Sunday, October 26, 2008

第十一日高迪的未來世界

來到西班牙的最後一天,轉眼這次行程就過了一半有多。對於行色匆匆的旅客,能夠停下來好好享受一頓早餐有時是一種奢侈。



巴塞隆拿幾乎每個角落都可以找到著名建築師高迪 Antoni Gaudí 的作品,繼前兩天到過的聖家堂之後,今天我們會參觀另外兩個也很有名的高迪作品。第一站是比較遠離市中心的桂爾公園 Park Güell,即使這樣,從旅館前去也只是六七個車站。



旅遊書教我們在 Lesseps 站下車,但從地圖看怎樣也是 Vallcarca 站近一點。最後我們在 Vallcarca 站下車,原來這裏不但近得多,沿途還有扶手電梯代步,省了很多爬斜路的氣力。



桂爾公園位處山坡上,在這裏可以飽覽整個巴塞隆拿市。



桂爾公園原本是住宅項目,但由於地點在當時來說委實遠了點,銷情很慘淡,最後被迫爛尾收場。後來市政府索性把這裏改為公園,免費供市民享用。



每次碰上不怕陌生人的小貓我總忍不住上前逗牠們玩一陣。



這裏最有特色的,一定要數由色彩鮮艷的馬賽克拼揍而成的蛇狀欄河。




當然,構圖很美的迴道也叫我們看過不停。



這條位於正門的蜥蜴去年曾被人惡意破壞,現在總算修復得完好無缺。



其實公園的每一個角落,都流露着不少高迪的巧妙設計。來來回回,我們就在烈日下走了多個小時。



這天實在太熱沒有胃口,午飯就只吃了早上時買的小蛋糕,反而飲料就不停灌進口裏。這瓶在購自超級市場狀似漂白水的檸檬汁,不消一會就給我們喝光。



第二站是位於 Eixample 區的米拉之家 Casa Milà。十二年前我曾過門而不入,只在禮品店買了一件襯衣。這次舊地重遊,兩天前也因為看見大排長龍而打退堂鼓。這天,再不去就不知要再多等幾多個十二年了!



米拉之家於 1912 年建成,當時是私人大宅,現時則由一家銀行擁有,還開放幾層供人參觀。這裏闢了頂層介紹高迪的生平和他曾參與設計的多座建築物,資料非常豐富。



中空的庭園、扭曲的欄杆,以至波浪型的外牆,要在這裏找一根直線絕不容易。有人說米拉之家像一個巨型的蜂巢,也有人說它像一座快要倒塌的沙堆。



無論怎樣,將近一世紀的建築到了現在還絲毫沒有過時的感覺,每一處都是那麼前衛大膽。



天台上形狀古怪的煙囪在藍天下顯得有點詭異。



最後一天在西班牙,有想過多吃一頓西班牙炒飯,但這家經常路過的自助餐廳價錢十分吸引,最後我們還是受不了誘惑。



就這樣,六天西班牙之旅就此告一段落。明天,我們會跨越西法邊境。

29 comments:

Anonymous said...

大頭係天台上影靚女背影
大膽d叫佢做你導遊一齊玩嘛, he....he....

largeheadboy said...

紅米奇︰呢位靚女好似有男伴架喇!hehe~~
我覺得呢張啱啱好又見到埋聖家堂好似幾有嘢咁!^t^

Ellen老師 said...

仲黎呀~~~

largeheadboy said...

老師︰點解你嘅留言咁似早排喺我嘅紅葉之旅留嗰啲嘅?^s^

supageti said...

帥哥不如快快手結埋個尾罷啦 ~

Ellen老師 said...

見你努力貼相~~未留個似曾相識的格言啦!
你再寫唔埋尾的話~~唔鬼睇添!老友!哈哈

largeheadboy said...

意粉︰我已經好努力架喇~~
長寫長有呀嘛,我仲諗住得閒寫埋個五天精華遊~~

老師︰多謝你啊~~
不過如果唔寫遊記,我呢度就冇乜嘢寫架喇~ ^t^

supageti said...

除左 USD GBP EUR AUD,仲揸住啲咩呀?整多個 MY STOCK 啦,不如 ~~ ^O^

largeheadboy said...

意粉︰咪仲有升到巴巴聲但又得唔係好多嘅 yen 囉~~
呢個嘢都唔係即時 update 嘅,把 x!

Anonymous said...

不如由得呢個爛尾啦...

maymay said...

雖然係有d....悶,不過,米拉之家又係幾特別喎~

supageti said...

嘩 ~ 米爆粗呀吓 ~~

你要 ~ 小心女人 ~ 小心女人 ~ 哈哈 ~

Ellen老師 said...

有人投訴大頭叔爆粗,罰企2個小息!

largeheadboy said...

小彭︰你不嬲都好支持我架!點解呀?

maymay︰悶咩?唔係吖~~
咪當睇相囉~~ >_<

意粉︰我幾時講粗口呀,我話“把鬼”之嘛!
咁你以為我講乜吖?

老師︰兩個小息?咁咪冇得去廁所,唔得個呵我!

Anonymous said...

聽從民意唔好咩! 唔通真係民望如浮雲呀!
(我都係等你有個下台階姐...)

supageti said...

我先唔會答你 ~~ 呵呵 ~~

largeheadboy said...

小彭︰畀多次機會我吖,我會寫好呢個 blog架!下一篇不日出場嘅法蘭西會好好多架~~

意粉︰哦!咁即係你諗粗口咋喎!

Anonymous said...

有無法蘭西多士先! ^^

Anonymous said...

唔好講笑,呢間Buffet Lunch 我都食左。當日我去有墨汁西班牙炒飯,pizza,烤肉,沙律等等.... 仲包杯凍飲,其實都算幾抵食。可惜杯軟雪糕太甜... 如果唔係就非常正。

而桂爾公園,好多旅遊書都無講有扶手電梯上,我同朋友見Lesseps好少人落車唔敢落,咁不如搭多個站,點知....

出到站行無耐見到條電梯,我地 2 個都知揀岩左,開心晒。

繼續好懷念....

supageti said...

唔好破壞我形象呀吓 ~ 〔溫馨提示:唔好得罪女人呀〕

largeheadboy said...

小彭︰你要我就去大 x 樂整份過你喇!我呢啲法蘭西嘢強好多架!^t^

karvitz︰好嘢!終於遇上知音!
呀,其實我會唔會係同你一齊去嘅呢?咁多嘢一樣嘅。
我去間餐廳嗰日熱到傻渴到死,送上嚟嘅細細杯可樂一陣就飲晒,如果有埋任飲就發達喇!
呢個價錢只係夠食一個西班牙炒飯,所以真係好超值。啲食物質素其實普普通通,但可以吃到飽,啱晒我地呢啲“筆直”traveller!其他食客大多數都係遊客啊!
有扶手電梯上桂爾公園真係省咗好多腳骨力,仲可以由上面玩番落嚟,爽好多啊!我地走的時候就由正門行返去 Lesseps 站,路程遠得多啊,同埋都好易行錯路。

意粉︰我冇呀,我一直都冇諗過粗口啊!
(不過上個禮拜打波,喺 maymay 面前講了個“P”字~~ ^p^)

Anonymous said...

對於你熱到傻渴到死,一杯可樂仔都足以救命喇!哈哈!

呢一餐都食得幾開心,又飽又任食,唔錯。而桂爾公園,我地走的時候無搭metro,自己行下摸下去聖家堂,行左都好長時間,好彩天氣都唔係曬,算幾好行。

我地私弟下可以繼續講喇.... 哈哈

largeheadboy said...

karvitz︰一杯可樂仔係完全唔夠啊,要慳住慳住咁飲~~ >_<
桂爾公園行去聖家堂幾甘過喎~
不過我地就有由聖家堂行去米拉之家,然後經呢間自助餐廳同埋 Plaça de Catalunya 返去 La Rambla,都不相伯仲架!^t^
咁你地住邊頭呀?我地就住在 Liceu 站,地點超好,十分方便。呀,咁你地有冇在 La Rambla 上面嗰間家樂福入貨呀?

Anonymous said...

都幾甘... 但行下睇下四圍的建築其實都唔錯,但就行到腳仔軟啦!

呢間家樂福簡直係“筆直”traveller的救星,去咗2次,每次都人山人海,但每次都有嘢買走喇!你有無掃貨呢?

Liceu 站都好近好方便,落樓就有街行,地點真係超我。我地住咗好遠,坐metro 在 maria cristina 落仲要轉車,每次返去都幾辛苦,但環境就好靜好舒服。

哈哈,呢個地方都算旅行熱點,但香港人好似就唔多去,搵到個知音講緊咩野都幾開心,真好!

largeheadboy said...

karvitz︰睇地圖 maria cristina 都小小遠喎,仲要轉埋車咪好煩囉?平好多嗎?

我地梗有去家樂福掃貨喇,生果呀果汁呀水呀,簡直就係行程其中一個重點呀!夜晚去到,啲水已經畀人掃晒!

呢次在 barcelona 都有撞到香港人,不過就唔多,反而去到邊都見到好嘈但係一啲都唔靚嘅韓國後生仔女~

Anonymous said...

咁如果相比La Rambla 一帶,呢間酒店真係算平,而且企理兼乾淨又光猛,絕對抵住,但就唔方便。

我地其實去到邊掃到邊,行過不同大小的超市都會行一行睇一睇,但講到最平最開心,都係家樂福喇!

其實barcelona 仲有好多地方可以去但我無去,一個係魯營球場,一個係山頂的奧林匹克運動場,好想去,可惜時間就唔到最後都係無去,但過左今次之後,都未知幾時再有機會再去喇!哈哈

largeheadboy said...

karvitz︰我地在 barceloneta 海灘都有諗過坐吊車過去山頂嗰邊架,不過去門口突然之間又覺得好貴,最後都冇上到去。

我反而依家後悔沒有晚上到米拉之家之類的地點拍夜景,可以當時食完飯都好攰,之後仲要返去執下嘢吵洗下衫,完全冇咁諗過。

實有機會再去歐洲嘅,睇下就唔就得啱嘅啫。^t^

Anonymous said...

講到影夜景,我都想影,但八點幾先天黑,返酒店的車就愈夜愈疏 (可能要等上二十分鐘先有一班),無可能在九點後再四圍去,所以我的相機裡只有幾張夜景照 .....

如果講交通,barcelona 其實算抵,買張十程票又有得免費轉乘之餘仲可以share 用,除開一程都係 7 蚊,算抵玩。

哈哈,要講的話仲有排可以講 :P

largeheadboy said...

karvitz︰咁你淨係去咗法蘭克福同埋巴塞隆拿咋?有冇去埋馬德里呀?其實我好鐘意西班牙,如果有機會淨係遊佢加埋葡萄牙就好了!

我地在巴塞隆拿頭尾三日,只係買咗一次十張的地鐵飛,很多時候都是行路,如果一味搭車可能會錯誤街上面的風景~~

你都寫多啲你嘅所見所聞吖,同人分享又好,給自己一個記錄也好!