Friday, April 17, 2009

自製三連休

上星期復活節的四連休過得十分充實,幾乎連休息的時間也沒有。星期二回到公司,整個人疲倦得很、沒精打彩,彷彿跟連續工作了十數天沒有放過假一樣。橫豎自己的 leave balance 再創新高,倒不如自製一個三連休,真真正正給自已充充電。

就在這個三連休開始前的晚上,跟友人到了近來頻頻光顧的餐廳,名副其實的暴吃了一頓。剛從西安回來的意粉,還給我們送上當地的名物黃桂稠酒。


可以跟大家暢所欲言,不用趕着回家的感覺真好啊!


今天是三連休的第一天,早上相約爸爸媽媽到中環的律師樓取回樓契。雖然去年年初已經全數還清了樓宇貸款,但我一直懶得把文件交到律師樓,要到了今天才名正言順擁有自己的物業。看着這些連釘書釘也生了銹的文件,我在想是否真的必要把它們放進保險箱呢?


乘巴士到了太子,二姊已經在茶樓等着我們。雖然琳瑯滿目的點心紙有時的確能叫人食指大動,但我還是喜歡跟推着點心車的大嬸直接說出我想吃的是什麼。這天我們又點了很多,只是媽媽依舊吃得很少。


木棉和洋紫荊都先後開了花,現在終於輪到魚木登場。太子道西是香港其中一處魚木最集中的地方,在大風下,花瓣一片片飄下來,畫面蠻漂亮。


這天晚上沒有外出,弄了餃子上海麵和廣島蠔炒蛋,然後一面看着帶來不少東京回憶的《爆粗 Band 友》。Tokyo Banana 果然是東京的最佳手信。


三連休轉眼就只剩下兩天了。

21 comments:

maymay said...

依家好難租到就腳嘅保險箱喇,我曾經租過獅子同痕身,一間搬走,一間取消保險箱服務,屋契我都係放响屋企咋~

大頭媽做乜吃咁少野呀,唔夠營養架,你要氹下佢食至得啊~~

個住家飯好得喎~~~

小彭 said...

上年學車時會經過太子道西, 魚木d花瓣飄下, 當時扮自駕賞櫻; 今年真的自駕賞櫻, 感覺真係奇妙!

Wendy said...

都幾難租到咁大個保險箱噃, 就算租到都唔會平.

如果攞係屋企, 駛唔駛scan左佢, 然後另外收藏呢?

supageti said...

我個保險箱仲有大把位喎,要唔要分租啲位過你呀?哈哈 ~~

largeheadboy said...

maymay︰我其實都唔打算將啲屋契放落保險箱度,好大機會就咁放喺屋企,我諗唔會有人爆格又或者爆渠啩~
不過會唔會當咗係廢紙攞去回收換返包丁麵就好難講。:p
媽媽成日都唔肯食嘢,我地覺得已經成為咗佢嘅習慣,勸極都唔聽~
尋晚餐飯好飽啊,之後仲食多個王林蘋果,好幸福~

小彭︰咁就緊係落櫻正過落魚木好多喇!
呢期啲魚木開得好勁,九龍公園、新蒲崗、荔枝角道頭都有啊!

wendy︰好耐無見喇!
我諗唔駛 scan 啩,成幾百頁紙,以我嘅工作能力,我怕要搞幾廿年啊,況且我又無 scanner~ ^r^

意粉︰你唔怕我攞晒你啲鑽石黃金然後走佬呀!^t^

rempei said...

那碗上海麵、菜心及廣島蠔炒蛋,不像一人前的份量喎~~

又~~大頭哥的個人物業似乎仍然欠缺一套物事招呼各界好友,唔知會否有所改善呢~~

lau2tang said...

你就好啦~我尋日同份annual account搏鬥咗一整天,到收工時,人人都走哂,得番我一個係度繼續糾纏,幾痛苦呀~不過,有咁耐風流,就有咁耐....,我明嘅!
屋契要小心保管,唔見咗其中一頁都會好麻煩,雖然可以去田土廳補領同宣誓,但又係要錢囉,所以,買個防火喼放係屋企啦~

紅米奇 said...

聽見唔洗供樓已是榮休, 仲好過3連休呀

largeheadboy said...

薯嘜︰我幾時話過我係獨居老人呀,我一家大細架。
上我屋企隨時都得喇,不過都話要裝完修至得咯~

劉鄧︰我知你係一個好盡責嘅人,即使老細睇都唔睇就咁簽個名你都會好認真做好啲嘢。不過呢,點解唔留返下個禮拜至做埋佢呀?
係呀,原來如果唔見咗,補領返一張就要 $250,成大份的話分分鐘仲貴過層樓啊!

紅米奇︰哈哈,又係喎!又要安排吓退休大計先~ ^_^

supageti said...

我個保險箱入面都係紙張黎啫,你擔心下我撻左你份屋契好過啦,哈哈 ~~~

largeheadboy said...

意粉︰我知你唔會嘅,我知你住邊架!hehe~

lau2tang said...

大頭仔,
為因下個禮拜係死線呀!
有得偷懶ge話我又點會放過呢~

supageti said...

原來有人真係好天真好傻,哈哈 ~~

lala said...

我今年應該冇時間睇魚木囉.

largeheadboy said...

劉鄧︰我就通常留到死線前的一日才趕工~

意粉︰其實諗真,做人好天真好傻可以係一種福份~

lala︰我都係你舊年講咗至知佢地叫魚木咋~
真係啊,成日都搭車見到佢地,能夠停下來慢慢欣賞它們的機會未必成日有。

supageti said...

依啲福氣留番俾你嘞。:p

largeheadboy said...

意粉︰唔緊要吖,我有大把,畀啲你都無所謂~

fatfun said...

想問, 幾時去探theresa啫... 搵埋譚佬啦!!

largeheadboy said...

fatfun︰唔,真係唔好意思,成日都無搵你同譚佬~
你收貓喇~

supageti said...

要你畀?講都無人信啦 ~~ :p

largeheadboy said...

意粉︰咁又係,你自己都有大把,都唔希罕我嗰啲~ ^t^