Saturday, September 05, 2009

從半島到文華

某天下班後到了半島酒店的餅店,看見還有兩件草莓卷,就即時把它們買下來。有人說草莓卷今非昔比,味道差了很多,但對於才第一次吃的我來說還是覺得很不錯啊!


除了草莓卷,我還買了檸檬芝士蛋糕。吸引我的,究竟是那淡淡的檸檬味,還是寫有半島名字的朱古力呢?


現在大多數酒店的自助餐至少索價三百塊,所以我覺得文華酒店閣樓的 Clipper Lounge 很超值,尤其當你身處香港的地標,看着窗外的夜中環,什麼都回本了。


這裏的食物不算大堆頭,但你想要的都找得到。


我始終是膚淺的,看見有文華招牌的東西,就靜悄悄地據為己有。


曾幾何時,半島酒店和文華酒店是香港兩家最高級的酒店。時而勢易,這十多二十年間香港一下子出現很多五星級六星級酒店,半島和文華的鋒頭都給搶過去。或者當我這草根都來光顧,半島和文華的確比從前變得平民了。不過,在我的心中,這兩家酒店永遠都是最高級的。

24 comments:

Ellen老師 said...

呢兩個據為己有來做咩呀?
最近我都吃了半島月餅!

ROY said...

從鏡既反映見到邊個同阿邊個喎~

當初阿so介紹時即試,好好味,之後再食就真係無咁好味~

紅米奇 said...

好識歎喎, 炎炎夏日整件cake來補充體力
very good la ^^

lau2tang said...

識得去文華同半島high tea,就唔係草根啦~

小彭 said...

我呢d草根, 去親文華都黑仔架. 食沙律食出隻蚊, 再唔係就遇上唔好食ge名物, 又再唔係就遇上超難食番叮waffle.

largeheadboy said...

老師︰我都唔知攞嚟做乜,師奶仔性格嘛~
半島月餅名物嚟個喎!

roy︰咁即係呀邊個同阿邊個呀?
唔,咁或者下次我再買嚟食就真係無咁好味都未定啊。

紅米奇︰嚟多杯凍琲就仲正啊!

劉鄧︰平時我都係去開大x樂大x活食茶餐架咋,好間唔中至扮一次上等人~ :p

小彭︰我又好好彩喎,呢兩度感覺都非常良好喎,不過下一次食運又未必咁好。原來文華 buffet 雪糕要 order 至有架,蝕咗添~

rempei said...

這款草莓卷在我同事離職前請我吃了一件,果然沒有傳聞中咁好味!

另外,我又唔覺得這兩所聞名世界的酒店變得平民了,好像半島我由細到大都想去coffee shop order一支"緣寶"慢慢享受,但到今天仍未如願! 至於文華我亦只光顧過1000零1次!

小頭 said...

或者當我這草根都來光顧,半島和文華的確比從前變得平民了。 -- 另一個解釋是,大頭帥哥升呢了 ^^

我想這兩家酒店有一些東西不是其他新建的六星級酒店可以取代的,但我其實不愛半島加建的部份,也不想文華重建...有些氣質和感覺是不能以設施、面積等等去換回!

唉,香港是個趕著向前,而遺失了不少寶貴回憶的城市。

largeheadboy said...

rempei︰或者之前期望太高吧!我覺得個草莓卷都唔錯,又唔算太甜或太膩。
乜係要去半島飲綠寶架?不過依家佢地個 drink list 未必有喎~

小頭︰做咗咁多年人,間唔中都會升下呢架~ :p
我都唔鐘意半島的擴建部分,好唔夾咁,而我都好懷念仲有露台的文華,雖則都唔係好關我事咁。乜都拆乜都改,上個禮拜行完灣仔都好感慨~

maymay said...

做左上等人,一蚊咖啡唔會再飲喇呵~~

joeyee said...

你拿拿聲死出黎比返二十六個三我!!!!!

largeheadboy said...

maymay︰尋日飲咗哥戴化朱古力,都係 $1~

joeyee︰我知我甩底係我唔啱,但賠償嘅話又應該唔止 $26.3 呢個價錢喎!

lau2tang said...

$290-($290x10/11)=$26.36
小儀收順咗添喇~

ROY said...

原來$26.3係咁計架,勁呀~~

d乜行物行咁排升咁多,網主就請我地去容龍食番餐都唔過份丫~ 呵呵~

largeheadboy said...

劉鄧︰咁即係如果齊人一人 $264 左右,咁咪好平囉!就當係加一吧~ :p

roy︰話時話,乜行物行我都有貨呀,真係乜都返晒家鄉喇,連之前去咗火星嘅 386 都返埋屋企一家團聚喇!^t^

naruto said...

你竟然用草根嚟形容自己!我唔信囉

ps:我呢個草根都可以搵日去試下

largeheadboy said...

naruto︰我成日摷 Q旁用又貪小便宜,好明顯係一大條草根喇!:p
如果真係去,記得早啲預訂埋窗旁的位,開心好多架!

lau2tang said...

如果齊人,就有海龍王湯同蒸象拔蚌之類食啦!我地要追討損失呀!

largeheadboy said...

多我一個就多咁多嘢食呀?我有冇咁大食呀!^t^
下次再食喇,如果我唔甩底嘅話而大家仲肯預埋我嘅話~

lau2tang said...

下次想參加的話,我會要你預付費用!你諗清楚先好~

ROY said...

直頭要開張無銀碼支票做抵押呀!!!!

largeheadboy said...

哈哈,一個比一個毒辣呀!預繳已經好陰功架喇,跟住仲要開埋無銀碼支票真係點都要仆到嚟喇!^u^

積奇媽媽 said...

愛玩愛吃的大頭仔哥哥,據我所知,應該係「時移勢易」呀,好好回去研究研究吧,哈哈!

largeheadboy said...

積奇媽媽︰係,即改即改,才疏學淺呀我!我又要繼續我嘅研究工作喇!:p