Tuesday, May 29, 2012

沒完沒了

離家十天,感覺就好像去了一趟旅行。

回到家裏,跟兩年前裝修過後表面上看來什麼也完好無缺的樣子差不多。裝修師傅清場後,清潔阿姐就進駐,把整間屋打掃得比我自己打掃時還要乾淨多幾百倍。


沒法想像早幾天這裏還是一個大工地。


大門的門鉸修理妥當、全屋的水管都更換過來、有水漬並且發脹的牆身給剷去又油上新的油漆。


之前有點擔心在娘家過夜會不習慣,結果每晚躺在爸爸以前睡過的睡床,頭碰上枕頭還是不用五分鐘就呼呼大睡。

娘家的洗衣機壞了,不過就算運作正常娘親也只會用手洗衣服。結果,每晚我都自己動手洗衣服,然後把它們晾在窗邊。


現在只欠裝上廁所的玻璃趟門,這次小裝修就算大功告成,一切也回復正常。

正當以為煩惱的日子終於過去,赫然發現牆身竟然又出現水漬。

28 comments:

Jackson said...

做化妝 cover 水漬邊得架....

largeheadboy said...

jackson︰係喎,會唔會真係化妝呢?不過依家換晒成屋喉,又度過冇再漏水,可能係之前積咗喺地下嘅水抽咗出嚟喎師傅話。佢今日仲拿拿淋幫我再剷過再油埋油,仲話之後有水漬再 call 佢搞喎~

Jackson said...

咁師傅信心十足、可能只係新油收水,唔係新水漬。

largeheadboy said...

jackson︰有水漬嗰個位應該無水管,所以可能真係收水,希望真係咁喇,唔係就要繼續煩落去~

Jackson said...

咪比我嚇倒, 信師傅啦.
我唔清楚你咁大工程, 先以為係化妝.

maymay said...

你個師傅好企理,同我果個差得遠咯~
求神拜佛,希望唔會再漏水~~

卡臣 said...

恭喜哂
好靚啊

Cat said...

恭喜晒又新居入伙!!

咁大工程都叫小裝修?
我諗師傅叫得你有事就搵佢,咁應該無事既。
如果唔係,佢應該會求期答你就算數。

小頭 said...

希望真的完結了。裝修對自己和鄰居都是苦事!

naruto said...

唉!最煩係水管,面果D都話可以執下油,底層真係無計,又無x光眼

佛爺 said...

其實做得好企理,我睇落就覺得無得頂喇!

largeheadboy said...

jackson︰其實我都有啲擔心,都未收晒水就咁快整牆,咁好快咪又會再出事囉。依家只有希望以後安安樂樂喇。

maymay︰呢個師傅好好交帶,手工都唔錯(可能我不嬲都係對開手工差嗰啲),之前一早搵佢就好喇。
係,求神拜佛唔好再有野煩,我想喺度安享晚年架!

卡臣︰表面睇呃到人架真係 ^^

cat︰咁又係!再加上到依家我一毫子仲未畀過佢,佢驚我走數多啲 :p

小頭︰早幾日撞到隔離師奶,佢問我裝修完無耐依家係咪又豪裝,我諗啲隔離鄰舍已經好憎我架喇~

naruto︰x光眼 <-- 第一眼睇又以為你講衰野~
所以話哩,有樓又有有樓嘅野煩~

largeheadboy said...

佛爺︰hehe,依家的確覺得間屋幾企理,咁等我見個市繼續升就賣多幾廿萬喇(笑)~

l.minor said...

師傅咁有信心, 要信佢啦~

過多幾日就乜事都無

Ah ming said...

咁幾時擺入伙酒 ^ _ ^

naruto said...

果隻我會用個C字,唔用X字架

largeheadboy said...

l.minor︰師傅咁講我就只可以咁樣信佢喇!今日返到嚟一切都仲好正常~

ah ming︰呢排忙到顛,希望六月清閒啲至算喇~

naruto︰咁又係,如果係 c 光眼會幾特別囉!

紅米奇 said...

賀一賀啦, 整個一泊二食POST黎睇下, 一人前夕食或二人定食套餐都得架

lau2tang said...

見到你同Maymay的遭遇,我都唔敢搞我間殘屋,等佢爛到無得補先算~~

largeheadboy said...

紅米奇︰要賀就直頭過去日本一泊二食喇,不過照依家形勢未必可以趁暑假旺季前飛一轉呀,嗚~~

劉鄧︰一係把鬼火索性賣咗層樓算囉!我真係有咁諗過架!

lau2tang said...

咪傻啦!
一買一賣,釐印費、律師費,唔使錢咩!
知唔知依家的樓,動輒幾百萬一層,個釐印費真係好金,同事剛剛買了一層4XX萬ge樓,釐印費要十幾萬。
吖!不過你身家豐厚,玩吓換樓都應該無問題ge~

laulong said...

水漬真係好煩,我怕鬼晒!

largeheadboy said...

劉鄧︰講下啫,我都無本事換樓喇,何況呢度我覺得住得幾好,應該會成為祖屋架喇!

laulong︰我依家無日返到屋企都巡下有冇新水漬,真係令人好擔心又出番黎~

the inner space said...

養樓和養子女都是昂貴的耐用品!

lau2tang said...

你唔係無本事,係費事啫~ ^b^

largeheadboy said...

the inner space︰係呀,呢鑊好甘,又要開始我嘅節約生活喇~

劉鄧︰真係無本事喇,仲邊有本事供成二三十年吖,我都退休咁濟咯~

Rempei said...

請問第一幅相的櫃是師傳做還是現成買的呢?

largeheadboy said...

rempei︰個櫃係度尺攞上深圳做,然後返落嚟裝,國貨嚟架。呢個做得算幾好,衣櫃同書櫃就麻麻,好撞手神。