Monday, December 06, 2010

20101127︰成田、上野、新宿、明治神宮外苑

這次短短五天的日本小旅行,為了盡用時間爭取每一分每一秒,繼夏天那次瀨戶內海之旅之後再次坐上凌晨機,只是這次降落的地點改在成田空港。


在飛機上沒有怎樣好好睡過,因為幾排之後有乘客整晚咳過不停。幸好我的咳嗽已經好了七七八八,否則被人埋怨的一定有我在內。飛機沒有誤點,六點過後就抵達成田空港。趕上 6:50 發的電車,然後在成田轉坐快速特急列車,剛過了八點鐘就來到上野。


走出車站,有點寒意,連忙取出羽絨外套。如果這次只待在東京不到長野的話,應該不用帶羽絨外套同行,因為出發前看天氣預告說長野的低溫只有零度,在我們前去的那天還會下起雪來。


都營地下鐵每年都會按季推出只限六、日和假期使用的一天乘車券,只賣 500 円,比平日可以多坐巴士和都電荒川線的普通乘車券省了 200 円。我們這天的行程基本上就在都營地下鐵沿線,連這晚入住的旅館也正正位於新宿都庁前上面,所以這張都營地下鐵『秋』のワンデーパス非買不可。


把行李存放到旅館後,正式展開今天異常充實的行程。第一站是先到新宿駅買下明天到高尾山的高尾山割引乘車券和後天往長野的高速巴士車票


如果沒有轉黃,相信我一定不會那麼細心留意到新宿駅對開的中央通原來都長了一排銀杏樹。


紅葉季節的主色除了紅色,銀杏樹的黃色也是基本色調。我們隨後前去的明治神宮外苑,銀杏並木的紅葉指數已經是高得沒有可以再高的 100%。


明治神宮外苑的銀杏樹已經有八十多歲,每年到了十一月,葉片就陸陸續續變成黃色,一下子令平平無奇的馬路變成一大片黃海。


櫻花和紅葉隧道以前都走過了,原來走在黃色的銀杏隧道也是那麼叫人感動。


這天正值周末,遊人很多。我們剛坐了幾個鐘頭飛機還沒有好好休息過,看見路旁有長椅就坐在下來休息一會,細看隨風跌下來的葉片。


平日循規蹈矩很遵守交通規則的日本人,看見這裏四排合共 146 棵銀杏樹,都不理會自身安危或別人目光,紛紛走出馬路捕捉這美景。


在這個能夠拍下銀杏並木的最佳位置,只要汽車在交通燈號前停下來,人們就會爭取那短短一分鐘的過路時間,在馬路的正中央拍過不停。


最遠處的那幢建築物,就是聖德紀念繪畫館。


有紅葉祭櫻花祭哪又怎可以少了銀杏祭?


如果說京都秋天的顏色是紅色,那麼東京秋天的顏色一定是黃色。


同場加影在聖德紀念繪畫館外面舉行的古董車巡遊。


遊罷明治神宮外苑,搭上這天的第三程地下鐵到銀座吃壽司去。

22 comments:

L L said...

唉,真的美,還是那一句,日本真叫人愛恨不得!

maymay said...

第一日已經好精彩喎~

由機場至上野轉車去新宿?車費幾銀呀?

小妹 said...

唉...大頭你應該早一日出呢篇丫ma...

largeheadboy said...

laulong︰就是這個緣故,叫我一直只往日本那裏去,頭也不回~

maymay︰呢一日仲有下半場,之後都一樣咁精彩架!
機場去上野呢程 Y1,000,之後由上野去新宿就用咗都營嗰隻 Y500 乘車卷,呢程單買都要 Y210 架。如果坐 narita express 就要 Y3,110,仲要七點半至有第一班車,去到新宿要九點幾~

小妹︰咁你應該再早一日通知我吖嘛~ :p

Rempei said...

壽司在那一間舖頭吃的呢?

largeheadboy said...

rempei︰壽司店喺係銀座,下一篇會講架喇,咪咁心急喇!

lau2tang said...

凌晨機,我都擔心緊自己捱唔捱到。
碟壽司好得咁喎~

卡臣 said...

那邊天氣冷嗎?

TY said...

日本真係令人又愛又恨!!!


銀杏並木真係好靚...好彩部車GPS指左我地去呢樹!


點解你次次D野食都好似咁好食架?!!!

ayclui said...

D 銀杏樹真係好靚呀!
快d寫下一篇遊記啦~

naruto said...

銀杏好靚,去咁多次日本,都未見過銀杏,點解呢?

supageti said...

今日好大風,頭先番屋企果程車啲落葉猛咁飛埋黎,我諗起伊賀隱者 ~~~

supageti said...

伊賀忍者至啱 ~~~ :P

l.minor said...

咁靚嘅銀杏樹,唔怪得又決定去啦!非常應同laulong的一句:日本真叫人愛恨不得!

你個遊記半日都咁精彩,寫哂五日重得了...

你果張d人走哂出馬路影相果張,真係好正~特別係mou係度果個人個表情;另外d銀杏機一排排咁,真係好壯觀!!!

最後,你個壽司...唔係一人份量呀?

小彭 said...

好利害播, 搭到咁早架車, 你有無執番個樣架?!

largeheadboy said...

劉鄧︰無有怕吖凌晨機,搭咗一次以後你都會揀返佢架喇,因為時間實在太好用喇!浸個溫泉就成個人返晒嚟~
你唔食壽司都覺得碟壽司好得?:p

卡臣︰嗰幾日喺東京未算好凍,一件外套我覺得已經好夠,不過上到長野去睇馬騮浸溫泉嗰朝,就凍到手都赤。

TY︰你都去睇完銀杏嚟?好簡動啊呵?
咁啱啫,況且去到日本,邊度啲野食都好似好好味~

ayclui︰銀杏確係好靚呀,尤其係咁密集就覺得更加震撼。秋天果然係一個色彩鮮艷嘅季節。
夜啲希望有 day 1 第二 part,要加油先~

naruto︰嗱,聽朝即刻飛過去咪有得見到啲銀杏水尾囉!要快呀!^^

意粉︰我今日出去食飯都成塊樹葉車埋嚟我塊面度呀!咁你有冇用手指夾住佢地呀?

l.minor︰日本我愛多過恨囉~
唔駛擔心,以我嘅往績,應該寫到第三日就爛尾,去唔到第五日架!
日本人好齊心,做乜野都一大堆人,所以當你見到人又做你自自然然都跟住做。我地成班人企喺馬路中心影完又影,真係好過癮。
啲壽司好多咩?我地一人一盤都覺得唔係好夠呀!哈哈!

小彭︰搭唔到呢班仲有 7:02 同埋 7:12,都搭唔到就大件事,會成十點先至去到新宿。所以你話 7:12 至去寄喼我有啲驚架。
我呢啲唔顧身世嘅,剩係等行李嗰陣去咗轉洗手間咋,連牙都無刷~~~~

紅米奇 said...

乜咁怏就睇完一篇架, 唔好停筆寫多D post多D呢, 銀杏樹巧靘, 心急人上 ^^

largeheadboy said...

心急人︰呢日分到三篇,分開幾日 post,從來未試過一日做咁多野呀!第二篇就搞好喇!
黃色的銀杏樹葉片真係好靚,我仲超喜歡佢地個形狀。話時話,都營個標誌都係一塊銀杏樹樹葉~

小彭 said...

我攪呢攪路又刷牙洗面, 咪9點幾先到上野, 個一刻真係有d不知如何是好囉! 下次有零晨機, 我都係會搭, 今次又係未起飛都已經瞓咗, 都算係咁喇!

咦, 我睇完銀杏, 都係去咗銀座食晏, 不過係食鵝肝飯.

小彭 said...

呀, 唔係, 中間仲攝咗個鐵塔先去食飯.

largeheadboy said...

小彭︰九點幾至到上野實在太過分喇!下次唔可以洗面呀!:p
未起飛就瞓着,點解我從來冇呢個福份嘅。
咦,我行程同你差唔多喎,我就喺銀座食完晏先至去東京鐵塔,不過係新嗰個 sky tree~

TY said...

係呀.. 十一月中去左轉.. 真係好簡動!! 除左因為銀杏,仲有同行者!:)