盤添!終於都見到佢了,大家都放心了!^t^

ellen︰貓有時都好乖架,當然呢隻有啲例外!咦,kitty 都係貓喎!

roy︰好似話入嚟香港依家唔駛檢疫了,不過就要有證明打晒所需的防疫針。我記得當件佢過馬拉,都好似坐咗幾個禮拜監。

劉鄧︰巴斯都算唔係好怕陌生人,我諗佢都好樂意同你做朋友!^o^
至於聽唔聽話,我諗要睇下細佬治唔治到佢喇!

意粉︰巴斯都算遊過埠,叫做好叻架!希望佢可以安安定定,唔駛再四圍搬喇(不過呀細佬好似諗住只在這裏住一年)!

lala︰巴斯仔嚟架!咁你隻貓又幾似巴斯喎!巴斯有時會攤在走廊上,我有時一行過佢就會無端端撲過嚟咬我,我當年成身都花晒架陰公。
係喇,佢無端端要搬屋,心情當然會煩躁些,不過又唔駛偷襲我吖!佢依家又大個仔咗啲,好似話定性咗啲咁話喎!

maymay said...

巴斯好靚仔!

Anonymous said...

歐巴桑的家族都很喜歡貓呢
不過沒時間照顧
所以搬出去住以後都沒有養貓
至於娘家的最後一隻貓貓
在外婆去世後的幾星期後便隨著外婆離去
現在想起仍有些傷感.....

largeheadboy said...

maymay︰巴斯真係好靚仔呀!不過衰就惡咗啲囉!

歐巴桑︰其實我都好鍾意小動物,但知道自己沒時間照顧而且自己又懶,根本唔可能養貓養狗。
養開有感情啊!細個我地都養過白鴿,但搬屋之後就沒有養了,到現在我都唔會食乳鴿。

Anonymous said...

巴斯好得意 ^^

光.軍 said...

一別巴斯已經五光年..時間過得真係快。佢個樣又唔似一般高竇Meow喎。

naruto said...

個樣話比我知佢好聰明

largeheadboy said...

貝拉︰如果佢乖乖地唔發惡真係好得意架!^O^

光.軍︰真係呀!我都冇見佢有四年了!得閒要去探下細佬順便探埋佢先!
佢算高竇架,唔係個個人都掂到佢架!

naruto︰我諗佢真係幾聰明架!當年我攔起晒啲唔想佢去嘅地方但係佢都有辦法去到架!

Anonymous said...

i have also used the first photo be my desktop wall paper. when look at him, i think of many many things. i still miss his beloved old owner...

i believe that buzz also miss her, so much.

largeheadboy said...

我都係……