Monday, November 23, 2009

大頭碎碎唸

很多人都會在辦公室多放一雙鞋,以備不時之需,可是應該沒有多少人會把家裏的鞋櫃搬到辦公室吧。早幾天因為下班後要打羽毛球,於是從家裏帶來一雙新買的運動鞋。連同自己正穿着的皮鞋,我發覺我的辦公桌下面竟然藏有四雙鞋。


友人轉贈的杯墊、買蛋糕券得到的生日卡、購入價比在日本發售的價錢還要便宜的日版月曆,以及千辛萬苦真金白銀一 fun 一 fun 換來的公仔,我的鬆弛熊家族越來越人強馬壯了。


剛過去的一個星期,有四天我都走到佐敦這裏。周末周日連續兩晚,我更在同一家店子吃火鍋。昨天晚上我一面看着火鍋冒出來的蒸氣,一面在想是不是應該到十多分鐘之外的地方走一走。然而今天午飯時收到一個電話,我知道這個晚上不用再到佐敦。


大概是去年這個時候,夜空的新月和兩顆星星構成一張笑臉,彷彿是對當時意志消沉的香港人打打氣。這個晚上,這張笑臉又重現在夜空,只是它這次瞇起了一隻眼,但仍舊是叫人看得心暖。


朋友,在這個難熬的日子,請抬頭望向天空,你就知道有人默默守護着你。

23 comments:

小彭 said...

我今晚望住個天, 都諗左好多野.

naruto said...

你覺得係月光咩?我覺得似把刀,一把殺人嘅凶刀

largeheadboy said...

小彭︰得閒諗下野對膚淺嘅我地嚟講幾重要架。呢幾日個天不論日頭定夜晚都好靚~

naruto︰咁無詩意架,似刀嘅話都應該係似一把收割稻田嘅鐮刀吖嘛~

supageti said...

尋晚我都望住單眼哈哈笑好耐,不過無野諗 ~~ :P

naruto said...

無睇電視架,對白嚟架

歐巴桑 said...

次次都淨係抽到5fun10fun
都不知要再買多少先可以幫大叔集齊全套啦:-p

galaxy said...

呢排你好似食好多火鍋....

光.軍 said...

檯底可以放四對"事啤"鞋...都幾勁吓喎 :( 你個位有無車位咁大呢? :P 我淨係族一對拖鞋以備不時之需架咋.. cheers for 四對

maymay said...

放咁多對鞋,一定臭到暈呀!
係咪陰謀黎架,等你上司唔敢行埋黎check你呀~~

唔駛再去佐敦,好事定唔好事呀?
希望係好事啦~~

lau2tang said...

食咁多火鍋,肥死你呀!
做乜事搬咗的波鞋返公司?
要打波ge話,一對就夠啦~

rempei said...

閣下公司同事有否試過誤以為寫字樓有死老鼠在天花上而向大廈管理處投訴呢? 哈哈~~

rempei said...

話時話,今晚心情好差~~~唉~~~

小妹 said...

哦? 原來我當時和你看著同一個月亮呢!
(寫得好有詩意呀我!)

roy said...

乜原來咁快又一年喇,今年既笑月無緣一會...

紅米奇 said...

呢期凍左好幾日, 奈何我一次邊爐都未打過, 點解? 我都唔知, 無得解, 等我都望下個天睇下有咩靈感先

公司有4對鞋, 唔係掛, 果然厲害, 証明你對公司幾有歸屬感 XD

largeheadboy said...

意粉︰心無雜念呀你,升咗呢喇你~ :p

naruto︰係《宮心計》定《富貴門》架?我無追開電視劇架。

歐巴桑︰今期送多一個貼紙的東西唔啱心水好難儲呀,都係上期果汁同埋卷蛋好得多。細細聲話你知,黃x仙地鐵站間 ok 啲貼紙自己攞架,你明喇~ ^t^
加油呀!我依家向第二個公仔進發喇!

galaxy︰係呀,個個禮拜都食一兩餐,好彩我都會食好多菜,不過始終每次都會食多咗,之後又會好口渴。呢幾日暖番,應該會打少啲~ ^t^

光.軍︰第一對個鞋底已經爛晒,所以帶咗第二對返公司,但其實呢兩對都唔係正式嘅運動鞋,早幾日崇光大減價,終於買咗對正正經經嘅運動鞋,所以至有咁多對。依家枱底逼到對腳都唔係點郁到架!:o

maymay︰我老細一早都放棄咗我喇~ ^d^
唔駛再去佐敦,係唔好嘅事……

劉鄧︰所以我今日收咗工又去打波,出下汗燒下脂,功效唔錯呀!
依家我打波剩係着新鞋仔架咋~

薯嘜︰老老實實,早幾個月我地公司的確有老鼠呀,我個位仲係重災區添呀,都咪話唔恐怖~
做乜事心情唔好呀?生意好過頭呀?得閒出嚟打邊爐飲吓 497 囉~ ^u^

小妹︰或者喺 2009 年 11 月 23 日晚上 8 時 19 分嗰一分鐘,我地係望住同一個月亮~ ^v^

roy︰的確係呀。我仲記得之後個零月左右我地夢幻之旅喺成田臨分手嗰晚就見到單眼嘅笑臉。今晚好似都唔係好見到佢喎~

largeheadboy said...

紅米奇︰你係咪身子強健唔係好覺得凍呀?抑或要清咗為咗儲 asia miles 喺超市買嗰啲貨先呀?^t^
點止幾有呀,係好有歸屬感添呀!希望我老細都係咁諗喇~

小頭 said...

喺 2009 年 11 月 23 日晚上 7 時 xx 分嗰一分鐘,我都係望住呢一個月亮 - 左邊上面有粒星,不過缺乏想像力的我可沒想到是月亮在瞇眼...

而當時只在想「川麻辣」會不會是個地雷,我膚淺得黎好實際呢!

lau2tang said...

睇完以上留言到依家都唔係好明,既然第一對鞋鞋底爛咗,點解仲留係度展覽,唔通帥哥想拎去回收?

supageti said...

我一向高呢,你唔記得左我係空心人咩?:P

不如話你個位係垃圾崗罷啦 ~~ @@

largeheadboy said...

小頭︰實際啲都係好事吖!醫肚呢家野好重要架~
話時話,今晚嗰粒星去咗個口下面喇~

劉鄧︰嗰對甩晒底嘅鞋着咗好多年,我好鍾意架,唔係好捨得掉咗去~

意粉︰唔記得喇!咦,咁我係咪都係空心人?^^
我個位真係慘不卒睹,連行入去個位都有困難啊~

supageti said...

咪白撞呀,你依種叫做無心人至啱。

largeheadboy said...

意粉︰白撞無蝕底吖嘛~