在電視看到蘇絲黃介紹中環永樂園的熱狗，第二朝一覺醒來魂魄未齊便直奔中環去。
周日的中環繼續是外傭的天下。從賣衣服的攤檔鑽進昭隆街，才發現永樂園這天沒有開門，雖然大閘仍然寫上星期天在十時開始營業。
吃不到熱狗，唯有走到威靈頓街的筷子記吃澳門麵。
在中上環逛了一會，轉眼又是下午茶時間。先到皇后大道東的快樂餅店買了兩個菠蘿包，再到灣仔頭的 prêt a manger 買了在“非繁忙時段”買一送一的莫卡，然後走到太古廣場三期後面的小廣場曬太陽去。一頓稱心滿意的下午茶就是這樣。
路過各方大肆追捧的熱狗店 shake'em buns ，人龍排到門外，彷彿不用錢的。小小的店子內外都擠滿了人，心想內裏一窩蜂的食客會吃得出滋味嗎？
跟永樂園的熱狗緣慳一面，始終有點心有不甘，所以星期一便再次踏足昭隆街，買了孖腸熱狗和奶茶做午飯。
熱狗沒有蘇絲黃講到的那麼超讚，但十元八塊便能嘗到極具風味的港式熱狗，你還可以要求什麼？
17 comments:
亞蘇個節目，上星期介紹了shake'em buns ，所以這店只會越來越多人！
孖腸熱狗見亞蘇食得咁滋味，我都好想找機會試一試！
你的午餐果然多選擇，真是羡煞旁人！
shake'em buns 人多得實在過分呀！
我就係比亞蘇引到我星期日即刻出動，佢地平日好似開到九點，行開行埋就去試試啦！
其實早幾日都跟亞蘇去埋深水埗……
咁有無食到咖喱魚蛋？定喺你去了做推拿？
"孖腸熱狗和奶茶做午飯"?! 三點咪要食下午茶?!
早前去了shake'em buns, 也是阿蘇效應! 不過好介紹的, 都比較平易近人... 價錢及口味兩方面!
劉鄧︰唔單只食咗咖喱魚蛋，仲食埋咖喱魷魚，爭在唔知道檔推拿既地步 >_<
下個禮拜應該係銅鑼灣。
小彭︰好彩我都捱到五點先肚餓 ^e^
我都是因為蘇絲黃才曉去 shake'em buns ，只是那時還沒有現在墟磡！
Shake'em Buns 算是不錯，永樂園 N 年前食過，不算突出。
孖腸熱狗!! 我都未試過吃孖腸!
意粉︰shake'em buns 確是不錯，但人家一條等如人地四條孖腸熱狗了！永樂園係普普通通，但又係那句，好 feel 。
jason︰佢地有單腸，只是六蚊。蘇絲黃話佢地 d 腸係荷蘭入口的。
蛇竇都無晒 feel 啦，永樂園有 feel 咩？^o^
意粉︰我呢類外表洋化內裡無乜文化的人就是覺得這些舊式茶餐廳有 feel。蛇竇我都耐唔耐有去架！^c^
腸仔曾經是我的至愛,後來因怕肥, 所以少食了.... 筷子記的麵有澳門水準嗎??
我呢類外表同內裡都無乜文化的人呢，就是覺得依家邊樹都無咩 feel 嘞，呵呵。
大頭咁鍾意依 d 舊式食店，一於移民過澳門啦。
尋日去買節目介紹既皮蛋，去到見到由十蚊四集加到十二蚊四隻.......
頭先食飯食左隻，ok咁囉~~
阿蘇魅力果然沒法擋！
貝拉︰腸仔應該係其中一樣我一世都戒唔到既嘢。
我還沒有吃過正宗的澳門麵，無從比較啊！
意粉︰正是因為呢度周圍冇邊豎有 feel ，要搵多啲比較有 feel 的地方去。
可以的話，誰想留在這裏 ^t^
萊少︰那天也有想過買埋皮蛋，但唔知點解又冇去到，我已經去到永安架啦。
筷子記想去好耐, 未去, 想在過年前去一次, 有無心水推介? 如果想去埋意粉買皮蛋的九龍妝醬園, 就唔就腳呢?
快樂餅店D飽零捨鬆軟, 好好味! 每次必買雪糕筒, 我有時癲到行半粒鐘買來當晏食...
小妹︰筷子記在餐牌上 mark 咗有乜推介，我地都係跟住試。我地係撈沙茶醬，仲有番茄醬同蠔油比你揀。
沿威靈頓街直行右轉嘉咸街就到九龍醬園，唔駛一分鐘。
快樂餅店既菠蘿包好得，雖然不熱，但皮很脆啊。忌廉筒也是“買飛佛”！
Post a Comment