Monday, November 09, 2009

肥胖周末

近幾個星期,除了日間會打羽毛球之外,晚上間中也會跟友人球聚,運動量一下子增加了不少。可能是日子有功,這陣子不約而同有人說我清減了,沒有之前那麼腫脹。別人說的或許不能作準,自己的感覺還是最真。的而且確,近來自己也發覺腰間鬆動了,整個人也感覺輕盈了一點。這種感覺是很好的。可是初見的少許成績,在剛過去的周末假期又給自己一手摧毀了。

星期六與友人到了近期的人氣店稲庭午間小聚。三個人像剛放監出來似的,不斷的加添食物,到最後還把雞蛋和白飯倒進鍋裏弄來很好吃的雜炊,一點一滴也給我們吃光。這裏的名物是又幼又滑的稲庭烏冬,好吃是無容置疑的,可是為什麼我覺得這烏冬跟我們的壽桃牌上海麵味道和質感是一模一樣的呢?


吃過絕不便宜的午飯,晚上就決定乖乖留在家裏吃。可是走進超級市場,我又失控了。趁秋刀魚還是肥美,就買了一小盤刺身,然後再弄盤柚子沙律和羊扒意粉,就是一頓很豐富的晚餐。


很久沒有星期日在家裏吃早餐,因為通常睡醒後不久就是午飯時候。這天花了很少功夫,就弄來很簡單但叫人吃得很愉快的早餐。麵包是昨天買的,烤熱後加些夏天從軽井沢帶回來的橙皮果醬,美味得很。再吃一口當年到英國玩時很喜歡吃的 Müller 牌乳酪,這個早上什麼睡意也一掃而空了。


弟弟剛從叫天不應的孤島搬回市區,星期日下午我們大伙兒就造訪他的新居。由下午到晚上離開之前,我們的活動基本上就只有吃。弟弟和弟婦很有煮意,為我們弄來很多很好吃的東南亞美食,我們都大讚他們的心思。不過要是下次又搬新居大宴親朋,還是要考慮爸爸媽媽的口味,弄些蒸水蛋或者菜心炒肉片好了。


完蛋了,這天早上扣上皮帶時,之前腰間的繃緊感覺又回來了。沒辦法,明天唯有加開夜場繼續做運動去。

24 comments:

naruto said...

隻貓最後一張相呀?跟住食埋呀?

rempei said...

美味的食物確實有令人開朗暢懷之功,餘下的副作用,擔心來幹啥~~~

largeheadboy said...

naruto︰哈哈!你成日都咁講~ :p
隻貓叫巴斯呀,喺我屋企都住過一排,不過成日都養唔熟,尋晚仲畀佢咬咗一野,下次真係要食埋佢!

rempei︰當你發覺條褲鬆咗啲真係好開心架!有幾何呢你話。當然,美食係點都要繼續食落去嘅~

lau2tang said...

隻貓的性格咁似你嘅~^o^

歐巴桑 said...

每年的十一月至翌年的農曆新年都簡直是狂吃的日子:-p

largeheadboy said...

劉鄧︰乜你養過我咩,你又知我養唔熟嘅?^t^

歐巴桑︰冬天要不斷吃囤積脂肪保暖呀,同埋又有厚厚嘅衫做掩飾,無有怕啊!:p

supageti said...

仲想話巴斯個樣溫柔左添 ~~~ 貓貓性格係咁,你養得佢就要適應佢 ~~~

joeyee said...

食野最緊要, 食完再減過啦...喟...

lau2tang said...

有~
一齊去旅行時,我咪包你一日三餐囉!
la~你咁快就抽我後腳,仲唔係養唔熟?^o^

naruto said...

無啦啦張相組合係食物,隻貓提都唔提,只會聯想係火鍋料啦,應該都唔會拎黎整蛋糕既

紅米奇 said...

怕咩啫, 食得是福, 打多2場球又可以食多2餐, 無有怕啦, 食左先算

largeheadboy said...

意粉︰巴斯老喇,今年應該九歲喇,少減啲火氣,所以呢次畀佢咬沒有流血,嗰陣時我成身血痕架~

小儀︰其實我又沒有刻意去減,順其自然喇,況且我都唔會餐餐大魚大肉喇。今晚我食麵包咋~

團長︰畀人包係唔駛出錢架一日三餐~:p
今次最衰撞唔到,唔係我一定包番你!

naruto︰咁我想畀機會巴斯出下鏡吖嘛~
佢老喇,啲肉應該一啲都唔嫩。

紅米奇︰今晚真係啱啱打完波返嚟,出了一身汗然後沖番個靚涼超爽啊!

maymay said...

碟意粉係用乜野汁煮架?
個朱古力蛋糕得唔得?

largeheadboy said...

maymay︰意粉無汁架,本來想用明太子醬,但見到羊扒有啲汁咪慳番囉~
個朱古力蛋糕超得,裏面啲朱古力醬好多,好滿足,諗起都想食。

lau2tang said...

我都無話係"無料"包你~
乜返到家鄉喇咩?
弊在的円都升到亞媽都唔認得喎,咪一條數!

largeheadboy said...

團長︰“包”緊係要無料架喇,唔係邊個肯畀人包~ :p
一條還一條喇,總之澳元平平安安返到屋企我已經好滿足喇。日圓,仲有時間嘅~

rempei said...

下次買褲時買大2個碼咪成日都咁開心囉~~

又,幅新宿相令我好醒神,定住癮先!

largeheadboy said...

薯嘜︰但係遲早又會覺得好窄架喇!>_<
呢張新宿相我覺得好正,下次去要喺同一個位影返張。呀,遲下你都可以睇我地啲遊記頂下癮吖~

supageti said...

尋日本來卜左 Marriott 下午茶,但因為人太少,改為去 Kowloon Hotel。^^

largeheadboy said...

意粉︰Marriott 真係 hea 得好舒服,不過就最緊要有梳化位囉。九龍酒店反而很少去啊~

supageti said...

Kowloon Hotel 平嘛,折左 $150 左右,又幾多野食,不過時間三至五短左啲啲囉。但係我地得三個人都勉勉強強夠 hea 喇。

largeheadboy said...

意粉︰三至五又真係短左啲,不過今次我都只係 hea 到四點,然後趕返娘家再吃晚飯~

bethlehemstar said...

稻庭烏冬點可以同壽桃牌同日而語呢?佢地的元祖佐藤先生可能翻生鬧你架。

largeheadboy said...

伯利恆之星︰咦,有新屋喎,仲好骨子添~ :p
真係一模一樣架,可能大家食緊嘅其實係五個八一大包嘅貨色嚟架咋~